EZRAH 5 - BUKUIT NE TILIL

Ketau kogeny teeksetab hekalut

¹ Kimaoten anyun maotichu, maotiot Hagai, ak Sekaria weritab Ido, komaotenji Yahudik che kimi Juda ak Jerusalem, eng’ kainetab Kamuktaindetab Israel.

² Kong’eet anyun Serubabel weritab Sealtiel, ak Jesua weritab Josadak; ak kotoi koteech gotab Kamuktaindet ne mi Jerusalem; ak kimi koboto ichek maotikab Kamuktaindet, kotoret.

³ Kinyonji ichek eng’ betusiechoto, Tatenai ne ki bounindet eng’ ainet bitonin, ak Setar-bosenai, ak choronokwak, ak komwachi ko u ni, kolenji, King’atak ng’o oteech goi, ak oges inatuni?

⁴ Kemwachi anyun ko u ni kelenji, Ng’o kainaikab bik che teechei goi?

⁵ Ago kigeer konyekab Kamuktaindenywa boisiekab Yahudik, ak ma mwachi ichek kobagach boisionoto, kot koit ng’olyot oldab Darius, ak keweech wolunet eng’ baruet agobo ng’olyondonito.

⁶ Chu ng’alekab baruet ne kiiyokto Tatenai bounindet ne bo ainet bitonin, ak Setar- bosenai, ak choronokyik Aparsakitik, che kimi ainet bitonin, koyokyi laitoriat Darius:

⁷ kiiyokyi inendet baruet, ne kigisir ko u ni: Kisirjini laitoriat Darius, kalyet tugul.

⁸ Ingonaak eng’ laitoriat kole, kigibe emetab Juda, agoi gotab Kamuktaindet ne o, ne kigiteege koik che eechen, ak kiginde baoinik inatusiek, ak wendi tai boisioni eng’ kagiiletab ge ak koberurot eng’ eunekwak.

⁹ Kigiteebe anyun boisiechoto, kelenji, King’atak ng’o oteech goi, ak oges inatuni?

¹⁰ Kigiteebe kainaikwak kogeny, si kobiit kiborun, si kimuch kesir kainaikab bik che kiindochin ichek.

¹¹ Ak kiwolwech anyun ko u ni, kole, Ki otwogikab Kamuktaindetab kipsengwet ak ng’ony, ak kiteeche got ne kiga keteech eng’ kenyisiechu chang’ kigosiirto, ne kiteechei laitoriat ne o ne bo Israel ak koges.

¹² Ago kingo kagotach kwanisiekyok Kamuktaindetab kipsengwet kot konerech, konde ichek eutab Nebukadnesar laitoriatab Babulon, Kaldeindet, ne king’em goi, ak komut bik koba Babulon.

¹³ Ago eng’ kenyit ne bo tai ne bo Kirus laitoriatab Babulon, kong’at laitoriat Kirus keteech goi bo Kamuktaindet.

¹⁴ Ak kiinem laitoriat Kirus, eng’ hekalutab Babulon, terenikab tahabu ak che bo feda agichek che bo gotab Kamuktaindet, che kiga ib Nebukadnesar eng’ hekalut ne kimi Jerusalem, kobwa hekalutab Babulon, ak kigigochi chito age ne kiguure Sesbasar, ne kiga koeet inendet koek bounindet;

¹⁵ ak kilenji inendet, Ib terenichu, ak iwe hekalut ne mi Jerusalem, ak ingeteech gotab Kamuktaindet eng’ ole kimi yeginye.

¹⁶ Kinyo anyun Sesbasar nito, ak kolum lumeiywekab gotab Kamuktaindet ne mitei Jerusalem: ak koboch betusiechoto agoi ra, keteechei kora, ago tomo kogesgei.

¹⁷ Ara anyun, ngot kogeer laitoriat kole mie, kecheng’ eng’ got ne kigonore tugukab laitoriat, ne mi oloto bo Babulon, si kegeer ngo u noto, ngo king’at laitoriat Kirus keteech goito bo Kamuktaindet eng’ Jerusalem, ak ingoyokwech laitoriat ng’olyot komwawech kit ne chamei eng’ ng’olyondonito.