HOSEA 1 - BUKUIT NE TILIL

Katunisietab Hosea ko kalewenetab ole namdogei Jehovah ak Israel

¹ Ni ng’olyotab Jehovah ne kinyonji Hosea weritab Beri, eng’ betusiekab Usia, Jotam, Ahas, ak Hesekia, che ki laitorinikab Juda, ak eng’ betusiekab Jeroboam weritab Joas, laitoriatab Israel.

² Ye kingong’alale Jehovah Hosea eng’ tai, kolenji Jehovah Hosea, Ui imutyige chepkugoniot koek osotiondeng’ung’, ak lagokab kugoinatet: amu yaei emet kugoinatet ne o, kometoi Jehovah.

³ Kiwa anyun kotun Gomer cheptab Diblaim; ak kimanach, ak kisikyi inendet werit.

⁴ Ak kilenji Jehovah inendet, Kuure kainennyi Jesreel; amu tomo ne matia, si kayaakta mugetut agobo gorotikab Jesreel, eng’ gotab Jeu, ak agesu bounatetab gotab Israel.

⁵ Ak tun airie kwangetab Israel eng’ atebwetab Jesreel eng’ betunoto.

⁶ Ak kimanach kogeny, ak kosich chepto. Ak kolenji Jehovah inendet, Kuure kainennyi Lo-ruhama: amu ma arire gotab Israel, anyochini kaat eng’ kiy age tugul.

⁷ Ago arire gotab Juda, ak asorune ichek eutab Jehovah Kamuktaindenywa, amasoru eng’ kwanget, anan eng’ rotwetab chok, anan eng’ luget, anan eng’ mbartanyisiek, anan eng’ bik che lanyei mbartanyisiek.

⁸ Ak kingo kagoluge Lo-ruhama, komanach kogeny, ak kosich werit.

⁹ Ak kile Jehovah, Kuure kainennyi Lo-ami: amu ma o bikyuk, amaegu Kamuktaindeng’wong’.

Arorutiet agobo kaweegunetab bik

¹⁰ Ago tenitu lagokab Israel ng’aniek che bo nyanjet, che magimuchi kirogendoe kiy anan kiit; ak eng’ ole kigimwachine icheget kele, Ma o bikyuk, ko tun kilenjin, O werikab Kamuktaindet ne sobei.

¹¹ Ak kiyum lagokab Juda ak lagokab Israel, ak kolewenjigei kandoindet agenge, ak kotogosta eng’ emonoto: amu egu betut ne o betutab Jesreel.