EPESOEK 4 - BUKUIT NE TILIL

Tinyei yamdaet agenge kuurset ne kuursei Jehovah

¹ Noto anyun, ane ne a kimonjororiot eng’ Kiptaiyat, asomok mising’ ale obendate ko u ye nyoljin kuurset ne kigeguurok,

² eng’ kaming’inetab ge tugul ak mutyonet, koboto muitaet, omuitochinige eng’ chamnyet;

³ ogiilige oribe yamdaet ne bo Tamirmiriet eng’ ratutietab kalyet.

⁴ Agenge borto, ak agenge Tamirmiriet, ko u ye kigeguurok eng’ kamang’unet agenge ne bo kuurseng’wong’;

⁵ Kiptaiyat agenge, kayanet agenge, kabatisanet agenge,

⁶ Jehovah agenge ne Kwandab tugul, ne bou tugul, ak koyamu tugul, ak komi eng’ tugul.

⁷ Ago kigigochi age tugul eng’ achek mieindo ko u kakwaet ne bo konunetab Kristo.

⁸ Mwaei eng’ noto anyun kole, Kingotogosta barak, komut luulenik che kigoluul, Ak kogochi bik kagochinoik.

⁹ (Noto anyun, ng’olyondonito mwaei kole, Kitogosta, ko nee anyun kobate kele kichortagei agine kwo komoswekab ng’ony orit mising’?

¹⁰ Inendet ne kichortagei ko inendet ne kitogosta barak mising’ kosiir kipsengwetisiek tugul, si kobiit konyiit tuguk tugul.)

¹¹ Ak kiigochi alak koek che kiyoktoi: ak alak, maotik; ak alak, che mwaitooti logoiywek che miach; ak alak, mestowek ak ko konetik;

¹² si koyai che tililen koek che igesunotingei, agobo boisietab otisiet, agobo teeksetab bortab Kristo:

¹³ agoi keit achek tugul yamdaetab kayanet, ak naetab Weritab Jehovah, agoi keegu chito ne bekyinot, agoi kakwaet ne bo etunatetab nyiietab Kristo:

¹⁴ si mata keegu lagok, che kitoortoi koba komosi ak komosi ak kiiboti eng’ usonet age tugul ne bo konetisiet, eng’ ng’alsetab bik, eng’ ng’omkong’natet, eng’ kaberberisiosiekab lelutiet;

¹⁵ ago king’alali che bo iman eng’ chamnyet, si keegitu eng’ tuguk tugul eng’ inendet, inendet ne metit, noto ko Kristo;

¹⁶ eng’ inendet keropchindos ak kituitos borto tugul, eng’ noto ne konu kebeberta age tugul, ko u kakwautietab boisiet ne bo kebeberta age tugul, si kotes borto eng’ teekset ne teechegei inegei eng’ chamnyet.

Sobondo ne bo kotomo kewalage, ak sobondo ne leel

¹⁷ Amwae anyun ni, ak abaoriani eng’ Kiptaiyat, ale si mata obendate ko u ye bendoti Bororiosiek agichek, eng’ kabwatutikwak che bo buch,

¹⁸ che imenen eng’ nautikwak, che kigiyai koek kipsagarek eng’ sobondab Jehovah, amu berberindo ne mi eng’ ichek, amu uuindab mugulelwekwak;

¹⁹ che kiigochigei maget ne ya agobo tuguk che yaachen, amu kigobek kosoptos, si koyai simdo tugul eng’ keiyandit.

²⁰ Ago kima onetge Kristo ko u noto;

²¹ ngo kiogas inendet, ak kiginetak eng’ inendet, ko u ye mi imanit eng’ Jesu:

²² ale oregu chito ne bo keny, noto atebeng’wong’ ne bo atkinye, ne ng’emaksei ko u magutik che yaach che bo kenisiet;

²³ asi owalage oleelagitu eng’ tamirmirietab nautikwok,

²⁴ ak olaach chito ne leel, ne kigiyai eng’ Jehovah eng’ imanda ak tililindo ne bo iman.

Konetisiosiek che bo sobetab chi ne bo betusiek tugul

²⁵ Noto anyun oiste lembeita, ong’alaljinige ne bo iman chi tugul ak chitab kokwennyi: amu ki kebeberwek age tugul ne bo age.

²⁶ Onerech, amoyai tengek: amat kororokto asis kota onerektosi:

²⁷ amat ogochi boroindo oindet.

²⁸ Inendet ne kigochorso ko matata kochorso: ago kaigai kobois, koyai eng’ eunekyik noto mie, si kobiit kosich kit ne igochin inendet ne banani.

²⁹ Amat komong’une ng’olyo age tugul ne ya kutuswekwok, ago noto ne mie ne imuchi koteekso, ko u ye nyolu, si kobiit kogochi mieindo icheget che kasei.

³⁰ Ak amogochi arogenet Tamirmiriet ne Tilil ne bo Jehovah ne kigindaenak ng’okset agoi betutab katiaget.

³¹ Ingoistogei eng’ okwek ng’wanindo tugul, ak nyitatet, ak neregek, ak bolatet, ak chubisiet, koboto yaitiet tugul:

³² ak otebi eng’ talasiet okwege eng’ okwege, orirege, ak onyochinige kaat, ko u ye kinyoiywok kaat Jehovah agine eng’ Kristo.