HEBRANIK 8 - BUKUIT NE TILIL

O tiseinatet ne bo Kristo kosiir tiseinatet ne bo Yahudik

¹ Nguno anyun, eng’ tuguk che kimwae, kit ne o ko ni: kitinye tisiindet ne o ne u ni, ne kitebe komostab eut ne bo tai ne bo ng’echeretab Laitornatet ne bo Etunatet eng’ kipsengwetisiek,

² kiboitiot ne bo tuguk che tililen, ak emait ne bo iman, ne kilumei Kiptaiyat, ma bik.

³ Amu kindoi tisiindet age tugul ne o si kogoitoi kagochinoik ak tiseiywek: noto anyun konyolu kotinyei agine tisiindoni kit ne igoitoi.

⁴ Nda mi ng’ony, ta maegu tisiindet, amu mi ichek che igoitoi kagochinoik ko u biteetab Ng’atutiet;

⁵ che boisiei eng’ karogutiet ak uruetab tuguk che bo kipsengwet, ko u ye kigiteechi Musa ye kimachei kotonon emait: amu kilenji, Rib, si iyai tuguk tugul ko u kergeindo ne kigiborun eng’ tulwet.

⁶ Ago kagosich nguno boisiet ne mie kosiir, ko u noto agine, inendet ko katuiyoindet ne bo kayomiset ne mie kosiir, ne kigiyai eng’ arorutik che miach kosiir.

⁷ Amu nda kima ko rartaat arorutiet ne bo tai, ko kima ta ta kecheng’jin boroindo ne bo aeng’.

⁸ Amu ye kingonyorji lelutik ichek, komwa kole, Ogeero, mwaei Kiptaiyat kole, bwanei betusiek, Che tun kiyomisyinige kayomiset ne leel ak gotab Israel ak gotab Juda;

⁹ Ma ko u kayomiset ne kigiyomisge ak kwanisiekwak Eng’ betut ne kianam eunekwak si amut komong’ eng’ emetab Misri; Amu kima koteptoi kayomisennyu, Ak kima amage kiy ichek, mwaei Kiptaiyat.

¹⁰ Amu ni kayomiset ne tun kiyomisyinige ak gotab Israel. Ye ibata betusiechoto, mwaei Kiptaiyat; Andoi ng’atutikyuk kabwatutikwak, Ak asirji kogeny mugulelwekwak: Ak aegu Jehovah eng’ ichek, Ak koek bikyuk:

¹¹ Amu koneti chi tugul chitab kokwennyi, Anan konet chi age tugul ne tupcho, kolenji, Ni Kiptaiyat: Amu tun naa tugul Koboch ne ming’in eng’ ichek kot koit ne o.

¹² Amu tun arire ichek amu tengekwogikwak, Ama tun abwati tengekwogikwak agoi.

¹³ Amu kimwa kole, Arorutiet ne leel, kigoyai koosit ne bo tai. Ago noto ositu koga kotebi keny, ko negit kogesgei.