HAGGAI 2 - BUKUIT NE TILIL

Kogiili Hagai kogeny teegikab got

¹ Kinyo ng’olyotab Jehovah eng’ maotiot Hagai, eng’ arawetab tisab, eng’ betutab tiptem ak agenge ne bo arawanato, kole,

² Ng’alalji Serubabel weritab Sealtiel, bounindetab Juda, ak Josua weritab Jeosadak tisiindet ne o, koboto bik che king’et, ilenji,

³ Ng’o eng’ okwek ne king’et ne kigeer goi kotinyei torornatennyi ne bo tai? Ak ogeertoi ano nguno? Tos ma u buch eng’ konyekwok?

⁴ Nyiganitu, ee Serubabel, mwaei Jehovah; ak inyiganitu, ee Josua weritab Jeosadak, tisiindet ne o; onyiganitu okwek bik tugul che bo emet, mwaei Jehovah, ak oboisie: amu ami kobotok, mwaei Jehovah ne bo lugosiek,

⁵ ko u ng’olyot ne kigiyomisyige ye kiobwane eng’ Misri, ak kitebe kwenung’wong’ Tamirmiriennyu: amoiyweisie.

⁶ Amu mwaei Jehovah ne bo lugosiek ko u ni kole: Ta atumdumi kogeny konyil agenge, kipsengwet ak ng’ony ak nyanjet, ak emet, eng’ ne matia.

⁷ Ak atumdum bororiosiek tugul, ak kobwa tuguk che chamei bororiosiek tugul, ak anyiit goi torornatet, mwaei Jehovah ne bo lugosiek.

⁸ Chechuk fedaisiek, ak chechuget tahabusiek agichek, mwaei Jehovah ne bo lugosiek.

⁹ Eetu torornatet ne bo let ne bo goi kosiir ne bo tai, mwaei Jehovah ne bo lugosiek: ak agonu kalyet eng’ yuto, mwaei Jehovah ne bo lugosiek.

Biret ne biitune imanda ne magisubi komie

¹⁰ Kinyo ng’olyotab Jehovah, eng’ maotiot Hagai, eng’ betutab tiptem ak ang’wan ne bo arawetab sogol, eng’ kenyit ne bo aeng’ ne bo Darius, kole,

¹¹ Mwaei Jehovah ne bo lugosiek ko u ni kole: Oteebe tisiik agobo ng’atutik, olenji,

¹² Ngot koibe chito ngoriennyi banyek che itabanotin, ak kotiiny ngorionoto makatiat, anan sogoriek, anan divaik, anan mwanik, anan amit age tugul, ko tos tililitu? Ak kiwol tisiik kole, Achicha.

¹³ Yeityo komwa Hagai kole, Ngot kotiiny chi age tugul ne ng’wan ne kitwa musto, age eng’ tuguchuto, ko tos ng’wanitu? Ak kiwol tisiik kole, Ng’wanitu.

¹⁴ Kowol anyun Hagai kole, U noto bichu ak u noto bororioni eng’ tainnyu, mwaei Jehovah, ak u noto boisiet age tugul ne bo eunekwak; ng’wan kit ne igoitoi eng’ oloto.

Arorutietab Jehovah eng’ Serubabel

¹⁵ Ak asomok anyun nguno, ale obwat koboch betunito ak kwo tai, koboch betut ne kiginde koita agenge baragutab koita age eng’ hekalutab Jehovah:

¹⁶ eng’ betusiechoto tugul, ye kingwo chi kocheng’ karurugutietab kerutik tiptem, konyoru ne bo kerutik taman kityo; ak kingwo ole kitaage divaik kole koib terenik konom, ko kimi tiptemu ichegei.

¹⁷ Kiabirenok chelalitiet ak uchatet ak koikab ropta eng’ boisionik tugul che bo eunekwok; ago ma oweekyage, mwaei Jehovah.

¹⁸ Asomok ale, obwat, koboch betuni ak kwo tai, koboch betutab tiptem ak ang’wan ne bo arawetab sogol, koboch betut ne kigiluume lumeiywotab hekalutab Jehovah, obwat anyun.

¹⁹ Tos ta komi bek choge? Ee, ma iiyo ketikab sabibuk, anan mogoonik, anan ketikab logoek alak, anan emitik; aberurok anyun koboch betuni.

Arorutietab Jehovah eng’ Serubabel

²⁰ Ak kinyonji ng’olyotab Jehovah Hagai, ne bo aeng’, eng’ betutab tiptem ak ang’wan ne bo arawet, kole,

²¹ Ng’alalji Serubabel, bounindetab Juda, ilenji, Atumdumi kipsengwetisiek ak ng’ony:

²² ak agabui ng’echeretab laitornatet ne bo bounatosiek, ak ang’eme kimnatetab bounatosiekab bororiosiek; ak agabui karisiek che bo luget, koboto che lanyei; ak kobutyo mbartanyisiek koboto che lanyei, kibarei age tugul eng’ rotwetab chok ne bo tupchennyi.

²³ Mwaei Jehovah ne bo lugosiek, kole, Anamin eng’ betunoto, ee Serubabel, otwogindennyu, weritab Sealtiel, mwaei Jehovah, ak ayain iige ng’okset, mwaei Jehovah: amu kialewenin, mwaei Jehovah ne bo lugosiek.