EPESOEK 3 - BUKUIT NE TILIL

Boisietab Paulo kabarta ung’otietab Jehovah

¹ Amu nito ane Paulo, kimonjororiotab Kristo Jesu agobo okwek Bororiosiek,

² ngo kiogas agobo tononjinetab mieindab Jehovah ne kigigona agobo okwek;

³ ko u ye kigiborua eng’ ng’ang’utiet ung’otiet, ko u ye kiasib asir eng’ tai eng’ ng’alek che ng’ering’,

⁴ si, ye osomani, omuchi oguiye ng’omnatennyu eng’ ung’otietab Kristo;

⁵ ne kima kiborji werikab bik eng’ ibinwek alak ko u ye kageng’ang’ji nguno che kiyoktoi chechik che tililen ak maotik eng’ Tamirmiriet;

⁶ kele, Bororiosiek ko yamdoikab nametab tuguk, ak yamdoikab kebeberwekab borto, ak yamdoikab arorutiet eng’ Kristo Jesu eng’ logoiywek che miach,

⁷ che kigiyaena aek kiboitiot, ko u konunetab mieinoto bo Jehovah ne kigigona ko u ye boisiei kamuktaennyi.

⁸ Kigigona mieini, ane, ne a ming’in kosiir inendet ne ming’in eng’ che tililen tugul: aamji Bororiosiek magornatosiekab Kristo che maisiagaksei;

⁹ ak kiguiyechi bik tugul kit ne u tononjinetab ung’otiet ne kiga kiuny koboch kenyisiek che kigosiirto, eng’ Jehovah, ne kitoi koyai tuguk tugul;

¹⁰ si kobiit konaak eng’ kaniset nguno ng’omnatet ne o ne bo Jehovah eng’ laitornatosiek ak bounatosiek eng’ komoswekab kipsengwet,

¹¹ ko u magetab koigeny ne kisib kolewen eng’ Kristo Jesu Kiptaiyandennyo:

¹² kitinye eng’ inendet nyiganatet ak kamang’unet ne kirikyine inendet amu kiyani inendet.

¹³ Eng’ noto anyun asomok ale amat komeak mugulel amu nyalilwogikyuk agobo okwek, choto ko torornateng’wong’.

Saet si kiguiyo Logoiywek ch Miach

¹⁴ Amu nito anyun agutung’jini Kwanda,

¹⁵ ne nyorune inendet kainenywa oret age tugul ne bo gab chi, eng’ kipsengwet ak ng’ony,

¹⁶ si kobiit kogonok, ko u magornatosiekab torornatennyi, ogimegitu eng’ kamuktaet eng’ Tamirmiriennyi eng’ chito ne bo orit;

¹⁷ si kobiit komeny Kristo mugulelwekwok eng’ kayanet; si kobiit, ye otinye tigitik ak lumdaet eng’ chamnyet,

¹⁸ onyoru kimnatet oguiye koboto tugul che tililen ole te tebeesindo ak koindo ak tororindo ak loindo ne wendi ng’ony,

¹⁹ ak onai chamnyetab Kristo ne siirei naet, si kobiit kinyiitak nyiiet tugul ne bo Jehovah.

²⁰ Ingobunji anyun inendet ne imuchi koyai mising’ inne kosiir tugul che kisome anan che kibwati ko u kamuktaet ne boisiei eng’ achek,

²¹ torornatet eng’ kaniset ak eng’ Kristo Jesu agoi ibinwek tugul che bo koigeny ak koigeny. Amen.