HABAKUK 3 - BUKUIT NE TILIL

Saetab Habakuk, ak kamang’unennyi ne imang’u Jehovah

¹ Saet ne kisa maotiot Habakuk, tiendo ne kiguure Shigionoth ne kitien agobo che kimasta.

² Ee Jehovah, kiagas ng’aleguk, aiyweisiei: Ee Jehovah, ing’eet boisieng’ung’ eng’ kwenutab kenyisiek; Yai kotook eng’ kwenutab kenyisiek; Ibwat rirenet nginerechi.

³ Kinyo Kamuktaindet eng’ Teman, Kinyo Inendet ne Tilil eng’ tulwetab Paran. Kituch torornatennyi kipsengwetisiek, Ak kinyi ng’ony kalosunennyi.

⁴ Ki u kakweng’ennyi lapkeiyet; Kimong’une eunnyi lapkeiyet ne u ne bo kelyekab asista: Ak kimi yoto ole kiung’e kamuktaennyi.

⁵ Kiindoe inendet koroito, Ak kimong’une kelyekyik kalyelet ne u mat.

⁶ Kitonon ak kokwa ng’ony; Kigeer, ak kotumdum bororiosiek: Ak kiiseerak tulonok che bo koigeny; Kiing’urukso tulonok che bo koigeny; Ki u banwekyik betusiek che bo keny.

⁷ Kiageer emaisiekab Kusan komi nyalilda: Kibotanso tuguk che kioiye emet che bo Midian.

⁸ Tos kinerekyi Jehovah ainosiek? Tos kinyo nereknateng’ung’ agobo ainosiek, Anan agobo nyanjet, Kot ilany mbartanyisieguk, Ak ilany karisieguk che bo luget che bo yetunet?

⁹ Kigitiach kwangeng’ung’; Ki bo iman ng’olyotab kayosiosiek ne kigiyosiechi bororiosiek. Kiibete emet ainosiek.

¹⁰ Kiiyweis tulonok ye kigeerin; Kisiirto usonetab nyanjet; Kitul riret, Ak konamji barak eunekyik.

¹¹ Kitononso asista ak arawet eng’ meng’otenywa, Eng’ lapkeiyetab kipchaboniguk kobendi, Eng’ kaluunetab ng’oting’ung’ ne ilyeli.

¹² Kiibun emet ineregoti, Kiibor bororiosiek ko u bek eng’ neregek.

¹³ Kiimong’u agobo yetunetab biguk, Agobo yetunetab neng’ung’ ne iilat; Kiiguoten kandoindetab gotab kiptengeginik, Ing’anye lumeiywot agoi kaatit.

¹⁴ Kiitoore kiplitokyik kandoindetab bikyik che bo luget: Kibwa ko u kipchurjuriet kole koseera: Ki u boiboindanywa che amei kibananok eng’ ung’ot.

¹⁵ Kiitiege inye nyanjet mbartanyisieguk, beek che irurugotin che kimen.

¹⁶ Kiagas, ak kitilgei moennyu, Kibotan kutinnyu eng’ cheonoto; Kinunio kowekyuk ak kiabotan eng’ ole kiami: Si kobiit amuuny eng’ betutab nyalilda, Ye togosyi noto bik, che ibokyin inendet eng’ kweanaik.

¹⁷ Amu ngot ko ma yie mogoiywet, Anan ko ma rurio ketikab sabibuk; Koek buch boisietab emdit, Ama biitu amitwogik eng’ mbarenik; Ak kebar akwotisiekab kechirek eng’ biusiek, Ama komi akwotisiekab tuga eng’ biusiek:

¹⁸ Aboiboitu kora eng’ Jehovah, Aboiboitu eng’ Kamuktaindetab yetunennyu.

¹⁹ Kimnatennyu Jehovah Kiptaiyat, Ak yaei kelyekyuk koigei che bo cheptirgichet, Ak komutata eng’ oldinwekyuk che tororen. Bo Ne O eng’ Butik, eng’ kibugandinikyuk che bo inoik.