GALATYEK 2 - BUKUIT NE TILIL

Ko naaksei eng’ Jerusalem ng’olyot ne kigiyoktoe

¹ Kingobata anyun kenyisiek tamanu ak ang’wan atogoste kogeny awe Jerusalem koboto Barnaba, amuti Tito agine.

² Ak kiatogoste eng’ ng’ang’utiet; ak kiatetyi ichek logoiywek che miach che aamdooti eng’ kwenutab Bororiosiek, ago eng’ ung’ot eng’ icheget che toogunotin, si maegu, eng’ or age tugul, ne alabati buch, anan ne kialabat buch.

³ Ago ma kibirji Tito, ne Yunanindet, ne kimi kobota, kele kimuratan:

⁴ amu tupchosiek che bo lembech che kigimut kobwa orit eng’ ung’ot, che kimong’ eng’ ung’ot kosegei katiagennyo ne kitinye eng’ Kristo Jesu, si kobiit kondeech otwoknatet:

⁵ eng’ icheget che kima kigas it, agot eng’ sait agenge; si kobiit kotebi imanitab logoiywek che miach kobotok.

⁶ Ago icheget che kigiiti kele toogunotin (ngo u ole teptoi ichek, ko ma kiy eng’ ane: matiytii Jehovah chi) - amwae ale, ma teswa kiy icheget cho toogunotin.

⁷ Ago ye kingogeer ichek kole kigigona arib logoiywek che miach agobo icheget che magimuratani, ko u Petero agine eng’ che kimuratani

⁸ (amu inendet ne kiimuktochi Petero koek ne kiyoktoi eng’ che kimuratani, ko kiimuktawa agane ko u noto agobo Bororiosiek);

⁹ ak ye kingonai Jakobo ak Kepa ak Johana, icheget che kigiit kele tolochik, mieindo ne kigigona, kogona ak Barnaba eutab tai en bo yamdaet, si kobiit kebe oldab Bororiosiek, koba ichek oldab che kimuratani;

¹⁰ kobate kimakwech ichek kibwat kibananok; kioto ne kiating’e kagiiletab ge agane ale ayai.

Kogirindoi Paulo Petero

¹¹ Ago ye kingonyo Kepa Antiokia, agirinde inendet kimni, amu kinyoljin inendet kiruoget.

¹² Amu ye kitom kobwa alage che kibunu gab Jakobo, ko kiamisiei ak Bororiosiek: ago ye kingobwa, koweektagei let kotabangei, koiywei icheget che bo kamuratanet.

¹³ Ak kiiberberisiei Yahudik alage agichek koboto inendet; kot kotito Barnaba agine eng’ kaberberisienywa.

¹⁴ Ago ye kingageer ale mabendoti eng’ lititindo ko u imanitab logoiywek che miach, amwachi Kepa eng’ tainywa tugul, alenji, Ngot ko inye, ne i Yahudiot, itebye ko u Bororiosiek, ak ma ko u Yahudik, ibirjindoi ano Bororiosiek koigei Yahudik?

Maigesunotgei Ng’atutik

¹⁵ Achek che ki Yahudik eng’ siget, ama ki kiptengeginik che bo Bororiosiek,

¹⁶ ago kingen kele magiityin chi imanda eng’ boisionikab ng’atutik, ago eng’ kayanet eng’ Jesu Kristo, kigiyan agachek eng’ Kristo Jesu, si kobiit kiityech imanda eng’ kayanet eng’ Kristo, ama eng’ boisionikab Ng’atutiet: amu magiityin chi imanda eng’ boisionikab Ng’atutiet.

¹⁷ Ago, ye kita kecheng’e kiityech imanda eng’ Kristo, kenyoruech ak achek kele ki kiptengeginik, tos Kristo ko kiboitiotab tengek? Achicha, ma u noto.

¹⁸ Amu ngot ateech kogeny tuguchoto che kiga abut, ko kabartege ale a bistoindet.

¹⁹ Amu ane, ko kiamechi Ng’atutiet eng’ Ng’atutiet, si kobiit asob eng’ Jehovah.

²⁰ Kigigartata koboto Kristo; ago asobe; ago ma ko ane, ago sobei Kristo eng’ ane: ak sobondo ne asobe nguno eng’ borto asobe eng’ kayanet ne mitei eng’ Weritab Jehovah, ne kichama, ak kiigoitogei agobo ane.

²¹ Mawale mieindab Jehovah koek buch; amu nda bunu imanda Ng’atutiet, ko kime Kristo buch.