HEBRANIK 4 - BUKUIT NE TILIL

Jesu, Tisiindet ne O, ko o kosiir Aron

¹ Ongiywei anyun yo ta komi arorutiet ne keite kamuung’ennyi, si malen chi age tugul eng’ okwek, mata anyoru.

² Amu kigiamwech iman logoiywek che miach, ko u icheget: ago ma toret ichek ng’olyotab kaset, amu kima namgei ak kayanetab icheget che kigasei.

³ Amu achek che kigiyan keite kamuung’onoto; ko u ye kigomwa inendet kole, Ko u ye kiayosie eng’ neregekyuk ale, Maitei ichek kamuung’ennyu: agot nganda kiga kogesgei boisionichoto koboch ngab kelumda ng’ony.

⁴ Amu kigomwa ko u ni eng’ komosta age agobo betutab tisab kole, Ak kiimuuny Jehovah eng’ betutab tisab eng’ boisionikyik tugul;

⁵ ak eng’ yu agine komwa kole, Maitei ichek kamuung’ennyu.

⁶ Eng’ noto anyun amu mitei boroindo ne bo alak koit oloto, ak ichek che kiga keamji logoiywek che miach, ko kimata koit amu ngelelnatet,

⁷ kamwa kogeny agobo betut age, komwaei eng’ Daudi, ko kagobata betusiek alak, kole, Rani, ko u ye kisib kemwa kele, Ngot ogas kutinnyi rani Ko mat ouuiit mugulelwekwok.

⁸ Amu nda kiga kogochi Josua ichek kamuung’et, ta kima kota komwaei let agobo betut age.

⁹ Ng’etunot anyun kamuung’etab sabato agobo bikab Jehovah.

¹⁰ Amu inendet ne kagoit kamuung’etab Jehovah ko kagomuuny eng’ boisionikyik, ko u ye kiimuuny Jehovah eng’ chechik.

¹¹ Ongigiilge anyun si keit kamuung’onoto, si maibut chi age tugul eng’ kergeinoto bo ngelelnatet.

¹² Amu sobei ng’olyotab Jehovah, ak ko kim, ak ko ng’atib kosiir rotwetab chok ne ng’atiben komoswek tuwai, ak kotoorei agoi kobesio sobondo ak tamirmiriet, ak ole tuiyechin kowek ak amset, ak chepcheb koguiyo kabwatutik ak magutikab muguleldo.

¹³ Ama mi kiy age tugul ne kigiyai ne ma toogu eng’ tainnyi: ago ng’ang’otin ak yatotin tuguk tugul eng’ taitab konyek che bo inendet ne tun kitetyini atebosiekyok.

¹⁴ Amu kitinye tisiindet ne o ne kigochut kipsengwetisiek, Jesu Weritb Jehovah, ongenam mising’ ng’ang’ennyo.

¹⁵ Amu magitinye tisiindet ne o ne maimuchi kogaswech nyalulnatosiekyok; ago ne kigiyom ko u achek eng’ tuguk tugul, ama yai tengek.

¹⁶ Ongerikyi anyun ng’echeret ne bo mieindo eng’ nyiganatet, si kenyoru rirenetab ge, ak kesich mieindo ne toretech eng’ betut ne kinyalili.