HABAKUK 2 - BUKUIT NE TILIL

Wolunetab Jehovah ak kolen “Bwa” agobo yaikab yaitiet

¹ Atonone oldanyu ole aripse, ak atebe baragutab teekset ne koi, ak atobende si ageer kit ne mwawa inendet, ak kit ne awoljini agobo rirekyuk.

² Ak kiwolwa Jehovah, kolenja, Sir ng’ang’utiet ak iyai kotook eng’ tuguk che kisirei, si kobiit komuch kosoman chito ne labati.

³ Amu bo ng’ang’utiet betusiek che kiging’at, ak kochoktoi kotokyingei kagesunet, ama mwaei lembech: agot ngogagei, igen inye; amu nyonei iman, maigaegei.

⁴ Ogeero, kagomen muguleldanyi, ma litit inendet: ago sobei ne bo imanda eng’ kayanennyi.

⁵ Ee, kaberberindet divaik, ak ko chito ne ichaugei ne matebe ga; ne ibaroi magennyi ko u oldab che kigobek, ak u meet inendet, ak mabiyonyi, ago iyumjingei bororiosiek tugul, ak kobasyigei bik tugul.

⁶ Tos mamwaei bichuto tugul karagutiet agobo chichito, ak komwaei kalewenet ne sasisiei agobo inendet, ak komwaei kole, Bwa inendet ne tesyingei che ma che chik! Tianitu? Ak bwa inendet ne sutyingei tuguk che kiname besendo!

⁷ Tos mang’eetos eng’ chokyinet icheget che susin, ak kogos che iimin, ak iegu barunenikwak?

⁸ Amu kiiluul bororiosiek che chang’, luulin aginye bik tugul che ng’etunotin; amu korotikab bik, ak amu koromnatet ne kigiyachi emet, ak nganaset ak bik tugul che menyei oloto.

⁹ Bwa inendet ne taachei kelunet ne ya agobo gonnyi, si kobiit koteech keswennyi eng’ ole toror, si kobiit kesor eng’ eutab yaitiet!

¹⁰ Kiichob tewernatet agobo gong’ung’, ye kingibar che chang’, ak kiiyachi tengekto sobondang’ung’.

¹¹ Amu tun waachei koita eng’ inatut, ak kowol bambaniat eng’ ketik.

¹² Bwa inendet ne teege nganaset korotik, ak kogimite nganaset tengekto!

¹³ Ogeero, tos ma bo Jehovah ne bo lugosiek kole kobiisiechi bik mat, ak koiimgei bororiosiek buch?

¹⁴ Amu nyiiei ng’ony naetab torornatetab Jehovah, ko u ye nyiiei beek nyanjet.

¹⁵ Bwa inendet ne igochin chitab kokwennyi maiyek, inye ne itesyini ng’woneng’ung’, ak igochini kogeny kobogit, si kobiit igeer ichek komi ach ngor.

¹⁶ Kanyiin tewernatet ne kata torornatet: ee aginye, si iige ne ma kimuratan: kiweekyinin kikombetab eutab tai ne bo Jehovah, ak kotebe tewernatet ne samis torornateng’ung’.

¹⁷ Amu tuchin koromnatet ne kigiyachi Lebanon, koboto barisietab tiong’ik, ne kiigochi ichek koiyweis; amu korotikab bik, ak koromnatet ne kigiyachi emet, koboto nganaset ak bik tugul che menyei oloto.

¹⁸ Tilei nee kanamwet ne kigiwai, kot koyai musogindet; ak tilei nee kanamwet ne kitanyi, ak konetindetab lembechek, kot komang’ kitang’indet ne yaei, kot kotany kanamonik che matwegu?

¹⁹ Bwa inendet ne lenjin ketit, Kosu; ak ne lenjin koita ne matwegu, Ng’eet! Tos inetisiei nito? Ogeero, kigiliige tahabu ak feda, ama tinyei kabuset eng’ kwenunnyi, agot kitigin.

²⁰ Ago mi Jehovah hekalunnyi ne tilil: ingosis ng’ony komugul eng’ tainnyi.