DANIEL 8 - BUKUIT NE TILIL

Ng’ang’utietab Daniel agobo mengit, kwesta ak kuinet

¹ Kinyonja ane Daniel, ng’ang’utiet ne u ne kiga ageer eng’ tai, eng’ kenyit ne bo somok ne bo laitoriat Belsasar.

² Ak kiageer ng’ang’utiet, ak kingageere, ami Susan, nganaset ne o, ne mi emetab Elam; ak kiageer eng’ ng’ang’utionoto ami ole negite ainet Ulai.

³ Yeityo ayot met, ak ageer, ak ogeero, kitonon eng’ ngegutab ainet mengit ne kitinyei kuinoik aeng’: ak ki koen kuinoichoto aeng’u; ago ki koi age kosiir age, ak kimong’u let noto koi.

⁴ Kiageer mengoto kotoortoisiei kotokyigei cherongo, ak murot ne bo katam, ak murot ne bo tai; ama imuch tiong’ik kotononso eng’ tainnyi, ama biit ne kiimuch kosor eng’ eunnyi; ago kiyai ko u ye machei, ak koeetgei.

⁵ Ak ye kita abwati, ogeero, komong’ kwesta eng’ cherongo ne kiyom ng’ony komugul, ak kima kotiinyei ng’ony: ak kitinyei kweata kuinet ne toogunot eng’ kwenutab togennyi.

⁶ Ak kinyo ole mi mengit ne kitinyei kuinoik aeng’, ne kiageer kotonone ngegutab ainet, ak kilabat kweata kwo korieb mengit eng’ neregekyik che ng’wonen che bo kimnatennyi.

⁷ Ak kiageer inendet korikyi mengit, ak konerekyi mising’, ak kokwer mengoto, ak koiri kuinoikyik tuwai; ko mata kosich anyun kimnatet kotonon eng’ tainnyi: ago kiwirta kwo ng’ony, ak kotiech; ama biit chi ne kiimuch kosor mengit eng’ eunnyi.

⁸ Ak kieetgei kwesta mising’: ak ye kingo kagogimit, koil kuinet ne o; ak kimong’ kuinoik ang’wanu che toogunotin kotokyigei usonaik ang’wan che bo kipsengwet, kogeer ni ka bo tai.

⁹ Ak kimong’une kuinet ne ming’in age eng’ kuinoichoto, ne kieet mising’, kotokyigei murot ne bo tai, ak kong’asis, ak emet ne kararan mising’.

¹⁰ Ak kieet mising’, kot koit ole mi lugetab kipsengwet; ak kiturur kuinonoto alak che bo luget koboto alak eng’ kecheik, ak kotiech.

¹¹ Ee, kiieetgei, kot koit ole mi bounindetab luget; ak koistoe inendet kagochinet ne kibeelei ne bo kotugul, ak kigibut oldanyi ne tilil.

¹² Ak kigigochi inendet luget koboto kagochinet ne kibeelei ne bo kotugul amu bistoet; ak kiwirji ng’ony imanda, ak kiyai ko u ye kimach ak konyor borotet.

¹³ Kiagas anyun inendet ne tilil kong’alali; ak kiteebe age ne tilil noto kang’alali, kolenji, Tebyei kot kotianit ng’ang’utiet agobo kagochinet ne kibeelei, ak bistoet ne ng’emisiei, si kigoito ole tilil koboto luget ketiechatiech?

¹⁴ Ak kilenja, kitilili ole tilil ko kagogesgei koskoleng’usiek ak karonusiek elfusiek aeng’ ak bogol somok.

Koweegu Gabriel ng’ang’utiet

¹⁵ Ak kingo kaageer ane Daniel ng’ang’utionoto, acheng’ anyun ale aguiyo; ak ogeero, kitonon eng’ tainnyu itonda ne u ne bo chi.

¹⁶ Ak kiagas kutitab chito eng’ kwenutab ainet Ulai, ne kiguurso kole, Gabriel, iborji chichi koguiyo ng’ang’utiet.

¹⁷ Kirik anyun ye kiatonone; ak kingoit ole ami, aiyweisie, ak abut kot kotiiny toget ng’ony: ago kilenja, Ee, weritab chi, iguiye anyun; amu bo ng’ang’utionito betusiek che bo let.

¹⁸ Kingota kong’alalwa, anuuch mising’, asieb mo: ago kitwaa ak kong’eeta.

¹⁹ Ak kile, Keero, aborun inai tuguk che tun biitu let che bo neregek: amu bo ng’ang’utionoto betut ne kiging’at ne bo let.

²⁰ Mengit ne kaigeer ne tinyei kuinoik aeng’ ko laitorinikab Media ak Persia.

²¹ Ak kwesta ko laitoriatab emetab Yunanik, ak kuinet ne o ne mi kwenutab togennyi ko laitoriat ne bo tai.

²² Ak kuinonoto kiil, eng’ ole kitononie choto ang’wanu, ko tun biitune yoto bounatosiek ang’wanu che mong’une bororiet, ago ma eng’ kimnatennyi.

²³ Ak eng’ betusiek che bo let che bo bounatenywa, ye kagoyam bistoetab bistoik, kobiit laitoriat ne tong’ony togoch, ne iguitos ng’alek che ung’otin.

²⁴ Ak tesoksei kimnatennyi, ago ma eng’ kimnatennyi; ak kong’emis ne kikwong’e, ak konyor borotet ak koyai ko u ye machei: ak kong’em che nyigonen ak bik che tililen.

²⁵ Ak kogochi kaberberisiet konyor borotet eng’ ng’alsennyi; ak koeetgei eng’ muguleldanyi, ak kong’em che chang’ komi kalyenywa: ak koborie bounindetab bounik; ak ilei inegei ama twa chi.

²⁶ Ak bo iman ng’ang’utietab koskoleng’usiek ak karonusiek ne kagemwa: ago tuch inye ng’ang’utionoto; amu bo betusiek che chang’ che bwanei.

²⁷ Ak kiatanui ane Daniel, amian betusiek alak; ye ibata, ang’eet, ak ayai boisietab laitoriat: ak kiakwong’e ng’ang’utionoto, ago ma biit chi ne kiiguiyo.