ESTA 4 - BUKUIT NE TILIL

Kogoigoi Mordekai Esta kosom rirenetab ge eng’ laitoriat

¹ Ye kingonai Mordekai tuguk tugul che kagoyaak, kogerer Mordekai ngoroikyik, ak kolaach kuniok ak koiilegei orek, ak kwo kwenutab nganaset, ak kote eng’ kutit ne o ak rirekab ng’wanindo ne o:

² ak kinyo taitab ormarichetab laitoriat: amu ma kichamji chi age tugul kochut ormarichetab laitoriat kolaachi kuniok.

³ Ak kibiit arogenet ne o eng’ Yahudik, ak karugutetab ge, ak rirek ak kateeiyet eng’ emet age tugul ne kiit ng’olyotab laitoriat ak ng’atutiennyi, ak kisieb che chang’ eng’ ichek kuniok ak orek.

⁴ Ak kibwa tibikab Esta ak ribikyik, ak komwachi inendet ng’olyondonoto; ak kiarogen mising’ osotiotab laitoriat: ak kiiyokto ngoroik kilaakyi Mordekai, ak kireegune kuniok: ago ma taach.

⁵ Kiguur anyun Esta Hatak, age eng’ ribikab laitoriat, ne kiga konde laitoriat koboisiechi kwonyoto, ak kong’at inendet kwo ole mi Mordekai, si kobiit konai kole nee nito, ak amu nee si koyaak ko u noto.

⁶ Kwo anyun Hatak ole mi Mordekai agoi ole baraa eng’ nganaset, ne kimi taitab ormarichetab laitoriat.

⁷ Ak kimwachi Mordekai inendet tuguk tugul che kagoyaak agobo inendet, ak fedaisiek tugul che kiga koarorji Haman kole konde ole kigonore tugukab laitoriat, agobo Yahudik, kole si kebar ichek.

⁸ Ak kiigochi kogeny inendet ng’alekab sirutik che bo ng’atutiet ne kigimwaita eng’ Susan kele kebar ichek, si koborji Esta, ak komwachi ole teptoi; ak kong’at inendet kwo ole mi laitoriat, kwo korirji inendet, ak kosomso eng’ tainnyi agobo bikyik.

⁹ Ak kinyo Hatak ak komwachi Esta ng’alekab Mordekai.

¹⁰ Kong’alalji anyun Esta Hatak, ak komwachi inendet ng’alek koipchi Mordekai, kolenji,

¹¹ Ingen otwogik tugul che bo laitoriat, ak bik che bo emotinwekab laitoriat, kole, age tugul, ngo muren anan kwony, ne nyonei ole mi laitoriat eng’ seremut ne mi orit, ne ma kiguur, komi ng’atutiet agenge agobo inendet, kele kibarei, kobate icheget che iyogochin laitoriat siaritab tahabu, si kosob: ago tomo keguura anyo ole mi laitoriat eng’ betusiechu sosom.

¹² Ak kimwachi ichek Mordekai ng’alekab Esta.

¹³ Kong’at anyun Mordekai ichek koipchi Esta wolunet, kolenji, Amat ibwat ile ichilili eng’ gotab laitoriat, kosiir Yahudik tugul.

¹⁴ Amu ngot isis kityo eng’ betusiechuto, konyor Yahudik toretet ak katiaget eng’ komosta age, ago iluse inye ak gotab kwandang’ung’: ak ng’o ne ingen ngo tos kima inyonji bounatet agobo betusiek che u chuto?

¹⁵ Kong’at anyun Esta ichek keipchi Mordekai wolunet, kelenji,

¹⁶ Ui iyum Yahudik tugul che mitei Susan, ak orugutge agobo ane, amat oam kiy anan oeeise eng’ betusiek somok, kemoi anan bet: arugutige agane ko u noto koboto tibikyuk: ak awe anyun ole mi laitoriat, ama ko u ng’atutiet: ak ngalus, alus.

¹⁷ Kwo anyun Mordekai ak koyai ko u tugul che kang’at Esta inendet.