EZRAH 10 - BUKUIT NE TILIL

Keonei kwonyik che toek

¹ Ak ye kita kosaei Esra, ak kong’anyei chalwogik, ak korirei ak kowirjingei ng’ony eng’ taitab gotab Kamuktaindet, koyumjigei inendet tuiyet ne o mising’ ne kibunu Israel, ne bo murenik ak kwonyik ak lagok: amu kiririo bik eng’ ng’wanindo.

² Ak kiwolji Sekania weritab Jehiel, weritab Elam, Esra, kolenji, Kigichililji Kamuktaindennyo, ak kigitun tibik che toek che bo bikab emoni: ago mi nguno kamang’unet agobo Israel agobo ng’olyondonito.

³ Ongiyomisge anyun ak Kamuktaindennyo keiste osotik tugul ak lagok che kisichei osotichoto, ko u ng’olyondeng’ung’ inye kiptaiyandennyu, ak ne bo icheget che kabotanso amu ng’atutietab Kamuktaindennyo; ak ingoyaak ko u ng’atutiet.

⁴ Ng’eet anyun; amu neng’ung’ ng’olyondonito, ak kimi koboten: nyiganitu, ak iyai.

⁵ Kong’eet anyun Esra, ak kong’at che eechen eng’ tisiik, ak Lawik, ak Israel tugul, koyosio kole yaei ko u ng’olyondonito. Koyosio anyun.

⁶ Kong’eet anyun Esra eng’ taitab gotab Kamuktaindet, ak kwo got ne bo orit ne bo Jeohanan weritab Eliasib: ak kingoit yoto, koma koamis, anan koee beek: amu kirirei agobo kachililutietab ichek che kiga kiluul.

⁷ Ak kimwaita eng’ Juda tugul ak Jerusalem, komwachi lagok tugul che bo bik che kiga kiluul, si kobiit koyumjigei Jerusalem.

⁸ Ak age tugul ne ma nyo ko kagobata betusiek somogu, ko u ng’olyotab bounik ak boisiek, kerebe tugukyik tugul, ak kitabane tuiyetab bichoto kiga kiluul.

⁹ Kiiyumjigei anyun Jerusalem bik tugul che bo Juda ak Benjamin kotomo kogesgei betusiek somogu; ki arawetab sogol, eng’ betutab tiptem ne bo arawanato: ak kitebe bik tugul komosta ne baraa eng’ taitab gotab Kamuktaindet, kobotandos agobo ng’olyondonoto, ak ropta ne o.

¹⁰ Kotonon anyun Esra tisiindet, ak kolenji ichek, Kiochiliil, ak kiotun tibik che toek, otes ng’ogistab Israel.

¹¹ Ong’ang’ji anyun Jehovah, Kamuktaindetab kwanisiekwok, ak oyai kit ne chamei: ak otabange bikab emet, ak kwonyik che toek.

¹² Kiwol anyun tuiyet tugul eng’ kutit ne o, kole, Ko u ye kaimwa agobo achek, konyoljinech keyai.

¹³ Ago chang’ bik, ak betusiekab ropta ne o, ama kimuchi ketononse eng’ sang’, ama boisietab betut agenge nito anan aeng’: amu kigichiliil mising’ eng’ kiito.

¹⁴ Ingelewen anyun bounikyok agobo tuiyet tugul, ak ingobwa ichek tugul che mi nganasokyok che kiitun tibik che toek, ingobwa eng’ betusiek che king’atei, ak ingobwa koboto ichek boisiekab nganaset age tugul, ak kiruogikyik, agoi koistoeneigei neregek che koromen che bo Kamuktaindennyo, kot keisto boisionito.

¹⁵ Jonatan weritab Asael ak Jaseia weritab Tikba ichegei che kitononso kogirinda ng’olyondonito: ak kitoret ichek Mesulam ak Sabetai Lawindet.

¹⁶ Ak kiyai ko u noto lagokab bik che kiga kiluul. Ak kigitaban tisiindet Esra, koboto kandoik alak che bo gorikab kwanisiek, kobee gorikab kwanisiekwak, ak ichek tugul ko u kainaikwak; ak kitebi ng’ony eng’ betut ne bo tai ne bo arawetab taman kogin ng’alechato.

¹⁷ Ak kiiges eng’ betut ne bo tai eng’ arawet ne bo tai ng’alek tugul che bo murenik che kiga kotun tibik che toek.

¹⁸ Ak kibiit eng’ werikab tisiik che kiga kotun tibik che toek: eng’ werikab Jesua, weritab Josedak, ak tupchosiekyik, ko ki Maaseia, Elieser, Jarib, ak Gedalia.

¹⁹ Ak kiiyosio kole istoi osotikwak; ak amu kitinyei tengekto, ko kiigoito mengit ne bo akwet kobunji tengektanywa.

²⁰ Ak eng’ werikab Imer ko ki Hanani ak Sebadia.

²¹ Ak eng’ werikab Harim ko ki Maaseia, Elija, Semaia, Jehiel, ak Usia.

²² Ak eng’ werikab Pasur ko ki Elioenai, Maaseia, Ismael, Netanel, Josabad, ak Elasa.

²³ Ak eng’ Lawik ko ki Josabad, Simei, Kelaia (inendet Kelita), Petaia, Juda, ak Elieser.

²⁴ Ak eng’ tienik ko ki Eliasib: ak eng’ ribikab kurgotik ko ki Salum, Telem, ak Uri.

²⁵ Ak eng’ Israel: eng’ werikab Paros ko ki Ramia, Isia, Malkija, Mijamin, Eleasar, Malkija, ak Benaia.

²⁶ Ak eng’ werikab Elam ko ki Matania, Sekaria, Jehiel, Abdi, Jeremot, ak Elija.

²⁷ Ak eng’ werikab Satu ko ki Elioenai, Eliasib, Matania, Jeremot, Sabad, ak Asisa.

²⁸ Ak eng’ werikab Bebai ko ki Jeohanan, Hanania, Sabai, Atlai.

²⁹ Ak eng’ werikab Bani ko ki Mesulam, Maluk, Adaia, Jasub, Seal ak Jeremot.

³⁰ Ak eng’ werikab Pahat-moab ko ki Adna, Kelal, Benaia, Maaseia, Matania, Besalel, Binui, ak Manase.

³¹ Ak eng’ werikab Harim ko ki Elieser, Isija, Malkija, Semaia, Shimeon;

³² Benjamin, Maluk, Semaria.

³³ Eng’ werikab Asum ko ki Matenai, Matata, Sabad, Elipelet, Jeremai, Manase, Simei.

³⁴ Eng’ werikab Bani ko ki Maadai, Amram, ak Uel;

³⁵ Benaia, Bedeia, Kelui;

³⁶ Bania, Meremot, Eliasib;

³⁷ Matania, Matenai, ak Jaasu;

³⁸ ak Bani, Binui, Simei;

³⁹ ak Selemia, Natan, Adaia;

⁴⁰ Maknadebai, Sasai, Sarai;

⁴¹ Asarel, Selemia, Semaria;

⁴² Salum, Amaria, Josep.

⁴³ Eng’ werikab Nebo ko ki Jeiel, Matitia, Sabad, Sebina, Ido, Joel, ak Benaia.

⁴⁴ Kiga kotun chuto tugul tibik che toek; ak kitinyei alak osotik che kiga kosikyi lagok.