EZRAH 7 - BUKUIT NE TILIL

Kowendi Esra Jerusalem koga kochamji laitoriat Artaserses

¹ Ak kingobata tuguchu, eng’ laitornatetab Artaserses laitoriatab Persia, kotogosta Esra weritab Seraia, weritab Asaria, weritab Hilkia,

² weritab Salum, weritab Sadok, weritab Aitub,

³ weritab Amaria, weritab Asaria, weritab Meraiot,

⁴ weritab Seraia, weritab Usi, weritab Buki,

⁵ weritab Abisua, weritab Pineas, weritab Eleasar, weritab Aron tisiindet ne o:

⁶ kotogosta anyun Esra nito eng’ Babulon; ak ki sirindet ne ng’om eng’ Ng’atutikab Musa, che kiga kogochi Jehovah, Kamuktaindetab Israel: ak kichamji laitoriat somennyi tugul, ko u ye kimi eutab Jehovah Kamuktaindennyi, baragunnyi.

⁷ Ak kitogosta alak che bo lagokab Israel, ak che bo tisiik, ak Lawik, ak tienik, koboto ribikab kurgotik, ak Netinik, kobwa Jerusalem, eng’ kenyit ne bo tisab ne bo laitoriat Artaserses.

⁸ Ak kiit Esra Jerusalem eng’ arawet ne bo mut, ne ki kenyit ne bo tisab ne bo laitoriat.

⁹ Amu kitoi kotogos eng’ Babulon eng’ betut ne bo tai ne bo arawet ne bo tai, ak eng’ betut ne bo tai ne bo arawetab mut, koit Jerusalem, ko u ye kimi ak inendet eut ne mie ne bo Kamuktaindennyi.

¹⁰ Amu kiga kogiil Esra muguleldanyi kocheng’ ng’atutikab Jehovah, ak koyai, ak konet eng’ Israel kayomisutik ak kiruogutik.

¹¹ Chu ng’alek che bo baruet ne kiigochi laitoriat Artaserses Esra tisiindet, ak ko sirindet, sirindetab ng’alekab ng’atutik che bo Jehovah, ak ko bo kayomisutik che kiigochinoti Israel:

¹² Ane, Artaserses, laitoriatab laitorinik, asirjini Esra tisiindet, sirindetab ng’atutikab Kamuktaindetab kipsengwet, ne igesunotgei ak ko u noto.

¹³ Kang’at ale, Oba, tugul ak tugul che bo bikab Israel ak Lawik, che mi bounatennyu, che chamei koba Jerusalem eng’ magenywa.

¹⁴ Amu kagoyokten laitoriat ak kiruogikyik tisab iwe iteeb agobo Juda ak Jerusalem, ko u ng’atutietab Kamuktaindeng’ung’ ne mi koboten;

¹⁵ ak iib feda ak tahabu, che kiigochi laitoriat ak kiruogikyik Kamuktaindetab Israel eng’ chamnyet, ne mi meng’otennyi, Jerusalem,

¹⁶ koboto feda tugul ak tahabu che inyorjini emet tugul ne bo Babulon, koboto kagochinet ne bo chamnyet ne bo bik ak ne bo tisiik, kogoitoi eng’ chamnyet agobo gotab Kamuktaindenywa ne mi Jerusalem;

¹⁷ noto anyun ial eng’ fedaisiechu eng’ kagiiletab ge, kirugik, mengichik, arekab kechir, koboto kagochinoikwak che bo busiek ak kagochinoikwak che kieei, ak igoite choto eng’ kaptisisietab gotab Kamuktaindeng’wong’ ne mi Jerusalem.

¹⁸ Ak kit age tugul ne igeere inye ak tupchosieguk ole mie oyae fedaisiek tugul che kang’et, ak tahabu, oyae ko u magetab Kamuktaindeng’wong’.

¹⁹ Ak igoite eng’ taitab Kamuktaindetab Jerusalem terenik che kigonin agobo otisietab gotab Kamuktaindeng’ung’.

²⁰ Ak kit age tugul ne ta kemakyin gotab Kamuktaindeng’ung’, ne kanyol igoite, igoite eng’ tuguk che konorotin che bo gotab laitoriat.

²¹ Ang’ate ane, laitoriat Artaserses, konoraik tugul che bo tuguk, che mi ainet bitonin, ale, kit age tugul ne ta komagenok Esra tisiindet, sirindetab ng’atutikab Kamuktaindetab kipsengwet, keyai eng’ kagiiletab ge,

²² kot koit talentaisiek bogol che bo feda, ak kerutik bogol che bo nganok, ak divaik che yamegei ak debeisiek bogol aeng’, ak mwanik che yamegei ak debeisiek bogol aeng’, ak munyuk che ma kimwa ole te.

²³ Ak kit age tugul ne ng’atei Kamuktaindetab kipsengwet, koyaak ko u noto agobo gotab Kamuktaindetab kipsengwet, amu nee si ko tos nyonji nereknatet bounatetab laitoriat ak werikyik?

²⁴ Kiboruok kogeny kele, ma chamdaat eng’ ng’atutik kogoito kodi, anan aisurut, anan ko aisurut ne bo tuguk, age tugul eng’ tisiik ak Lawik, ak tienik, ak ribikab kurgotik, ak Netinik, anan ko otwogikab gotab Kamuktaindet.

²⁵ Lewen inye Esra ko u ng’omnatetab Kamuktaindeng’ung’ ne mi eung’ung’, kiruogik ak bounik che imuchi koboi bik tugul che mi ainet bitonin, ichek tugul che ingen ng’atutikab Kamuktaindeng’ung’, ak onet inendet ne maingen.

²⁶ Ak age tugul ne machamei koyai ng’atutikab Kamuktaindeng’ung’, ak ng’atutikab laitoriat, kiruokyi inendet eng’ kagiiletab ge tugul, ngo bo meet, anan ngo bo kang’etoet, anan ngo kerebe tuguk, anan ngo ratisiet.

²⁷ Iberurot Jehovah, Kamuktaindetab kwanisiekyok, ne kiinde ng’olyot ne u ni muguleldab laitoriat, si kochob gotab Jehovah ne mi Jerusalem kogararanit:

²⁸ ak kigoitwa ak ane rirenet eng’ taitab laitoriat ak kiruogikyik ak eng’ taitab bounik tugul che kimen che bo laitoriat. Ak kigigimita ko u ye kimi kobota eutab Jehovah Kamuktaindennyu, ak kiayum, eng’ Israel bik che toogunotin ketogoste tugul.