EZRAH 8 - BUKUIT NE TILIL

Kiboitinik koboto Esra

¹ Chu ko kandoikab gorikab kwanisiekwak, ak chu ko tetutikab ibinwekwak che kigosiirto, che kigitogosu tugul eng’ Babulon, eng’ betusiekab laitornatetab laitoriat Artaserses.

² Eng’ werikab Pineas, ko Gersom: eng’ werikab Itamar, ko Daniel: eng’ werikab Daudi, ko Hatus.

³ Eng’ werikab Sekania, eng’ werikab Paros, ko Sekaria: ak kigiitito inendet murenik bogol ak konom eng’ tetutikab ibinwek che kigosiirto.

⁴ Eng’ werikab Pahat-moab, ko Eliehoenai weritab Seraia; ak kimi koboto inendet murenik bogolwogik aeng’u.

⁵ Eng’ werikab Sekania ko weritab Jahasiel; ak kimi koboto inendet murenik bogolwogik somogu.

⁶ Ak eng’ werikab Adin, ko Ebed weritab Jonatan; ak kimi koboto inendet murenik konomu.

⁷ Ak eng’ werikab Elam, ko Jesaia weritab Atalia; ak kimi koboto inendet murenik tamanwogik tisabu.

⁸ Ak eng’ werikab Sepatia, ko Sebadia weritab Mikael; ak kimi koboto inendet murenik tamanwogik sisiitu.

⁹ Eng’ werikab Joab, ko Obadia weritab Jehiel; ak kimi koboto inendet murenik bogolwogik aeng’u ak taman ak sisiit.

¹⁰ Ak eng’ werikab Selomit, ko weritab Josipia; ak kimi koboto inendet murenik bogolut agenge ak tamanwogik lo.

¹¹ Ak eng’ werikab Bebai, ko Sekaria weritab Bebai; ak kimi koboto inendet murenik tiptemu ak sisiit.

¹² Ak eng’ werikab Asgad, ko Johanan weritab Hakatan; ak kimi koboto inendet murenik bogolut agenge ak taman.

¹³ Ak eng’ werikab Adonikam, che bo let; ak chu kainaikwak, Elipelet, Jeuel, ak Semaia, ak kimi koboto ichek murenik tamanwogik lo.

¹⁴ Ak eng’ werikab Bigbai, ko Utai ak Sabud; kimi koboto ichek murenik tamanwogik tisabu.

¹⁵ Ak kiayumji ichek ainet ne rootyin Ahaba; ak kigitebe yoto betusiek somok: ak kiageerote bik, ak tisiik, ak ma anyoru werikab Lawi.

¹⁶ Kiayokte anyun keguur Elieser, Ariel, Semaia, Elnatan, Jarib, Elnatan, Natan, Sekaria, ak Mesulam, bik che eechen; ak kogeny Joiarib, ak Elnatan, che ki konetik.

¹⁷ Ak kiayokte ichek koba oldab Ido ne ki o eng’ ole kiguure Kasipia; ak amwachi kit ne kanyol komwachi Ido, ak tupchosiekyik Netinik, eng’ komosato bo Kasipia, si komutwech kiboitinik che bo gotab Kamuktaindennyo.

¹⁸ Ak ko u ye kimi kobotech eut ne mie ne bo Kamuktaindennyo, komutwech chito ne tinyei naet, ne bo werikab Mali, weritab Lawi, weritab Israel; ak Serebia, koboto werikyik ak tupchosiekyik, taman ak sisiit;

¹⁹ ak Hasabia, ak kimi koboto inendet Jesaia ne bo werikab Merari, tupchosiekyik ak werikwak, tiptem:

²⁰ ak eng’ Netinik, che kiga konde Daudi ak bounik agobo otisietab Lawik, Netinik bogol aeng’ ak tiptem: kigimwa tugul eng’ kainaikwak.

²¹ Ang’at anyun karugutetab ge, eng’ ainetab Ahaba, si kobiit kiming’inge eng’ taitab Kamuktaindennyo, kecheng’ eng’ inendet oret ne litit, eng’ achek, ak lagokyok, ak ne bo tugukyok tugul.

²² Amu kialilan asom laitoriat kweanet ne bo askarik, ak bik che lanyei mbartanyisiek si kotoretech kegirinde bunik che mi oret: amu kiga kemwachi laitoriat, kelenji, Mi eutab Kamuktaindennyo koboto ichek tugul che cheng’ei inendet, koyachi ne mie; ago kirindoi kimnatennyi ak nereknatennyi bik tugul che metoi inendet.

²³ Kigirugutge anyun ak kesa Kamuktaindennyo agobo nito; ak kigaswech.

²⁴ Kiataban anyun taman ak aeng’ che eechen eng’ tisiik, icheget ko ki Serebia ak Hasabia, ak kimi koboto ichek tamanu eng’ tupchosiekwak,

²⁵ ak kiagerji ichek feda, ak tahabu, ak terenik, ak kagochinetab gotab Kamuktaindennyo, che kiga kogon laitoriat, ak kiruogikyik, ak bounikyik, ak Israel tugul che kimi yoto:

²⁶ kiagerji ichek talentaisiek bogol lo ak konom che bo feda, ak tuguk che bo feda che yamei talentaisiek bogol; ak tahabu che yamei talentaisiek bogol;

²⁷ ak tabok tiptem che bo tahabu, che yamei darkoni elfut agenge; ak terenik aeng’ che bo sugunonik, che miachen, che lilei bich, che tinyei kamanutiet ne u ne bo tahabu.

²⁸ Ak kialenji ichek, O tililen eng’ Jehovah, ak ko tililen terenik; ak feda ak tahabu ko kagochinoikab chamnyet che kigochin Jehovah Kamuktaindetab kwanisiekwok.

²⁹ Oripse, ak orib tuguchoto, agoi ogeer eng’ taitab che eechen eng’ tisiik ak Lawik, ak bounikab gorikab kwanisiekwok che bo Israel, eng’ Jerusalem, eng’ gorik che bo orit eng’ gotab Jehovah.

³⁰ Kitaach anyun tisiik ak Lawik ole ki te nyigisindab feda ak tahabu, ak terenik, si koib kobwa Jerusalem gotab Kamuktaindennyo.

³¹ Kebe anyun eng’ ainetab Ahaba eng’ betutab taman ak aeng’ ne bo arawet ne bo tai, kebe Jerusalem: ak kimi kobotech eutab Kamuktaindennyo, ak kisoruech eng’ eutab bunyot, ak ne kisapchinech eng’ oret.

³² Ak kigibwa Jerusalem, ak ketebe yoto betusiek somok.

³³ Ak eng’ betut ne bo ang’wan ko kigiger feda ak tahabu ak terenik eng’ gotab Kamuktaindennyo, kigigochi Meremot weritab Uria tisiindet; ak kimi koboto inendet Eleasar weritab Pineas; ak kimi koboto ichek Josabad weritab Jesua, ak Noadia weritab Binui, Lawik;

³⁴ kigiit tuguk tugul ak keger: ak kigisir ole ki te nyigisindo eng’ betunoto.

³⁵ Kiigoito lagokab luulenik, che kiweeksei eng’ ole kigiluulji, kagochinoik che kibeelei, kogochi Kamuktaindetab Israel, kirugik taman ak aeng’ agobo Israel tugul, mengichik tamanwogik sogol ak lo, arekab kechir tamanwogik tisab ak tisab, kwesik taman ak aeng’, koek kagochinetab tengekto: kiek chuto tugul kagochinet ne kibeeljin Jehovah.

³⁶ Ak kiigochi ng’atutikab laitoriat kandoikab laitoriat ak bounik che mi ainet bitonin: ak kitoret bik ak gotab Kamuktaindet.