HEBRANIK 2 - BUKUIT NE TILIL

¹ Eng’ noto anyun kanyol kenam mising’ kosiir, tuguchoto kigegas, si ma kichuchuige.

² Amu ngo tononot ng’olyot ne kigimwau eng’ malaikaisiek ak kigonyor bistoet age tugul ak ngelelnatet melekto ne kageerjinet ne bo imanda;

³ kechilildoi ano anyun, ngemete yetunet ne o ne te ni? Ne kiga kisib kemwa eng’ Kiptaiyat, ak kiigimitwech ichek che kigas;

⁴ ak kibaoriani agine Jehovah koboto icheget, eng’ kaborunoik ak kwong’utik, ak eng’ kamugosiek che terotin, ak eng’ kagoitaosiekab Tamirmiriet ne Tilil, ko u magennyi.

⁵ Amu ma igochi malaikaisiek koboi ng’onyut ne nyonei, noto kimwae.

⁶ Ago baoriani chito age eng’ komosta age, kole, Nee chi, ne tos ibwat? Anan weritab chi, ne tos irutochi?

⁷ Kiiyai inendet koming’init kitigin eng’ malaikaisiek; Ilaakyini inendet kutwetab torornatet ak teegisto, Ak kiinde koboi boisionikab euneguk:

⁸ Kiinde tuguk tugul kogas it eng’ keldebesaikab kelyekyik. Eng’ noto anyun ko u ye kiinde tuguk tugul kogas it inendet, ko kima ituch kiy ne ma kas it inendet. Ago nguno ko tom kegeer kogas it tuguk tugul inendet.

⁹ Ago kigeere inendet ne kigiyai koming’init kitigin eng’ malaikaisiek, inendet Jesu, ne kigilaakyi kutwet ne bo torornatet ak teegisto amu nyalilda ne bo meet, si kobiit kochamjam meet eng’ mieindab Jehovah agobo chi age tugul.

¹⁰ Amu kinyolji inendet, ne mi tuguk tugul amu inendet, ak kobunu inendet tuguk tugul, ye imutyin werik che chang’ torornatet, si koyai taunindetab yetunenywa koek ne igesunotgei eng’ nyalilwogik.

¹¹ Amu inendet ne itililisiei ak ichek che kitilili kobunu agenge: eng’ noto anyun ko mageerei inendet kalilanet koguure ichek che kitupche,

¹² kole, Amwachini kaineng’ung’ tupchosiekyuk, Atieni kalosuneng’ung’ eng’ kwenutab tuiyet.

¹³ Ak kogeny, Amang’u inendet. Ak kogeny, Keero, ane ak lagok che kigogona Jehovah.

¹⁴ Amu yamdoi anyun lagok korotik ak borto, kinam choto inendet agine ko u noto; si kobiit kong’em eng’ oretab meet inendet ne tinyei kimnatetab meet, noto ko oindet;

¹⁵ si kobiit kotiach ichek tugul che ki ratotin betusiekwak tugul eng’ kaiyweisietab meet.

¹⁶ Amu iman manamei itondab malaikaisiek, ago kinam keswekab Abraham.

¹⁷ Eng’ noto anyun kinyolji keyai inendet eng’ tuguk tugul kogergeit ak tupchosiekyik, si kobiit koek tisiindet ne o ne bo rirenetab ge ak ko bo iman eng’ tuguk che tokyingei Jehovah, si kobiit koyai tisisiet agobo tengekwogikab bik.

¹⁸ Amu ko u ye kinyalil inendet ye kigiyomei, komuchi inendet kotoret ichek che kiyomei.