EZRAH 1 - BUKUIT NE TILIL

Kochamjin Kirus Yahudik koweek Jerusalem

¹ Eng’ kenyit ne bo tai ne bo Kirus laitoriatab Persia, si kobiit kosulda ng’olyotab Jehovah ne kimwa eng’ kutitab Jeremia, kochirjir Jehovah tamirmirietab Kirus laitoriatab Persia, si komwaita eng’ bounatennyi tugul, ak kosirta kogeny, kole,

² Kamwa ko u ni Kirus laitoriatab Persia, kole, Kigona Jehovah, Kamuktaindetab kipsengwet, bounatosiek tugul che bo ng’ony; ak king’ata ateekyi got eng’ Jerusalem, ne mi Juda.

³ Ingotogosta Jerusalem, ne mi Juda, age tugul eng’ okwek che o bo bikyik tugul, ak ingoteb Kamuktaindennyi koboto inendet, kwo koteekyi got Jehovah, Kamuktaindetab Israel (inendet ko Kamuktaindet,) ne mi Jerusalem.

⁴ Ak chi age tugul ne kang’et, eng’ oldo tugul ole menyei, ko ingotoret bikab oldanyi chichoto eng’ feda, ak tahabu, ak tuguk, ak tuga, koboto kagochinoik che bo chamnyet agobo gotab Kamuktaindet, ne mi Jerusalem.

⁵ King’eetyo anyun che eechen eng’ kandoikab gorikab kwanisiek che bo Juda ak Benjamin, ak tisiik, koboto Lawik, ak tugul che kiing’eet Kamuktaindet sobonwekwak kotogosta koba koteech gotab Jehovah ne mi Jerusalem.

⁶ Ak kiigochi tugul che kimi ak ichek, tuguk che bo feda, koboto tahabu, ak tuguk, ak tuga, ak tuguk che bo kamanutiet ne o, koboto tugul che kigigoitoi eng’ chamnyet, kogimite ichek.

⁷ Kiinem kogeny laitoriat Kirus tuguk che bo gotab Jehovah, che kiga koib Nebukadnesar eng’ Jerusalem, che kigainde gotab kanamonikyik;

⁸ kiib choto Kirus laitoriatab Persia, eng’ eutab Mitredat konorindet, ak koiityi Sesbasar, bounindetab Juda.

⁹ Chu ko koitetab tuguchoto: tabok sosom che bo tahabu, tabok elfut che bo feda, ak rotok tiptem ak sogol;

¹⁰ tabok sosom che mengechen che bo tahabu, ak tabok alak che mengechen, bogol ang’wan ak taman che bo feda, ak terenik alak elfut agenge.

¹¹ Terenik tugul che bo tahabu ak feda, ko kiek elfusiek mut ak bogol ang’wan. Kiib Sesbasar chuto tugul kotogos, ye kigimutu luulenik kotogos kobunu Babulon kobwa Jerusalem.