GALATYEK 1 - BUKUIT NE TILIL

Kagatet

¹ Paulo, ne kiyoktoi (ma ne bo bik, ama kiyok eng’ chi, ago eng’ Jesu Kristo, ak Jehovah Kwanda, ne kiing’eet inendet komong’ eng’ che kibek),

² ak tupchosiek tugul che mi kobota, kisirjini kanisosiek che bo Galatia:

³ Ingoteb kobotok mieindo ak kalyet ne bunu Jehovah Kwanda, ak Kiptaiyandennyo Jesu Kristo,

⁴ ne kiigoitogei agobo tengekwogikyok, si kobiit kosoruech eng’ betusiechu yaachen, ko u magetab Jehovah nenyo ak ko Kwandanyo:

⁵ nenyi torornatet koigeny ak koigeny. Amen.

Ma baibait Paulo eng’ Galatiek

⁶ Akwong’e amu oistoige ochoktoi eng’ inendet ne kiguurok eng’ mieindab Kristo, obe oldab logoiywek che miach che ter;

⁷ che ma ter: kobate mi alage che iimok, ak machei kowal logoiywek che miach che bo Kristo.

⁸ Agot ngo achek, anan malaikaiyat ne bunu kipsengwet, ne tos amwok logoiywek alak tugul che miach che ter eng’ choto che kigeamwok, ko ingoek ne chubot inendet.

⁹ Ko u ye kiga kemwa eng’ tai, amwae nguno kogeny ko u noto ale, ngot koamwok chi age tugul logoiywek alak tugul che miach che ter eng’ choto kiotaach, ko ingoek ne chubot inendet.

¹⁰ Tos agoigoi nguno bik anan Jehovah? Anan acheng’e abaibai bik? Ngot ko ta aboiboi bik, ko ma a otwogetab Kristo.

Kibunu Kristo Logoiywek che Miach che kiamdoi inendet, ma bunu bik

¹¹ Amu aboruok anyun, che kitupche, agobo logoiywek che miach che kiaamdoi, ale mabunu chi.

¹² Amu kima ataach eng’ chi, ama kineta, ago eng’ ng’ang’utietab Jesu Kristo.

¹³ Amu kiogas agobo atebennyu eng’ betusiek che kigosiirto eng’ kayanetab Yahudik, ko u ye kiausausi kanisetab Jehovah kot kosiir, ak kiang’emang’emi:

¹⁴ ak kiatese tai eng’ kayanetab Yahudik kosiir siritoikyuk che chang’ eng’ bikab emennyu agiilige mising’ kosiir agobo bitonwekab kwanisiekyuk.

¹⁵ Ago ye kingocham Jehovah, ne kiitabana, koboch moetab kamennyu, ak koguura eng’ mieindanyi,

¹⁶ si kong’any Werinnyi eng’ ane, si kobiit aamda inendet eng’ Bororiosiek; kima king’alal anyun ak chi eng’ sainato:

¹⁷ ama atogoste Jerusalem ole mi ichek che kisib koek che kiyoktoi eng’ ane: ago kiawe Arabia; ak kiaweege agoi Damasko.

¹⁸ Kingogesgei anyun kenyisiek somogu atogoste awe Jerusalem si aborjige Kepas, ak abeni oldanyi betusiek taman ak mut.

¹⁹ Ago ma ageer alak eng’ che kiyoktoi, kobate Jakobo ne tupcho ak Kiptaiyat.

²⁰ Ara anyun, eng’ tuguk che asirwok, ogeero, eng’ taitab Jehovah ko mamwae lembech.

²¹ Yeityo anyo korotinwekab Suria ak Kilikia.

²² Ak kitom kogeera togoch kanisosiekab Judea che kimi eng’ Kristo:

²³ ago kigas kemwaei kityo kele, Inendet ne kiusech eng’ betusiek alak koamdoi nguno kayanonato king’emang’emi;

²⁴ ak kiitoror ichek Jehovah eng’ ane.