GALATYEK 6 - BUKUIT NE TILIL

Kotigonutik che boisiei kotugul

¹ Che kitupche, agot ngenyorji chi lelutiet, ko okwek che o bo Tamirmiriet, oweegu chito ne u noto eng’ tamirmiriet ne bo mutyonet; ak iripge, si ma kiyomin aginye.

² Otoretge eng’ nyalilwogik, oyae kosulda ng’atutikab Kristo.

³ Amu ngot kobwategei chi kole a kiy, ago kaga ma kiy, koberberegei inegei.

⁴ Ago ingotiem chi age tugul boisiennyi, si konyor anyun kit ne ilosunegei inegei, ak ma eng’ chito age.

⁵ Amu laei chi tugul milennyi inegei.

⁶ Ago ingoyamda tuguk tugul che miachen inendet ne kineti ng’olyot, ak inendet ne inetisiei.

⁷ Amat kegenak; magigengenie Jehovah; amu kit age tugul ne kolei chi, kotun kesei noto agine.

⁸ Amu inendet ne koljin bortanyi kotun kesei eng’ borto ng’emisiet; ago inendet ne koljin Tamirmiriet kotun kesei eng’ Tamirmiriet sobondo ne bo koigeny.

⁹ Among’ keng’etye ye kiyae boisionik che miach: amu tun kigese ko kait betunnyi ngo magitanuise.

¹⁰ Noto anyun, ko u ye kitinye boroindo, ko ongeyachi bik tugul ne mie, ago ne siirei ko icheget che bo gotab kayanet.

Ng’alek che bo let

¹¹ Ogeer anyun sirutik che eechen che kaasirunenak eng’ eunnyu anege.

¹² Tugul che te che machei telunatet eng’ borto, kobirjinok kole kimuratanak; ago si magiusaus ichek agobo kimurtoiyotab Kristo.

¹³ Agot icheget che kimuratani, ko maribei Ng’atutiet; ago machei kole kimuratanak, si kolosunegei borwekwok.

¹⁴ Ago ingolooit eng’ ane alosge, kobate eng’ kimurtoiyot ne bo Kiptaiyandennyo Jesu Kristo, ne eng’ noto ko kigigartat ng’ony agobo ane, ak ane agobo ng’ony.

¹⁵ Amu ma kiy kamuratanet, anan ngo ma kimuratan, ago yautiet ne leel.

¹⁶ Ak ingotebe kalyet ichek tugul che bendoti eng’ ng’atutioni, ak rirenetab ge, ak eng’ Israel ne bo Jehovah.

¹⁷ Koboch nguno ko matata konyalila chi: amu aiboti eng’ bortanyu berutikab Jesu.

¹⁸ Che kitupche, ingoteb koboto tamirmirikwok mieindab Kiptaiyandennyo Jesu Kristo. Amen.