HAGGAI 1 - BUKUIT NE TILIL

Kogiili Hagai bik koteech gatab Jehovah

¹ Kinyonji ng’olyotab Jehovah Serubabel weritab Sealtiel, bounindetab Juda, ak Josua weritab Jeosadak tisiindet ne o, eng’ maotiot Hagai, eng’ kenyit ne bo aeng’ ne bo laitoriat Darius, eng’ arawet ne bo lo, eng’ betut ne bo tai ne bo arawanato, kolenji,

² Mwaei Jehovah ne bo lugosiek ko u ni kole, Mwaei bichu, kole, Tom koit betusiek che nyoljinech kebwa, betusiek che kiteege gotab Jehovah.

³ Kinyo anyun ng’olyotab Jehovah eng’ maotiot Hagai kole,

⁴ Tos betusiek chuto eng’ okwek che omenye gorikwok che kigitete baoinik, kobutot goi?

⁵ Mwaei anyun Jehovah ne bo lugosiek ko u ni kole, Orib atebosiekwok.

⁶ Kiogol che chang’, ago ogese che ng’ering’; oamisiei, ago mobiyong’dosi; oeeisei, ago manyiiok; olaachi ngoroik, ago mami ne lalang’; ak inendet ne nyoru melekto kondoi lolet ne undurot.

⁷ Mwaei Jehovah ne bo lugosiek ko u ni kole, Orib atebosiekwok.

⁸ Otogoste tulwet, ak oibu ketik ak oteech goyoto, si abaibaitune noto, ak kiloswa, mwaei Jehovah.

⁹ Kiocheng’ che chang’, ak ogeero, kibiit che ng’ering’; ak kingoibu kobwa ga, agutute. Amu nee? Mwae Jehovah ne bo lugosiek. Amu gonnyu ne butot, ago labati chi age tugul gonnyi.

¹⁰ Kigirat kipsengwet anyun amu okwek si magon rewot, ama yiei emet logoekyik.

¹¹ Ak kiang’at kobiit kemeut eng’ emet, ak eng’ tulonok, ak eng’ bek, ak eng’ divaik, ak eng’ mwanik, ak eng’ tuguk che bitos eng’ ng’ony, ak eng’ bik, ak eng’ tuga, ak eng’ boisionik tugul che bo eunek.

Kotau Serubabel ak Joshua teeksetab goyoto

¹² Kigas it anyun Serubabel weritab Sealtiel, ak Josua weritab Jeosadak, tisiindet ne o, koboto bik tugul che king’et, kigas it Jehovah Kamuktaindenywa ak ng’alekab maotiot Hagai, ko u ye kiga koyok Jehovah Kamuktaindenywa inendet, ak kiiyweis bik eng’ taitab Jehovah.

¹³ King’alal anyun Hagai, ne kiiyoktoi Jehovah, komwachi bik ng’alekab Jehovah kolenji, Ami kobotok, mwaei Jehovah.

¹⁴ Ak kiichirjir Jehovah tamirmirietab Serubabel weritab Sealtiel bounindetab Juda, koboto tamirmirietab Josua weritab Jeosadak, tisiindet ne o, koboto tamirmirikab bik tugul che king’et; ak kibwa kobois eng’ gotab Jehovah ne bo lugosiek, Kamuktaindenywa,

¹⁵ eng’ betutab tiptem ak ang’wan ne bo arawet, eng’ arawetab lo, eng’ kenyit ne bo aeng’ ne bo laitoriat Darius.