EZRAH 9 - BUKUIT NE TILIL

Kong’anyei Esra tengekwogikab bik

¹ Kingo kagoyaak tuguchu, korik kandoik ole ami, kole, Ma itabanegei bikab Israel ak tisiik ak Lawik bikab emotinwek, yaei tuguk che kiwechei, che bo Kananik, Hitik, Perisik, Jebusik, Amonik, Moabik, Misrik, ak Amorik.

² Amu kigotun tibikwak ak kotunji werikwak; kot koburuigei keswot ne tilil ak bikab emotinwek, ee, che kiindochin bistoonito ko ki kandoik ak bounik.

³ Ak kingagas ng’olyondoni, abet ngoriennyu ne bo orit ak ne bo barak, ak ang’ei sumeekyuk ak atut tamnennyu, ak atebi ng’ony akwong’.

⁴ Kiiyumjagei anyun chi age tugul ne kibotani agobo ng’alekab Kamuktaindetab Israel, agobo bistoetab che kiga kiluul; ak atebi ng’ony akwong’ kot koit kagoitoetab kagochinetab koskoleny.

⁵ Ak kiang’eet eng’ kaming’inennyu bo ge ye kigigoitoi kagochinetab koskoleny, ko kaabet ngoriennyu ne bo orit ak ne bo barak; ak kiagutuny, ak aiitochi eunekyuk Jehovah Kamuktaindennyu;

⁶ ak ale, Ee Kamuktaindennyu, alilani mising’ ak kagowalak togennyu kot ko mamuch anyalin, inye, Kamuktaindennyu: amu kogotesak tengekwogikyok kot ko maluuchech ak kigoeet ng’ogistanyo kot koit kipsengwetisiek.

⁷ Kigeegu kiptengeginik mising’ koboch betusiekab kwanisiekyok agoi rani; ak kigindeech eunekab laitorinik che bo emotinwek, agobo tengekwogikyok achek, ak laitorinikyok, ak tisiikyok, kebarech eng’ rotwetab chok, keluulech, ak ng’emisiet, ak kalilanet, ko u rani.

⁸ Kagiboruech anyun nguno eng’ boroini ming’in mieindo ne bunu Jehovah Kamuktaindennyo, kot kotuukwech alak kochililso, ak kogonech tigongiot eng’ oldanyi ne tilil, si kokweng’wech konyekyok Kamuktaindennyo, ak kogonech kasoobet ne ming’in eng’ ratisiennyo.

⁹ Amu ki otwogik; ago ma bagakyech Kamuktaindennyo ratisiennyo, ago kiityech rirenet eng’ taitab laitorinikab Persia, si kogonech kasoobet, si kelumda gotab Kamuktaindennyo, ak keteech ole kigong’emak eng’ goyoto, ak kegonech irimet eng’ Juda ak Jerusalem.

¹⁰ Ara anyun, ee, Kamuktaindennyo, ta kemwae nee kogeny? Amu kigemete ng’atutiguk,

¹¹ che kigeng’at eng’ otwogiguk maotik, ile, Ma tilil emet ne obendi oname kobunjok, amu simwekab bik che bo emotinwek, eng’ tugukwak che kiwechei che kigonyiit ng’wanindanywa emet kong’eete tabanda age agoi tabanda age.

¹² Amogochi anyun tibikwok werikwak, anan kotun werikwok tibikwak, anan ocheng’ kalyenywa anan ko borotenywa koigeny: si kobiit ogimegitu, ak oam ruratetab emet, ak obagakyi lagokwok koek borotenywa koigeny.

¹³ Ak amu kigobwanjech choto tugul amu boisionikyok che yaach, ak ng’ogistanyo ne o, amu ma ibirech inye Kamuktaindennyo ko u ye yamegei ak tengekwogikyok, ak kiigonech chu ng’etunotin,

¹⁴ tos, kibut kogeny ng’atutiguk, ak kenamge ak bik che yaei tuguchu kiwechei? Ko tos menerekyinech kot igeswech, kot ko mami che ng’etu, anan che chilildos?

¹⁵ Ee Jehovah, Kamuktaindetab Israel, i bo iman; amu ki bik che kigeng’etu, che kichililso, ko u rani: keero, kimi taing’ung’ eng’ ng’ogistanyo; amu mami ne imuchi kotonon eng’ taing’ung’ amu nito.