DANIEL 9 - BUKUIT NE TILIL

Kosaei Daniel eng’ sigunet agobo bikyik

¹ Ak kenyit ne bo tai ne bo Darius weritab Aasuerus, ne kisalu Medik, ne kiginde koek laitoriat koboi bounatetab Kaldeik;

² eng’ kenyit ne bo tai ne bo laitornatennyi, aguiye ane Daniel eng’ bukuisiek koitetab kenyisiek che kinyonjine ng’olyotab Jehovah maotiot Jeremia, agobo kasuldaetab ng’emisiosiekab Jerusalem, choto ko kenyisiek tamanwogik tisab.

³ Ak kiatokyige Kiptaiyat Kamuktaindet, ale acheng’ inendet eng’ saet ak somutik, koboto karugutetab ge, ak kalaagetab kuiniok, ak eng’ orek.

⁴ Ak kiasa Jehovah Kamuktaindennyu, ak ang’ang’ji inendet ale, Ee Kiptaiyat, Kamuktaindet ne o ne kiywei, ne ribei kayomiset ak rirenet eng’ ichek che chamei inendet ak koribei ng’atutikyik;

⁵ kigeyai tengekto, kigeyai kit ne imaasat, ak kigeyai kit ne ya kot, ak kigingelelse, kemaste kemete konetisiosieguk ak kiruogutiguk;

⁶ ama kigas it otwogiguk maotik, che king’alalji eng’ kaineng’ung’ laitorinikyok, bounikyok ak kwanisiekyok, ak bik tugul che bo emet.

⁷ Ee Kiptaiyat, neng’ung’ imanda, ago nenyo kalilanet, ko u ra; koboto bikab Juda, ak bik che menyei Jerusalem ak Israel tugul, che negit ak che mi ole loo, eng’ emotinwek tugul ole kiionji, amu chalwoktanywa ne kigoyaun.

⁸ Ee Kiptaiyat, nenyo kalilanet, koboto laitorinikyok, bounikyok, ak kwanisiekyok, amu kigeyaun tengekto.

⁹ Bo Kiptaiyat Kamuktaindennyo rirenosiek ak nyoetab kaat; amu kigingelelji inendet;

¹⁰ ama kigas it kutitab Jehovah Kamuktaindennyo, kebendate ng’atutikyik, che kiinde tainnyo eng’ otwogikyik maotik.

¹¹ Ee, kigobistoe Israel tugul ng’atutieng’ung’, komasta, si magas it kuting’ung’: kigerong’jech anyun chubet amu noto, koboto kayosiet ne kigisirji Ng’atutikab Musa otwogindetab Kamuktaindet, amu kigeyachi inendet tengekto.

¹² Ak kigogimit ng’alekyik, che kimwa agobo achek, ak agobo kiruogikyok che kiiruokwech koibwech yaitiet ne o: amu tom keyai eng’ kureret komugul ne bo kipsengwet kit ne kigiyachi Jerusalem.

¹³ Kanyonjech yaitioni tugul ko u ye sirat eng’ Ng’atutikab Musa, ago tom kesom chametab Jehovah Kamuktaindennyo, si kobiit kemete tengekwogikyok, ak kenai ole teptoi imandang’ung’.

¹⁴ Kirib anyun Jehovah yaitiet agoi betut ne kiibwech: amu bo iman Jehovah Kamuktaindennyo eng’ boisionikyik tugul che yaei, ago ma kigas it kutinnyi.

¹⁵ Ara anyun, ee Kiptaiyat Kamuktaindennyo, ne kiimutu biguk eng’ eut ne kim, komong’ eng’ emetab Misri, ak kiisikyige teegisto, ko u rani; kigeyai tengekto, kigeyai kit ne ya kot.

¹⁶ Ee Kiptaiyat, asain ale, ingoistoegei neregeguk, neregeguk che ng’wonen, nganaseng’ung’ Jerusalem, tulweng’ung’ ne tilil, ko u eng’ imandang’ung’ tugul: kigoek Jerusalem koboto biguk, che kichotei eng’ tugul che mitei komoswek tugul, amu tengekwogikyok, ak amu yaitwogikab kwanisiekyok.

¹⁷ Ara anyun, ee Kamuktaindennyo, kas saetab otwogindeng’ung’, ak somutikyik, amu kainetab Kiptaiyat, ak ingoluuchi togeng’ung’ oldang’ung’ ne tilil ne kogoguber.

¹⁸ Ee Kamuktaindennyu, eb it ak igas; tokyi konyeguk, ak igeer banandanyo, ak nganaset ne kimwaitoe kaineng’ung’: amu ma kiibu somutikyok kobwa taing’ung’ amu imandanyo, ago amu rirenosieguk che eechen.

¹⁹ Ee Kiptaiyat, kas; ee Kiptaiyat, nyochi kaat; ee Kiptaiyat, kas ak iyai; amegage; agobo kaineng’ung’, ee Kamuktaindennyu, amu kimwaitoe kaineng’ung’ nganaseng’ung’ ak biguk.

Koibu Gabriel wolumer

²⁰ Ak ye kita ang’alali, ak asae, ak ang’anye tengektanyu, ak tengektab bikyuk Israel, ak aibe somennyu kwo taitab Jehovah Kamuktaindennyu agobo tulwet ne tilil ne bo Kamuktaindennyu;

²¹ ee, ye kita ang’alali eng’ saet, kotwaa chichoto Gabriel, ne kitirirenu kochogu, ne kiga ageer eng’ tai eng’ ng’ang’utiet, konyo kotwaa eng’ olo bo sait ne kigoitoe kagochinetab koskoleny.

²² Ak kiiguiyewa, ak kong’alalwa, ak kolenja, Ee Daniel, kanyo si kobiit agonin iegu ne utat eng’ kaguiyet.

²³ Kimong’ ng’atutiet eng’ taunetab somutiguk, ak kanyo amwaun, amu i chamat mising’: ibwat anyun komie ng’olyondoni amu noto, ak iguiye ng’ang’utiet.

²⁴ Kaging’atyi biguk wigisiek tamanwogik tisab koboto nganaseng’ung’ ne tilil, si kiges bistoet, ak kiges tengekwogik, ak keyai katuiyet agobo tengekto, ak keib imanda ne bo koigeny, ak keng’och ng’ang’utiet ak maoinatet, ak kiil, kitaban ole tilil mising’.

²⁵ Nai anyun ak iguiye ile koboch ngab komong’ ng’atutiet kele kituur ak keteech Jerusalem, keteekyi inendet ne iilat, bounindet, koegu wigisiek tisab: ak keteech kogeny eng’ wigisiek tamanwogik lo ak aeng’, koboto oret ak keringet ne yiemei nganaset, eng’ betusiekab nyalilda.

²⁶ Ak ye ibata wigisiek tamanwogik lo ak aeng’ keisto inendet ne iilat ama kotinyei kiy: ak kobwa bikab bounindet kong’em nganaset ak ole tilil; ak nyonei kagesunennyi koboto maranet, ak egu luget agoi let; kigeng’at ng’emisiosiek.

²⁷ Ak koyomisgei koboto bik che chang’ eng’ kayomiset ne kim ne bo wigit agenge: ak koges tiseiywot ak kagochinetab busiek eng’ kwenutab wigit; ak konyo age ne ibu ng’emisiet eng’ kebepchetab tuguk che kiwechei; ak kerong’ji ng’emindet neregek che kigeng’at, agoi kagesunet.