ESTA 2 - BUKUIT NE TILIL

Keleweni Esta koek kwondab laitoriat

¹ Kingobata tuguchuto, ko kagogesgei neregekab Aasuerus, kobwat Basiti, ak kit ne kiga koyai, ak kit ne kiga king’at agobo inendet.

² Yeityo komwa otwogikab laitoriat che kiboisiechin inendet, kole, Ingecheng’ji laitoriat bergeinik che neran che kororon:

³ ak ingonde laitoriat kiptainik emotinwek tugul che bo bounatennyi, si kobiit koyum bergeinik tugul che neran che kororon kobwa Susan, nganaset ne o, kobwa gotab kwonyik, konyo korib Hegai, ribindetab laitoriat, ne kiribei kwonyik; ak ingigochi tugukwak che ianyinyegei:

⁴ ak koek osotiotab laitoriat chepto ne iboiboi laitoriat kogeer Basiti. Ak kiibaibai laitoriat ng’olyondoni; ak kiyai ko u noto.

⁵ Kimi Yahudiot age Susan, nganaset ne o, ne kigiguure Mordekai, weritab Jair, weritab Simei, weritab Kis, Benjaminindet;

⁶ ne kiga kimut eng’ Jerusalem koboto luulenik, che kiga kimut koboto Jekonia laitoriatab Juda, che kiga komut Nebukadnesar laitoriatab Babulon.

⁷ Ak kiigui Hadasa, noto ko Esta, cheptab ne tupcho ak kwandanyi: amu kima kotinyei kwanda ak kamet, ak ki chepto ne kitinyei itondo ne mie ak toget ne kararan; ak ye kingome kwandanyi ak kamennyi, konam Mordekai koek cheptanyi.

⁸ Ak kingegas ng’olyotab laitoriat ak ng’atutiennyi, ak kingiyum tibik che chang’ kobwa Susan, nganaset ne o, korib Hegai, ko kigimut Esta konyo gotab laitoriat, korib Hegai, ne kiribei kwonyik.

⁹ Ak kiibaibai cheboto inendet, ak kinyor chamet eng’ inendet; ak kisib kogochi inendet tugukyik che ianyinyegei, koboto kebeberwekyik, ak tibik tisab, che kinyol kigochi inendet, eng’ gotab laitoriat: ak kiiuu inendet ak tibikyik koba komosta ne kararan kot ne bo gotab kwonyik.

¹⁰ Kitom kobor Esta ole salu bikyik anan tilionutikyik: amu kiga kong’at Mordekai inendet si mamwa.

¹¹ Ak kiwendote Mordekai betut age tugul taitab seremut ne bo gotab kwonyik, si kobiit konai ole teptoi Esta, ak kit ne kiyachin inendet.

¹² Ak kingoit betut ne wendi chepto age tugul ole mi laitoriat Aasuerus, ko kageyachi ko u ye mwaei ng’atutik agobo kwonyik, eng’ arawek taman ak aeng’, (amu ki u noto kagesunetab betusiekab kaanyinyenywa bo ge, bo arawek lo mwanikab tuguk che u igomoik, ko bo arawek lo nyamdutik, ak tuguk che bo kaanyinyetab kwonyik,)

¹³ kinyonei anyun ko u nito chepto ole mi laitoriat, kigigochin kit age tugul ne machei koib eng’ gotab kwonyik kwo gotab laitoriat.

¹⁴ Kiwendi koskoleny, ak koweek mutai kwo got ne bo aeng’ ne bo kwonyik korib Saasgas, ribindetab laitoriat, ne kiribei chebaigeinik: kima kota kowendi kogeny cheboto ole mi laitoriat, kobate ngo cham laitoriat cheboto, ak keguur kainennyi.

¹⁵ Ak kingoit anyun betutab Esta, cheptab Abiail imametab Mordekai, ne kiga nam cheboto koek cheptanyi, ye wendi ole mi laitoriat, ko ma mach kiy age tugul kobate kit ne king’at Hegai ribindetab laitoriat, ne kiribei kwonyik. Ak kichamak Esta eng’ taitab bik tugul che kigeer inendet.

¹⁶ Kigimut anyun Esta kwo ole mi laitoriat Aasuerus eng’ gonnyi ne bo laitornatet, eng’ arawetab taman, noto ko arawetab Tebet, eng’ kenyit ne bo tisab ne bo laitornatennyi.

¹⁷ Ak kicham laitoriat Esta kosiir tibik tugul, ak kinyor mieindo ak chamet eng’ tainnyi kosiir bergeinik tugul; kot kolaakyi inendet narietab laitornatet, ak kotun inendet kogeere Basiti.

¹⁸ Kiyachi anyun laitoriat igorta ne o bounikyik tugul ak otwogikyik, igortab Esta; ak kiigochi kamuung’et emotinwek, ak kogoito kagochinoik, ko u aiyebindab laitoriat.

¹⁹ Ak kingo kagoyumgei bergeinik ne bo aeng’, koteb Mordekai eng’ ormarichetab laitoriat.

²⁰ Kitom kobor Esta ole salu tilionutikyik anan bikyik: ko u ye kiga ng’at Mordekai inendet: amu kigas it Esta ng’atutietab Mordekai, ko u atkinyei koribei inendet.

Kogasei Mordekai chaamset agobo baretab laitoriat

²¹ Eng’ betusiechoto, ye kitebyei Mordekai eng’ ormarichetab laitoriat, konerekso ribik aeng’ che bo laitoriat, Bigtan ak Teres, che kiribei kurget, ak kocheng’ kobar laitoriat Aasuerus.

²² Ak kinaak kioto eng’ Mordekai, ne kimwachi Esta osotiotab laitoriat; ak kimwachi Esta laitoriat ng’olyondonoto, komwaitochi Mordekai.

²³ Ak kingo kagegin ng’olyondonoto, ak kenai kele u noto, ko kigigartat bichoto tuwai eng’ ketit: ak kigisirji ng’olyondonoto bukuitab ateptab betusiek eng’ taitab laitoriat.