GALATYEK 4 - BUKUIT NE TILIL

Kiegu werikab Jehovah amu kiyani Kristo

¹ Ago amwae ale ye ta ko lakwa inendet ne tun namei tuguk, ko materjin inendet ak otwogin, agot nganda inendet ko kiptaiyatab tugul;

² ago mi eng’ eutab ng’atik ak ribik agoi koit betut ne king’atyi kwanda.

³ Ki u noto ak achek, kingota ko ki lagok, ko kigi ratotin eng’ konetisiosiek che bo tai che bo ng’ony:

⁴ ago ye kingoit betut ne kiyamgei, koyok Jehovah Werinnyi, ne kisich kobogoriot, kosich eng’ Ng’atutiet,

⁵ si kobiit kotiach ichek che kimi eng’ Ng’atutiet, si kobiit keyaech keegu werik.

⁶ Ak amu o werik, ko kiiyokyi Jehovah Tamirmirietab Werinnyi mugulelwekyok, ne rirei, kole, Aba, Kwanda.

⁷ Eng’ noto anyun ma ko i otwogindet kogeny, ago i werit; ak ngo i werit ko i namindet ne bo tuguk eng’ Jehovah.

Kogoigoi Paulo kayanik si ma weektagei let

⁸ Ago eng’ betunoto, kima ongen Jehovah, ko kio otwogikab icheget che kima ko cheptalelisiek che ma bo iman:

⁹ ago nguno ko kaonai Jehovah, anan ko kagonaak okwek Jehovah, amu nee anyun si oweektege let kogeny oweekyige konetisiosiek che bo tai che nyalulyotin ak che bo bananda, eng’ choto omache oweekyige otwoknatenywa kogeny?

¹⁰ Oribe betusiek, ak arawek, ak ole teptoi betusiekab kenyit, ak kenyisiek.

¹¹ Aiyweisiei agobo okwek, si maegu ne kiabirtege buch eng’ or age tugul agobo okwek.

¹² Asomok mising’, che kitupche, ale otebi ko u ane, amu ane a u okwek. Kima oyaiywa ne ya:

¹³ ago ongen ole kiaamwok logoiywek che miach eng’ tai, amu nyalulnatetab borto:

¹⁴ ak kima osas yomset ne kiotinye agobo bortanyu, ama oesie; ago kiotaacha ko u malaikaiyatab Jehovah, ko u Kristo Jesu.

¹⁵ Mi ano anyun boiboiyonotong’wong’? Amu abaorianjinok, ale, nda kiimugaksei, ta kiobalu konyekwok ak ogona.

¹⁶ Ara anyun tos kaaegu bunyondeng’wong’, amu kamwawok ne bo iman?

¹⁷ Igiiljinogei kocheng’ok eng’ oret ne ma mie: ee, machei kole kogerjok sang’, si kobiit ocheng’ ichek.

¹⁸ Ago mie oegu che kicheng’ok eng’ kagiiletab ge betusiek tugul agobo kit ne mie, ak ma ye ami kobotok kityo.

¹⁹ Lagokyuk che mengech, che anyorunenok ng’wanindo ne bo siget kogeny agoi koyaak Kristo eng’ okwek,

²⁰ ee, katamache ale nda kami kobotok nguno, ak awal kutinnyu; amu aiimige agobo okwek.

Kaborunet ne bunu Arorutiet ne bo Keny

²¹ Omwawa, okwek che omache otebe bounatetab ng’atutik, tos mogase Ng’atutiet?

²² Amu kigisir kele, Kitinyei Abraham werik aeng’, age eng’ chepto ne otwogin, ak age eng’ kobogoriot ne itiagat.

²³ Ago kigisich eng’ borto inendet ne bo chepto ne otwogin; ago kigisich eng’ arorutiet inendet ne bo kobogoriot ne itiagat.

²⁴ Tuguchuto ko kalewenet: amu chuto ko arorutik aeng’; kibunu age tulwetab Sinai, ne sichei lagok eng’ otwognatet, noto ko Hagar.

²⁵ Ak Hagar nito ko tulwetab Sinai eng’ Arabia, ak iboru Jerusalem ne bo nguno: amu mi eng’ otwognatet koboto lagokyik.

²⁶ Ago Jerusalem ne mi barak kotiagat, ne noto ko kamennyo.

²⁷ Amu kigisir kele, Baibaitu, inye ne i son ne meyie; Yaas ak iwaach, inye ne megase ng’wanindab sigisiet: Amu chang’ lagokab inendet ne mi inegei kosiir che bo inendet ne tinyei manong’otiot.

²⁸ Achek anyun, che kitupche, ko ki lagokab arorutiet, ko u Isak.

²⁹ Ago anyun, ko u inendet ne kigisich eng’ borto, ko kius inendet ne kigisich eng’ Tamirmiriet ko u noto anyun agot nguno.

³⁰ Ago mwaei nee sirutik? On kobogoriondoni otwogin ak werinnyi: amu manamei tuguk weritab kobogoriot ne otwogin koboto weritab kobogoriot ne itiagat.

³¹ Noto anyun, che kitupche, ma ki lagokab kobogoriot ne otwogin, ago ki bo kobogoriot ne itiagat.