HABAKUK 1 - BUKUIT NE TILIL

Kang’ung’unyetab maotiot amu Jehovah ne ma sib koyai kiy agobo yaitwogik

¹ Lautiet ne kigeer maotiot Habakuk.

² Ee Jehovah, aguursei kot kotianit, amegase? Arirjinin amu koromnatet, ago mesoru.

³ Amu nee si iborua tengekto, ak igona ageer kamaaset? Amu mi tainnyu ng’emisiet ak koromnatet: ak komi boriet ak kong’eetei tiyiet.

⁴ Kigochoriren ng’atutiet amu noto; ama komi kiruoget ne kiruochi: amu yiemei kiptengekyot chito ne bo iman; kiruochi anyun kiruoget kimaasi.

King’eeti Kaldeik kobir Juda

⁵ Ogeer, okwek kwenutab bororiosiek, ak obwat, ak okwong’ie mising’: amu ayae boisiet eng’ betusiekwok, ne moyani agot ngemwawok.

⁶ Amu, keero, ang’eeti Kaldeik, bororiet ne korom ne choktoi; che bunei kwenutab emet, si konam meng’otosiek che ma chechuak kobunji.

⁷ Imuisei ichek, ak kiywei: mong’une icheget kiruogenywa ak tororindanywa.

⁸ Chepcheben kogeny mbartanyisiekwak kosiir cheblangok, ak ko koromen kosiir suik che bo koskoleny; ak kobortogei bikwak che lanyei mbartanyisiek: ee, bunu bichoto ole loo; tirirendos ko u kipsichit ne choktoi kowendi koamisiei.

⁹ Bwanei tugul agobo koromnatet; tokyin togochikwak eng’ kimnatet ko u usonetab kong’asis; ak koyumi luulenik ko u ng’aniek.

¹⁰ Ee, chotei laitorinik, roriot bounik eng’ inendet: rorechin irimet age tugul; amu iyumi temburiek, ak koib.

¹¹ Iwiktogei ko u usonet, ak kosiirto, ak konam ng’ogisto: inendet ne cheptalelinnyi kimnatennyi.

Ing’unyng’unyi maotiot amu kolgolietab Kaldeik

¹² Tos, mebo koigeny, inye, ee Jehovah Kamuktaindennyu, Inendet ne Tilil ne nenyu? Magibegu. Ee Jehovah, kiichopchi inendet kiruoget; ak ee inye Ruandet, kiigimit inendet si kobiit kitigon.

¹³ Inye ne itinye konyek che tililen kot ko mechame igeer yaitiet, amechame igeer kamaaset, amu nee anyun si igeere che yaei kaberberisiet, ak isise ye igeere kiptengekyot kolugui chito ne bo iman kosiir inendet;

¹⁴ ak igochini bik koigei njirenikab nyanjet, koigei tuguk che ichuutegei, che matinyei bounindet?

¹⁵ Name ichek tugul katet ne u kombet, name ichek regereiywondennyi ne kiname njirenik, ak koyumji regereiywondennyi ne o: baibaitu anyun ak kogasgei.

¹⁶ Eng’jin anyun regereiywondennyi ne kiname njirenik, ak kobeeljin nyamdutik regereiywondennyi ne o; amu nyorune choto tugukyik che miach, ak amitwogikyik che chang’.

¹⁷ Tos tumdoi anyun tuguk che mi regereiywondennyi, ama bagaktoi inendet kobar bororiosiek kotugul?