GALATYEK 5 - BUKUIT NE TILIL

¹ Kiitiachech Kristo eng’ katiaget; otononse komie anyun, amatata keratak kogeny eng’ chogitab otwoknatet.

Kanyolji kolewen Kristo anan Ng’atutik

² Ogeero, amwawok ane Paulo, ale, ngimuratanak, ko motinye keluno eng’ Kristo.

³ Ee, abaorianjini kogeny chi age tugul ne kimuratani, ale, kiyaachei inendet koyai Ng’atutiet komugul.

⁴ Kaotoiye ak Kristo, okwek che omache kiityok imanda eng’ Ng’atutiet; kaobutye eng’ mieindo.

⁵ Amu kigeni kamang’unet ne bo imanda eng’ Tamirmiriet eng’ kayanet.

⁶ Amu eng’ Kristo Jesu ko matilei kiy kamuratanet, anan ngo ma kimuratan; ago kayanet ne boisiei eng’ chamnyet.

⁷ Kioruae komie; ng’o ne koranyak si mogas it imanit?

⁸ Mabunu kagaigaoni inendet ne kiguurok.

⁹ Igutu mermerek tutigin kererutiet komugul.

¹⁰ Atinye kamang’unet eng’ okwek eng’ Kiptaiyat, ale amoegu che tinyei kabwatutik che ter: ago inendet ne inyalilok konyoru kiruogennyi, agot ngo ng’o.

¹¹ Ago ane anyun, che kitupche, ngot ko ta aamdooti kamuratanet, ko kalya si ko ta keusausa? Ko kaga kigeisto anyun kanagutietab kimurtoiyot.

¹² Katamache anyun ale koistogei icheget che iluiluchok.

Kanyol koboi chamnyet katiaget

¹³ Amu okwek che kitupche, ko kigiguurjok katiaget; ago moboisie katiageng’wong’ koek boroindo ne bo borto, ago oboisiechige okwege eng’ okwege eng’ chamnyet.

¹⁴ Amu isuldoi Ng’atutik tugul eng’ ng’olyot agenge, noto ko ni; Cham chitab kokweng’ung’ ko u ole ichamdoige.

¹⁵ Ago ngot osusege ak oamege okwege, oripge si morumge.

Kandoet ne bo Tamirmiriet ne Tilil

¹⁶ Amu amwae anyun ale, Obendoti eng’ Tamirmiriet, si moyai magetab borto.

¹⁷ Amu machei borto mising’ kogirinda Tamirmiriet, ak machei Tamirmiriet kogirinda borto; amu kirindogei chuto tuwai; si moyai tuguk che omache.

¹⁸ Ago ngondoiywok Tamirmiriet, ko momite bounatetab Ng’atutiet.

¹⁹ Toogunotin anyun boisionik che bo borto, choto ko chu: sokset, simdo, maget ne ya agobo tuguk che yaach,

²⁰ saetab kanamonik, bonisiet, bunyondisiek, suriosiek, ng’etkonda, nereknatosiek, toiyosiek, kabesiosiek, pcheutik,

²¹ kong’ ne ya, bogitosiek, keiyandisiek, ak alak che u choto: kasib ateeywok agobo chu, ko u ye kisib ateeywok, ale icheget che yaei tuguk che u chuto ko manyoru bounatetab Jehovah.

²² Ago logoiyotab Tamirmiriet ko chamnyet, boiboiyet, kalyet, muitaet, talasiet, mieindo, atepto ne kiyani,

²³ kaming’inetab ge, ribetab ge: mami ng’atutiet ne esioi chuto.

²⁴ Ak icheget che bo Kristo Jesu ko kigogartat borto koboto magutikyik ak kasetab miat che bo choto.

²⁵ Ngot kesoptosi eng’ Tamirmiriet, ko ongebendoti anyun eng’ Tamirmiriet.

²⁶ Among’ kilosuge buch, among’ ketachatachge, among’ koamjechge ng’etkong’.