HEBRANIK 3 - BUKUIT NE TILIL

O Kristo kosiir Musa

¹ Noto anyun, che kitupche che tililen, yamdoik che bo kuursetab kipsengwet, obwat mising’ Ne Kiyoktoi ak Tisiindet ne O ne bo ng’ang’ennyo, inendet Jesu;

² ne kiek ne kiyani eng’ inendet ne kilewen, ko u Musa agine eng’ gotab Jehovah tugul.

³ Amu kigiit kele nyoljin torornatet ne o kosiir Musa, ko u ye tinyei inendet ne kiteechei got teegisto kosiir got.

⁴ Amu teechei chito got age tugul; ago inendet ne kiteechei tuguk tugul ko Jehovah.

⁵ Ak kiek Musa iman ne kiyani eng’ gotab Jehovah tugul ko u kiboitiot, agobo baornatet ne bo tuguchoto che ki tun kemwa eng’ let;

⁶ ago Kristo ko u werit, ne bou gonnyi; achek gonnyi, ngenam mising’ nyiganatennyo ak torornatetab kamang’unennyo agoi kagesunet.

⁷ Noto anyun, ko u ye mwaei Tamirmiriet ne Tilil kole, Ngot ogas kutinnyi rani,

⁸ Ko mat ouuiit mugulelwekwok, ko u eng’ kaiimset, Ko u eng’ betutab yomset eng’ ong’atet,

⁹ Ye kiyoma kwanisiekwok kotiema, Ak kigeer boisionikyuk kenyisiek artam.

¹⁰ Eng’ noto anyun kianerekyi ibini, Ak kiale, ichiliili kotugul eng’ mugulelwekwak: Ago kima kongen ortinwekyuk;

¹¹ Ko u ye kiayosie eng’ neregekyuk ale, Maitei ichek kamuung’ennyu.

Kanyol keegu che kiyan eng’ boisionik agoi let

¹² Oripge anyun che kitupche, si mabiit chi age tugul eng’ okwek ne tinyei muguleldo ne ya ne bo bistoet, koistoegei Jehovah ne sobei:

¹³ ago oteechige betut age tugul, eng’ ye ta kemwaei kele rani; si ma kiuuiit chi age tugul eng’ okwek amu kenisietab tengekto:

¹⁴ amu kigeegu yamdoikab Kristo, ngenam mising’ taunetab kamang’unennyo agoi kagesunet:

¹⁵ ye ta kemwaei kele, Ngot ogas kutinnyi rani, Ko mat ouuiit mugulelwekwok, ko u eng’ kaiimset.

¹⁶ Amu ng’o che kitagis ye kingogas? Tos ma ichek tugul che kimong’une Misri eng’ Musa?

¹⁷ Ak ng’o che kinerekyi inendet kenyisiek artam? Tos ma icheget che kichalwogenso, che kiibutyi muswekwak ong’atet?

¹⁸ Ak ng’o che kiiyosiechi inendet kole magoi it kamuung’ennyi, tos ma ichek che kiingelelso?

¹⁹ Kigeere anyun kele kima imuch ichek koit amu ma iyan.