EZRAH 4 - BUKUIT NE TILIL

Kogirindoi bunik teeksetab irimoikab Jerusalem

¹ Kingogas anyun bunikab Juda ak Benjamin kole kateekyi Jehovah, Kamuktaindetab Israel, hekalut, lagokab luulenik,

² korikta anyun ole mi Serubabel, ak kandoikab gorikab kwanisiek, ak kolenji ichek, Ongeteech tugul: amu kicheng’e Kamuktaindeng’wong’, ko u okwek; ak keeng’jini inendet tiseiywek koboch betusiekab Esar-hadon laitoriatab Asuria ne kiimutwech kebwa olito.

³ Ago kilenji ichek Serubabel, koboto Jesua, ak kandoik tugul che bo gorikab kwanisiek che bo Israel, Magiting’ege yamdao ak okwek keteech tugul gotab Kamuktaindennyo; ago kiteekyini achege Jehovah, Kamuktaindetab Israel, got, ko u ye king’atech laitoriat Kirus laitoriatab Persia.

⁴ Kiigochi anyun bikab emonoto bikab Juda kochorirenso, ak koiim ichek eng’ teekset.

⁵ Ak kisir ng’omotik che bo melekto, si kogirinda ichek kowal magenywa koek buch, eng’ betusiek tugul che bo Kirus laitoriatab Persia, agoi koit laitornatetab Darius laitoriatab Persia.

⁶ Ak kisir bichoto kataamset agobo bik che kimenyei Juda ak Jerusalem eng’ betusiekab laitornatetab Aasuerus, eng’ taunetab laitornatennyi.

⁷ Ak eng’ betusiekab Artaserses kosirji baruet Bislam, Mitredat, Tabeel, koboto choronokwak tugul, kosirji Artaserses laitoriandanato bo Persia; ak kigisire baruanato sirutikab Suria, ak kemwae kutitab Suria.

⁸ Kisir anyun baruet Reum bounindetab kiruoget ak Simsai sirindet, kosirji laitoriat Artaserses, kotaam Jerusalem ko u ni:

⁹ kisir anyun Reum bounindetab kiruoget, ak Simsai sirindet, koboto choronokwak tugul, Dinaik, Aparsatkik, Tarpelik, Aparsik, Arkebik, Babulonik, Susankik, Deaik, ak Elamik,

¹⁰ ak bororiosiek alak che kiimutu Osnaper ne o ak ko toogunot, kolong’ kobwa nganasetab Samaria, ak emet ne mi ainet bitonin.

¹¹ Chu anyun ng’alek che bo baruanato kigiyoktochin laitoriat Artaserses: Achek otwogiguk che kimi bitoni, ak alak.

¹² Ingonaak eng’ laitoriat kole, Yahudik che kibunu oldang’ung’ ko kogoitwech eng’ Jerusalem; teechei nganaset ne ngeleliot ak ko ya, ak kogoges irimoik, ak kogoteech kogeny lumeiywot ne kiga kobutok.

¹³ Ingonaak nguno eng’ laitoriat kole, Ngot koteech nganasani, ak koges irimoikyik, ko ma kogoitoi kodi, ak aisurut, anan ko aisurutab tuguk, ak eng’ let, kong’em laitorinik.

¹⁴ Ara anyun, amu kiame munyuk che bo gotab laitoriat, ak ma nyoljinech kegeer keng’emjin laitoriat teegisto, kagiyogu anyun amu noto kiborji laitoriat;

¹⁵ si kobiit kecheng’ eng’ bukuit ne bo ng’alekab betusiekab kwanisieguk: si kobiit inyorji bukuinoto bo ng’alekab betusiek, ak inai ile ngeleliot nganasani, ak koiimi laitorinik ak emotinwek, ak kigong’eet chaamset koboch keny: noto anyun ne kiigochi nganasanito keng’em.

¹⁶ Kiborjini anyun laitoriat kelenjini, ngot keteech nganasani, ak kiges irimoik, koboru noto kole, ma itinye kebeberta eng’ ainet bitoni.

¹⁷ Kiiyokyi anyun laitoriat wolunet Reum bounindetab kiruoget, ak Simsai sirindet, ak choronokwak tugul che kimenyei Samaria, ak emet tugul ne mi ainet bitonin, kole, Ingoteb kalyet ko u noto.

¹⁸ Baruet ne kigooyokwech ko kagesoman komie eng’ tainnyu.

¹⁹ Ak koang’at, ak kogecheng’, ak kenyor kele king’eetyo nganasanito bo keny kobistoe laitorinik, ak kogobiitune ngelelnatet ak chaamset.

²⁰ Kimitei kogeny laitorinik che ki kimen che kibou Jerusalem, che kibou emet tugul ne mi ainet bitonin; ak kigigochin kodi, ak aisurut, ak aisurutab tuguk.

²¹ Ong’at anyun kit ne igochin bichoto kosisyo, si mata koteech nganasani, agoi tun ang’at.

²² Oripge anyun si mogaege ng’olyondonoto: amu nee si kotesak ng’emisiet ne inyalili laitorinik?

²³ Kingo kagesoman ng’alekab baruetab laitoriat Artaserses eng’ taitab Reum, ak Simsai sirindet ak choronokwak, kochakta Jerusalem ole mi Yahudik, kwo kong’at ichek eng’ koromnatet ak kimnatet kobagakta boisiet.

²⁴ Kotonon anyun boisietab gotab Kamuktaindet ne mi Jerusalem; ak kitonon agoi kenyit ne bo aeng’ ne bo laitornatetab Darius laitoriatab Persia.