EPESOEK 6 - BUKUIT NE TILIL

¹ Lagochu, ogas it sigikwok eng’ Kiptaiyat: amu mie nito.

² Teech kwandang’ung’ ak komet (nito ng’atutiet ne bo tai ne boto kayomiset),

³ si kobiit komieit eng’ inye, si kota iwe keny eng’ ng’ony.

⁴ Ak okwek, kwanisiechu, amotachatachi lagokwok, si konerekso: ago obai ichek eng’ kotigonet ak kateunetab Kiptaiyat.

⁵ Otwogichu, ogas it ichek che kiptainikwok eng’ borto, eng’ kaiyweisiet ak botanet, eng’ muguleldo tugul, ko u ye ogase it Kristo;

⁶ ama eng’ otwognatet ne kigeerei, ko u che iboiboi bik; ago ko u otwogikab Kristo, oyae magetab Jehovah eng’ muguleldo;

⁷ oyae boisiet eng’ chamnyet, ko u eng’ Kiptaiyat, ama eng’ bik:

⁸ ongen ole kiy age tugul ne mie ne yaei chi age tugul, kotun taachei noto kogeny eng’ Kiptaiyat, ngo ratat anan ngotiagat.

⁹ Ak okwek kiptainichu, oyachi ichek ak okwek ko u noto, amorasyini: ongen ole mi kipsengwet Kiptaiyandenywa ak ko neng’wong’, ama mi eng’ inendet tiytiet ne bo bik.

Karik che bo Kristianindet

¹⁰ Ne bo let anyun, oegu che kimen eng’ Kiptaiyat, ak eng’ kimnatetab kamugennyi.

¹¹ Olaach karikab luget komugul che bo Jehovah, si kobiit omuch ogirinde kaberberisiosiekab oindet.

¹² Amu ma bo kabelennyo bo ge borto ak korotik, ago bo laitornatosiek, ak kimnatosiek, eng’ bounikab ng’onyuni che bo mesundeito, eng’ lugosiekab tamirmirik che bo yaitiet eng’ komoswekab kipsengwet.

¹³ Noto anyun onam karikab luget komugul che bo Jehovah, si kobiit omuch ogirinde eng’ betut ne ya, ak ye kaoyai tugul, otononse.

¹⁴ Otononse anyun, ko kaogermen suenutikwok eng’ imanit, ak ko kaolaach karnetab teget ne bo imanda,

¹⁵ ak ko kaoratyi kelyekwok bekyinet ne bo logoiywek che miach che bo kalyet;

¹⁶ ak onam koboto chun tugul long’etab kayanet, ne omuchi omis kipchabonik tugul che bo mat che bo inendet ne ya.

¹⁷ Ak onam kutwetab yetunet, ak rotwetab chok ne bo Tamirmiriet, noto ng’olyotab Jehovah:

¹⁸ Osa betusiek tugul eng’ Tamirmiriet koboto saet tugul ak kagaigaet, ak oripsei eng’ noto eng’ kagiiletab ge tugul ak kagaigaet, agobo tugul che tililen.

¹⁹ Ak agobo ane, si kobiit kegona twegunet, ayat kutinnyu, abarta eng’ nyiganatet ung’otiet ne bo logoiywek che miach,

²⁰ amu a tononjinindet ne bo noto eng’ sirimwek; si kobiit ang’alal eng’ choto eng’ nyiganatet, ko u ye nyolu amwa.

Ng’alek che bo let

²¹ Ago si kobiit onai ak okwek ng’alekyuk, ole ateptoi, komwawok tuguk tugul Tukiko, chamanet ne ketupche ne kiboitiot ne kiyani eng’ Kiptaiyat:

²² ne koayokwok agobo ng’olyondonito, si kobiit onai ng’alekyok, ak kogaigai inendet mugulelwekwok.

²³ Ingotebi kalyet koboto tupchosiek, ak chamnyet ak kayanet, che bo Jehovah Kwanda ak Kiptaiyat Jesu Kristo.

²⁴ Ingoteb mieindo koboto ichek tugul che chamei Kiptaiyandennyo Jesu Kristo eng’ atepto ne ma ng’emaksei.