EZRAH 3 - BUKUIT NE TILIL

Keteechei kogeny hekalut

¹ Ak kingoit arawetab tisab, ye kimi lagokab Israel nganasokwak, koyumjigei bik Jerusalem ko u chichak.

² Kotonon anyun Jesua weritab Josadak, ak tupchosiekyik tisiik, koboto Serubabel weritab Sealtiel, ak tupchosiekyik, ak koteech kaptisisiet ne bo Kamuktaindetab Israel, si kogoitoe kagochinoik che kibeelei, ko u ye sirat eng’ Ng’atutietab Musa chitab Kamuktaindet.

³ Ak kiinde kaptisisiet ole tebe; amu kitinyei kaiyweisiet amu bikab emotinwek alak: ak kiigochi Jehovah kagochinoik eng’ kaptisisionoto, kagochinoik che kibeelei, karon ak koskoleny.

⁴ Ak kirib igorta ne bo keriosiek, ko u ye sirat, ak kogoito kagochinoik che kibeelei eng’ betut age tugul kobee koitenywa, ko u kayomiset, ko u ye yamei boisietab betut age tugul;

⁵ ak kingobata kogoito kagochinet ne kibeelei ne bo kotugul, ak kagochinoik che bo ye kaleel arawet, ak che bo igorwek tugul che bo Jehovah che kiging’at che kigitaban, ak che bo chi tugul ne kiigochin Jehovah kagochinetab chamnyet.

⁶ Kitau kogochin Jehovah kagochinoik che kibeelei eng’ betut ne bo tai ne bo arawetab tisab: ago kitomo kelumda lumeiywekab hekalutab Jehovah.

⁷ Kiigochi kogeny fedaisiek musogikab koik, ak che bo baoinik; ak kogochi bikab Sidon ak che bo Turo amitwogik, ak che kieei ak mwanik, si kobiit koib taragonik eng’ Lebanon kobwa nyanjet, agoi Jopa, ko u ye kiga koyanji Kirus laitoriatab Persia.

⁸ Ak eng’ kenyit ne bo aeng’ ngab koit gotab Kamuktaindet eng’ Jerusalem, eng’ arawet ne bo aeng’, kotoi Serubabel weritab Sealtiel, ak Jesua weritab Josadak, koboto tupchosiekwak tugul che tisiik ak Lawik, ak luulenik tugul che kiga week Jerusalem; konde Lawik, koboch che bo kenyisiek tiptem ak che siirei, korib boisiet ne bo gotab Jehovah.

⁹ Kotonon anyun Jesua koboto werikyik ak tupchosiekyik, Kadmiel ak werikyik, werikab Juda, komi tugul korib kiboitinik eng’ gotab Kamuktaindet: werikab Henadad, koboto werikwak ak tupchosiekwak Lawik.

¹⁰ Ak kingolumda teegik lumeiywotab hekalutab Jehovah, konde tisiik kolos Jehovah kolaachi ngoroikwak che bo tiseinatet, kotinyei iriagok, koboto Lawik werikab Asap che kitinyei sanisiekab sugunonik che kibirei, ko u ng’atutietab Daudi laitoriatab Israel.

¹¹ Ak kiwoljingei kotieni kolosu ak komwachin kongoi Jehovah, kolen, Amu mie inendet, amu bo koigeny rirenennyi eng’ Israel. Ak kiwaach bik tugul eng’ waagat ne o ye kiilosu Jehovah, amu kiga kelumda lumeiywotab gotab Jehovah.

¹² Ago kiririo eng’ kutit ne o tisiik che chang’ ak Lawik ak kandoikab gorikab kwanisiek, boisiek che kiga keer got ne ki bo tai, ye kingelumdoi lumeiywotab goito eng’ tainywa; ak kiwaach eng’ boiboiyet:

¹³ kot ko mata komuch bik kobesio waagat ne bo boiboiyet ak ne bo rirekab bik: amu kiwaach bik eng’ waagat ne o, ak kiit waagandanato ole loo.