EPESOEK 1 - BUKUIT NE TILIL

Kagatet

¹ Paulo, ne kiyoktoi ne bo Kristo Jesu eng’ magetab Jehovah, asirjini bik che tililen [che mi Epeso], koboto che bo kayanet eng’ Kristo Jesu:

² Ingoteb mieindo kobotok ak kalyet che bunu Jehovah Kwandanyo ak Kiptaiyat Jesu Kristo.

Kalosunet ne kilosu Jehovah

³ Iberurot Jehovah Kwandab Kiptaiyandennyo Jesu Kristo, inendet ne kigoberurech eng’ kaberuret age tugul ne bo tamirmiriet eng’ komoswekab kipsengwet eng’ Kristo:

⁴ ko u ye kilewenech eng’ inendet ye kitom kelumda ng’ony, si keegu che tililen che matinyei lelut eng’ tainnyi eng’ chamnyet:

⁵ ko u ye kiga sib kolewenech kenamech keegu werik eng’ Jesu Kristo eng’ inendet, ko u chamet ne mie ne bo magennyi,

⁶ agoi kalosunetab torornatetab mieindanyi, ne kigonech eng’ aiyebindo eng’ Chamanet:

⁷ ne kitinye eng’ inendet katiagennyo eng’ korotikyik, nyoetab kaat ne bo chalwogikyok, ko u magornatosiekab mieindanyi,

⁸ che kiyai kotesak eng’ achek eng’ ng’omnatet tugul ak naet,

⁹ ko kagoboruech ung’otiet ne bo magennyi, ko u chamennyi ne mie ne kichob eng’ inendet

¹⁰ agoi tononjinet ne bo ripsetab betusiek che yamegei, si koyum tuguk tugul eng’ Kristo, tuguk che mi kipsengwet, ak tuguk che mi ng’ony; eng’ inendet,

¹¹ ne kiyaech eng’ inendet keegu borotennyi, ko kasib kolewenech, ko u magetab inendet ne yaei tuguk tugul ko u kabwatetab magennyi;

¹² si kobiit keegu kalosunetab torornatennyi, achek che kiga kisib kimang’u Kristo.

¹³ Kiogas ak okwek eng’ inendet ng’olyotab imanit, logoiywek che miach che bo yetuneng’wong’ - eng’ inendet, ne kingo kaoyan, ko kiging’ochak eng’ Tamirmiriet ne Tilil ne bo arorutiet,

¹⁴ ne tongoaniatab borotennyo, agoi katiagetab borotennyi, eng’ kalosunetab torornatennyi.

Saet si konai bik Jehovah

¹⁵ Amu nito anyun, kingo kaagas agobo kayanet ne mi kwenung’wong’, eng’ Kiptaiyat Jesu, ak chamnyet eng’ tugul che tililen,

¹⁶ ko mata asis agoito kongoi agobo okwek, ak amwaok eng’ sautikyuk;

¹⁷ ale ingogonok Jehovah ne bo Kiptaiyandennyo Jesu Kristo, Kwanda ne bo torornatet, tamirmiriet ne bo ng’omnatet ak ng’ang’utiet eng’ naetab inendet;

¹⁸ ko kagokweng’ogis konyekab mugulelwekwok, si kobiit onai kit ne u kamang’unetab kuursennyi, ak magornatosiekab torornatet ne bo borotennyi eng’ che tililen,

¹⁹ ak kit ne u oindo ne siirtoot ne bo kamuktaennyi eng’ achek che kiyani, ko u boisionoto bo kimnatetab kamuktaennyi

²⁰ ne kiyai eng’ Kristo, ye kingong’eet inendet komong’ eng’ che kibek, ak konde inendet kotebe eunnyi ne bo tai eng’ komoswekab kipsengwet;

²¹ ne toror kosiir laitornatet tugul, ak bounatet, ak kamuktaet, ak kiptainatet, ak kainet age tugul ne mwaat, ma kityo eng’ kenyisiechu, ago eng’ choto bwanei:

²² ak kiinde tuguk tugul kogas it eng’ keldebesaikab kelyekyik, ak kogochi inendet koek metit eng’ tuguk tugul eng’ kaniset,

²³ noto ko bortanyi, nyiietab inendet ne inyiiti tugul eng’ tugul.