EZRAH 6 - BUKUIT NE TILIL

Kochomdoi laitoriat Darius kiges teekset

¹ King’at anyun laitoriat Darius, ak kigicheng’ got ne bo bukuisiek, ole kigigonore tuguk eng’ Babulon.

² Ak kiginyorji bukuit Akmeta, eng’ gotab laitoriat ne mi emetab Media, ne kigisir ko u ni koek kabwatet.

³ Eng’ kenyit ne bo tai ne bo laitoriat Kirus, koyai Kirus ng’atutiet agobo gotab Kamuktaindet eng’ Jerusalem, kole, Ngeteech got, ole kigoitoe tiseiywek, ak kelumda lumeiywekyik kouuegitu; ingoek koindab tononennyi kakwautik tamanwogik lo che bo eut, ak tebeesindanyi kakwautik tamanwogik lo che bo eut;

⁴ koboto ortinwek somok che bo koik che eechen, ak oret agenge ne bo baoinik che leelach: ak ingobun gotab laitoriat tuguk che keyaaktoe tuguchoto:

⁵ ak ingeweekta kogeny terenik che bo tahabu ak che bo feda che bo gotab Kamuktaindet, che kiga ib Nebukadnesar eng’ hekalut ne kimi Jerusalem, kobwa Babulon, ak ingeib kogeny koba hekalut ne mi Jerusalem, ak kiinde kit age tugul komostanyi, ak inde gotab Kamuktaindet.

⁶ Ara anyun inye Tatenai bounindetab ainet bitonin, ak Setar-bosenai, ak choronoguk Aparsakitik, che mi ainet bitonin, oistoege:

⁷ oistoege boisietab gotab Kamuktaindet; ingoteech bounindetab Yahudik koboto boisiekab Yahudik, goyoto bo Kamuktaindet eng’ ole kimi yekinye.

⁸ Kang’at kogeny agobo kit ne oyachini boisiechoto bo Yahudik agobo teeksetab goito bo Kamuktaindet: ale kigochi bichoto eng’ kagiiletab ge, tuguk che kiyaaktoi che bo laitoriat, che tugukab aisurut eng’ ainet bitonin, si ma kigirinda ichek.

⁹ Ak tuguk che makyingei, ko u kirugik che mengechen, ak mengichik, ak arekab kechir, koek kagochinoik che kibeeljin Kamuktaindetab kipsengwet, nganok, munyuk, divaik, ak mwanik, ko u eng’ ng’olyotab tisiik che mi Jerusalem, ingigochi ichek betut age tugul amat kele mami:

¹⁰ si kobiit kogochi Kamuktaindetab kipsengwet korosekab nyamdutik che anyiny, ak kosa agobo sobondab laitoriat, ak werikyik.

¹¹ Kang’at kogeny ale, chi age tugul ne walei ng’olyondonito ko ingeng’us bambaniat eng’ gonnyi, ak keganapchi inendet ak keratyi ketoto; ak keyai gonnyi koek kapng’atat agobo nito:

¹² ak kobar Kamuktaindet ne kiinde kainennyi komeny oloto, laitorinik tugul ak bik tugul, che iitoi eunekwak kole kowal ng’olyondonoto, kong’em gotab Kamuktaindet ne mitei Jerusalem. Kaang’at ane Darius; ingoyaak ng’atutionito eng’ kagiiletab ge tugul.

¹³ Kiyai anyun ko u noto kochokyi Tatenai, bounindetab ainet bitonin, koboto Setar-bosenai, ak choronokwak, amu kiga koyokto bik laitoriat Darius.

¹⁴ Ak kiteekso anyun boisiekab Yahudik ak kobor, eng’ maoinatetab maotiot Hagai ak Sekaria weritab Ido. Ak kiteekso, ak kiiges, ko u ng’atutietab Kamuktaindetab Israel, ak ko u ng’atutietab Kirus, ak Darius, ak Artaserses laitoriatab Persia.

¹⁵ Ak kigiges goyoto eng’ betut ne bo somok eng’ arawetab Adar, ne ki bo kenyit ne bo lo eng’ laitornatetab laitoriat Darius.

Kitabani Hekalut

¹⁶ Ak kiitaban eng’ boiboiyet lagokab Israel, tisiik koboto Lawik, ak lagok tugul che ki luulenik che kiweeksei, goyoto bo Kamuktaindet.

¹⁷ Ak kiigoito kirugik bogol agenge, mengichik bogol aeng’, arekab kechir bogol ang’wan eng’ betutab katabanetab goyoto bo Kamuktaindet; ak kiigoito kwesik taman ak aeng’ koek kagochinetab tengekto agobo Israel tugul, kobee koitetab ortinwekab Israel.

¹⁸ Ak kiinde tisiik ko u pcheutikwak, ak Lawik ko u ripsosiekwak, agobo otisietab Kamuktaindet, ne mi Jerusalem; ko u ye sirat eng’ bukuitab Musa.

¹⁹ Ak kirib paska lagokab luulenik eng’ betutab taman ak ang’wan ne bo arawet ne bo tai.

²⁰ Amu kiga koanyinygei tisiik ak Lawik tugul; ki tililen tugul: ak kieny aruetab paska agobo lagok tugul che bo luulenik, ak agobo tupchosiekwak tisiik, ak agobo icheget.

²¹ Ak kiam paska lagokab Israel che kiweeksei kobunu ole kiga kiluulji, ak tugul che kiga istoegei simdab bororiosiekab emonoto, kocheng’ Jehovah, Kamuktaindetab Israel,

²² ak korib eng’ boiboiyet igorta ne bo makatinik che ma kinde mermerek betusiek tisab: amu kiigochi Jehovah ichek koboiboitu, ak kiwal muguleldab laitoriatab Asuria kotokyigei ichek, si kogimit ichek eng’ boisietab gotab Kamuktaindet, Kamuktaindetab Israel.