GALATYEK 3 - BUKUIT NE TILIL

Iitying Jehovah chi imanda eng’ kayanet, ma eng’ Ng’atutik

¹ Ee Galatiechu berberen, ng’o ne kibanak, okwek che kiginde Jesu Kristo taitab konyekwok kotook kele kigigartat?

² Ni kityo ne amache anetenage, Kiotaach Tamirmiriet eng’ boisionikab Ng’atutiet, anan eng’ kaset ne bo kayanet?

³ Tos kaga o berberen ko u noto? Ngo kiotau eng’ Tamirmiriet, omache nguno oegu che ogesunotingei eng’ borto?

⁴ Tos kionyalilse eng’ tuguk che chang’ buch? Ngot ko buch iman.

⁵ Tos inendet anyun ne konok Tamirmiriet, ak koyaei kwong’utik eng’ kwenung’wong’, ko tos yaei eng’ boisionikab Ng’atutiet, anan eng’ kaset ne bo kayanet?

⁶ Agot ko u ye kiiyan Abraham Jehovah, ak kigiityi inendet kobunji imanda.

⁷ Ongen anyun ole icheget che bo kayanet, ko werikab Abraham choto.

⁸ Ak kiisib kogeer sirutiet kole iityin Jehovah imanda Bororiosiek eng’ kayanet, ko kiisib koamji logoiywek che miach Abraham, kolenji, Kiberuri bororiosiek tugul eng’ inye.

⁹ Noto anyun, kiberuri icheget che bo kayanet koboto Abraham ne iyanat.

¹⁰ Amu tugul che mi eng’ boisionikab Ng’atutiet, komitei eng’ chubet: amu kigisir kele, Chubot chi age tugul ne matebyei eng’ tuguk tugul che kigisir eng’ bukuitab Ng’atutiet, kele koyai choto.

¹¹ Toogu anyun kele, mami chi ne kiityin imanda eng’ Ng’atutiet eng’ taitab Jehovah: amu, Sobei ne bo imanda eng’ kayanet;

¹² ak ma bo Ng’atutiet kayanet; ago, Inendet ne yaei choto kosobei eng’ choto.

¹³ Kiitiachech Kristo eng’ chubisietab Ng’atutiet ye kiek inendet chubet agobo achek: amu kigisir kele, Chubot chi age tugul ne kisonginini eng’ ketit:

¹⁴ si kobiit konyonji Bororiosiek kaberuretab Abraham eng’ Kristo Jesu; si kobiit ketaach arorutietab Tamirmiriet eng’ kayanet.

¹⁵ Che kitupche, amwae ko u biteetab chi: Agot ngo arorutietab chi noto, ko ye kagigimit, ko mami chi ne walei koek buch, anan kotesyi.

¹⁶ Kigimwachi anyun Abraham arorutichoto, ak keswondennyi. Mamwaei kole, Igochin keswekyik, ko u ye kachang’a; ago ko u agenge, kole, Ak eng’ keswondeng’ung’, noto ko Kristo.

¹⁷ Amwae ni anyun ale; Kayomiset ne kisib kogimit Jehovah, noto Ng’atutiet ne kinyonei ko kagobata kenyisiek bogol ang’wan ak sosom, ko mawalei koek buch, kele, si koyai arorutiet koek ne matilei kiy.

¹⁸ Amu ngo bunu borotet Ng’atutiet, ko ma ko bo arorutiet anyun: ago kiigochi Jehovah Abraham eng’ arorutiet.

Kigigon Ng’atutik amu nee?

¹⁹ Nee anyun Ng’atutiet? Kigites amu bistautik, agoi koit keswot oldab inendet ne kiga kichopchi arorutionoto; ak kiging’at eng’ malakaisiek eng’ eutab katuiyoindet.

²⁰ Katuiyoindet anyun ko ma bo agenge; ago Jehovah ko agenge.

²¹ Tos kirindoi Ng’atutiet arorutikab Jehovah? Achicha, ma u noto: amu nda kiga kigon Ng’atutiet ne imuchi kosoob, ta kibunjin imanda Ng’atutiet.

²² Ago kigoratyi sirutiet tuguk tugul kimnatetab tengekto, si kobiit kigochi che iyani, arorutiet eng’ kayanet eng’ Jesu Kristo.

²³ Ago ye kitomo konyo kayanet, ko kigiribech eng’ Ng’atutiet. Kiga kiratech agoi koit kayanet ne kitun keng’any eng’ let.

²⁴ Kiek anyun Ng’atutiet konetindennyo ne imutyinech Kristo, si kobiit kiityech imanda eng’ kayanet.

Kit ne biitune kayanet

²⁵ Ago nguno anyun, ko kagonyo kayanet, ko ma koboiywech konetindet.

²⁶ Amu okwek tugul ko o werikab Jehovah, eng’ kayanet, eng’ Kristo Jesu.

²⁷ Amu che te eng’ okwek che kigibatisanjok Kristo ko kiolaach Kristo.

²⁸ Ma imugaksei kele mi Yahudiot anan Yunanindet, ama mi otwogindet anan ne itiagat, ama mi ne muren anan ne tie: amu okwek tugul ko o agenge eng’ Kristo Jesu.

²⁹ Ak ngot o bo Kristo, ko o keswekab Abraham anyun che namei tuguk ko u eng’ arorutiet.