EPESOEK 5 - BUKUIT NE TILIL

¹ Oegu anyun kasubikab Jehovah, ko u lagok che kichamei;

² ak obendate chamnyet, ko u ye kichamak Kristo agine, ak kogoitogei agobo achek, koek kagochinet ak tiseiywot eng’ Jehovah ne ng’uu ne nyamdut.

³ Ago ko u ye nyoljin bik che tililen ko mat ong’alale eng’ kwenung’wong’ sokset, ak simdo tugul, anan kasetab miat;

⁴ anan tewernat, anan ng’alaletab abusnatet, anan roriot ne bo ng’alek che yaach, manyolu choto: ago kaigai kagoitoetab kongoi.

⁵ Amu ongen nito iman ole, mami chi ne soksei, anan chitab simdo, anan ne kasei miat, noto ne saei kanamonik, mami eng’ chu ne nyoru borotet eng’ bounatetab Kristo ak Jehovah.

⁶ Amat koberberak chi eng’ ng’alek che manamegei ak kiy: amu nyonjin nereknatet ne bo Jehovah werikab ngelelnatet amu tuguchuto.

⁷ Noto anyun, amoyai yamdaet agenge ak ichek;

⁸ amu kio mesundeito eng’ betusiek alak, ago o lapkeiyet nguno eng’ Kiptaiyat: obendate ko u lagokab lapkeiyet

⁹ (amu logoiyatab lapkeiyet ko eng’ mieindo tugul ak imanda ak imanit),

¹⁰ si onai noto taachaksei eng’ Kiptaiyat;

¹¹ amoyai yamdaet ak boisionikab mesundeito, che matinyei logoek, ago kaigai oger kong’;

¹² amu tuguk che yaei ichek eng’ ung’ot ko tewernat ngelen kemwa.

¹³ Ago tuguk tugul che kigere kong’ ko ng’ang’aksei eng’ lapkeiyet: amu kiy age tugul ne kibortoi ko lapkeiyet.

¹⁴ Noto anyun, mwaei inendet kole, Kosu, inye ne irue, ak ing’eet eng’ che kigobek, ak kokwenyin Kristo.

¹⁵ Oripge anyun mising’ eng’ ole oteptoi eng’ banwekwok, ma ko u che ma ng’omen, ago ko u che ng’omen;

¹⁶ oboisie saisiek komie, amu yaachen betusiek.

¹⁷ Noto anyun amoberberitu, ago oguiye kit ne u magetab Kiptaiyat.

¹⁸ Amat obogitye eng’ maiyek, che ibu maget ne ya, ago ingonyiiak Tamirmiriet;

¹⁹ ong’alaljinige eng’ tienwogikab kalosunet ak tienwogik ak tienwogikab tamirmiriet, otieni tiendo ne rurei eng’ mugulelwekwok eng’ Kiptaiyat;

²⁰ ogoitoi kongoi kotugul agobo tuguk tugul eng’ kainetab Kiptaiyandennyo Jesu Kristo, ogochini Jehovah, inendet Kwanda;

²¹ oming’injige ge eng’ kaiyweisietab Kristo.

²² Osotichu, ogas it manong’otaikwok, ko u ye ogase it Kiptaiyat.

²³ Amu manong’otiot ko metitab osotiot, ko u Kristo agine ne metitab kaniset, inendet yetindetab borto.

²⁴ Ago ko u ye kase it kaniset Kristo, ko u noto agichek osotik eng’ manong’otaikwak eng’ kiy age tugul.

²⁵ Manong’otaichu, ocham osotikwok, ko u Kristo agine ne kicham kaniset, ak kogoitogei agobo inendet;

²⁶ si kobiit kotaban, ko kagotilil eng’ kaunetab beek eng’ ng’olyot,

²⁷ si kobiit komutyigei kaniset, noto ne bo torornatet, ne matinyei kunenden anan siring’ut anan kiy age tugul ne u noto; ago koek ne tilil ne matinyei tisia.

²⁸ Ko u noto kanyolji manong’otaik agichek kocham osotikwak ko u ye chamei borwekwak ichegei. Inendet ne chamei osotiondennyi kochamegei inegei:

²⁹ amu mami chi ne wechei bortanyi; ago baei ak koribei, ko u kit ne yachin Kristo agine kaniset;

³⁰ amu ki kebeberwek che bo bortanyi.

³¹ Amu ng’olyondoni, kobagaktoi chi kwandanyi ak kamet, ak konamgei ak osotiondennyi; ak koek icheget tuwai borto agenge.

³² O ung’otioni: ago ang’alali agobo Kristo ak kaniset.

³³ Ago ingocham chi age tugul osotiondennyi, ko u ole chamdogei; ak ingogonyit osotiot manong’otiondennyi.