HEBRANIK 9 - BUKUIT NE TILIL

Oldab tililindo ne bo keny ko itondab oldab tililindo ne leel

¹ Noto anyun, agot arorutiet ne bo tai ko kitinyei ng’atutikab saet, ak komostanyi ole tilil, ne bo ng’onyuni.

² Amu kiga kichob emait; ne bo tai ko ole kimi keldab tait, ak meset, ak makatinik che bo kabartaet; ne kiguure Ole Tilil.

³ Ak kingesiir anget ne bo aeng’, ne kigioiye got, ko kimi emait ne kiguure Ole Tilil kosiir tugul;

⁴ ne tinyei kapkorosutab tahabu, ak moingetab arorutiet ne kigiliige tahabu komoswek tugul, ole kimi teret ne bo tahabu ne kimi mana, ak kiroktab Aron ne kiing’ati, ak koik che bo arorutiet;

⁵ ak kimi baragunnyi kerubisiekab lilindo che kiiuuri keruetab rirenet; tuguk che magimuchi keng’alale nguno agenge agenge.

⁶ Ak kingo kagechob anyun tuguchuto ko u noto, koba tisiik kotugul emait ne bo tai, koyaei boisiosiekab saet;

⁷ ago, kiwendi tisiindet ne o inegei emait ne bo aeng’ konyil agenge eng’ kenyit, ama wendi ama tinyei korotik, che igoitoi agobo ge, ak agobo lelutikab bik:

⁸ iboru Tamirmiriet ne Tilil eng’ ng’olyondoni kole, kitom keng’any oret ne mong’jin ole tilil, ye kita ko tononot emait ne bo tai;

⁹ ne kalewenetab betusiechu; kigigoitoi eng’ kalewenonoto agine kagochinoik ak tiseiywek, che maimuchi koyai chito ne saei koek ne igesunotgei eng’ kabwatennyi,

¹⁰ amu (koboto amitwogik ak che kieei ak kaunsosiek che terotin) choto ko ng’atutik che bo borto kityo, che kiging’at agoi betusiek che bo kalititet.

Itililisiei tiseiywot ne inendet Kristo

¹¹ Ago Kristo, ye kingo kagonyo, ne inendet tisiindet ne o ne bo tuguk che miach che tun bwanei, eng’ emait ne o ak kogesunotgei kosiir, ne ma kiyae eunek, ye kiweech, ko ma bo ng’onyuni,

¹² ama eng’ korotikab kwesik ak moek, ago eng’ korotikyik ichegei, kwo anyun ole tilil konyil agenge ak koyam, ye kingo kagonyor katiaget ne bo koigeny.

¹³ Amu ngot kotilili agoi kaunetab borto korotikab kwesik ak kirugik, ak orekab roriat che kiise ichek che tinyei muruonindo:

¹⁴ kotilili anyun ne tia korotikab Kristo, ne kiigochigei Jehovah eng’ Tamirmiriet ne bo koigeny, ko matinyei berut, kotilil kabwateng’wong’ eng’ boisiosiek che meiyotin si oboisiechi Jehovah ne sobei!

¹⁵ Ak amu ng’olyondonito inendet ko katuiyoindetab kayomiset ne leel, si kobiit konyor che kigeguur, arorutietab borotet ne bo koigeny, ye kingo kagobiit meet agobo katiagetab bistaosiek che kimitei eng’ kayomiset ne bo tai.

¹⁶ Amu ole mitei arorutiet ne bo nametab tuguk ko kanyol komitei meetab inendet ne kiyaei.

¹⁷ Amu tinyei arorutiet kimnatet ye kabiit meet: tos kim kota kosobei inendet ne kiyaei?

¹⁸ Eng’ noto anyun agot arorutiet ne bo tai, ko kima kigoito ko mami korotik.

¹⁹ Amu ye kingo kagomwachi Musa bik tugul kayomiset age tugul ko u eng’ Ng’atutiet, konam korotikab moek ak che bo kwesik, koboto beek ak kororik che biriren ak husop, ak kois bukuit, ak bik tugul,

²⁰ komwaei kole, Chu ko korotik che bo arorutiet ne king’at Jehovah agobo okwek.

²¹ Ak koise kogeny korotik emait koboto tuguk che kiboisie.

²² Ak eng’ Ng’atutiet ko u kele, kitilili tuguk tugul eng’ korotik, ak ngo mami tumdaetab korotik ko mami nyoetab kaat.

Mami ne kergei ak tiseiywot ne inendet Kristo

²³ Kinyolu anyun kitilil itonwekab tuguk che bo kipsengwetisiek eng’ choto; ago kitilile tuguk che bo kipsengwet tiseiywek che miach kosiir chuto.

²⁴ Amu kima mong’ji Kristo ole tilil ole kigiyae eunek, ne karogutietab tugukab iman; ago kimong’ji kipsengwet inendet, si kotoogu eng’ taitab Jehovah agoi achek:

²⁵ ma si kogoitogei konyil che chang’: ko u ye wendi tisiindet ne o ole tilil eng’ kenyit age tugul koibei korotik che ma chechik;

²⁶ amu nda ki u noto anyun ta kinyoljin konyalil konyil che chang’ koboch ngelumda ng’ony: ago kagong’ang’ak nguno konyil agenge eng’ kagesunetab kenyisiek si kobiit koisto tengekto eng’ tiseiywot ne ki inendet.

²⁷ Ak ko u ye kiging’at agobo bik kobek konyil agenge, ak ye ibata nito koek kiruoget;

²⁸ ko u noto Kristo agine, kingo kagigoito konyil agenge si koib tengekwogikab che chang’, ko tun toogu ne bo aeng’, ma agobo tengek ago, eng’ ichek che igeni inendet, agoi yetunet.