HEBRANIK 5 - BUKUIT NE TILIL

¹ Amu tisiindet age tugul ne o, ne kigilewen eng’ bik, kindoi agobo bik amu tuguk che tokyingei Jehovah, si kobiit kogoito kagochinoik ak tisieywek agobo tengekwogik:

² inendet ne imuchi korire kimanainik ak che mastoi, amu inendet agine komi eng’ nyalulet;

³ ak amu noto anyun, ko u ye nyoljin kogoito che kitisisie agobo tengekwogikab bik, ko u noto konyoljin kogoito agobo ge agine.

⁴ Ama mi chi ne igochingei inegei teegisi, kobate ye kaguur Jehovah inendet, ko u Aron.

⁵ Ko u noto anyun, kima itororgei Kristo agine koek tisiindet ne o, ago inendet ne king’alalji, kolenji, I Werinnyu, Kasichin rani:

⁶ Ko u ye mwaei agine eng’ komosta age kole, I tisiindet koigeny Ko u kit ne ki u Melkisedek.

⁷ Ne ki eng’ betusiek che kimi eng’ borto, ko kagogoito sautik ak somutik eng’ rirek che eechen ak beekab kong’, korirjin inendet ne kiimuchi kosor eng’ meet, ak kingo kagegasyi amu kaiyweisiennyi ne kiywei Jehovah.

⁸ Agot nganda ki Werit inendet, ko kiinetgei kasetab it eng’ tuguk che kinyorune nyalilda;

⁹ ak kingo kageyai koek ne igesunotgei, koek inendet ne kitaunegei yetunet ne bo koigeny eng’ ichek tugul che kase it inendet;

¹⁰ ne kiguure Jehovah tisiindet ne o ko u kit ne ki u Melkisedek.

Kanyol kigiilge eng’ oretab Krosto

¹¹ Kitinye ng’alek che chang’ che kimwae agobo inendet, ago uui ole kiborundoi, amu kigouuiit eng’ okwek ogas.

¹² Amu eng’ ye kita nyolu oegu konetik, konyoljinok kogeny konetak chi konetisiosiek che bo tai che bo ng’alekab Jehovah; ak kioegu che machei chego, ama amitwogik che uuen.

¹³ Amu age tugul ne luei chego kotom konai koboisie komie ng’olyotab imanda; amu manyurut inendet.

¹⁴ Ago bo bik che eechen amitwogik che uuen, icheget che kigoboisie ng’omnatosiekwak komuchi kobesio che miach ak che yaach.