DANIEL 7 - BUKUIT NE TILIL

Karuotitoetab Daniel agobo tiong’ik ang’wan

¹ Kiiruotyi Daniel karuotitoet, ak kobwanji metinnyi ng’ang’utik eng’ itogunnyi eng’ kenyit ne bo tai ne bo Belsasar laitoriatab Babulon: kisir anyun ng’alekab karuotitaonoto, ak komwaita ng’alek che eechen che bo karuotitaonoto.

² Kimwa Daniel kole, Kiageer eng’ ng’ang’utiennyu kemoi, ogeero, kiusyi nyanjet ne o usonaik ang’wanu che bo kipsengwet.

³ Ak kitogosune nyanjet tiong’ik ang’wanu che eechen, ki ter age eng’ age.

⁴ Ki u ne bo tai ng’etundo, ak kitinyei kebebaik che u che bo kipsichit: kiageer agoi kesul kebebaikyik, ak kigiganab eng’ ng’ony, ak keng’at kotonone kelyek aeng’ ko u chito, ak kigigochi naet ne u ne bo chito.

⁵ Ak ogeero, tiondo age, ne bo aeng’ ne u keerit, ak kigiganab kotonone komosak, ak kitinyei karaswek somok eng’ kutinnyi: ak kigimwachi ko u ni, kelenji, Ng’eet, am banyek che chang’.

⁶ Kingobata nito, ageer, ak ogeero, tiondo age ne u cheblanget, ne kitinyei eng’ batai kebebaik ang’wan che u che bo taritiet; kitinyei kogeny tionyoto metowek ang’wan; ak kigigochi bounatet.

⁷ Kingobata nito, ageer eng’ ng’ang’utik kemoi, ogeero, tiondo ne bo ang’wan ne imuisei ak ko kim, ak kotinyei kimnatet ne siirtoot; ak kitinyei kelek che eechen che bo karik: kiam, ak kotonaton, ak kotiechatiech che king’et: ak ki ter tionyoto eng’ tiong’ik tugul che kiindoune inendet; ak kitinyei kuinoik taman.

⁸ Kiabwat mising, agobo kuinoichoto, ak ogeero, kimong’une kuinet age ne ming’in, kuinoichoto, ne kigitutune tainnyi kuinoichoto bo tai somok: ak ogeero, kimi kuinonoto konyek che u che bo chi, ak kutit ne mwaei tuguk che eechen.

Inendet ne bo Keny

⁹ Kiageer kot kinde ng’echerokab laitornatet, ak kitebe ng’echeranato inendet ne bo keny: ak ki leelach ngoroikyik ko u teluchi, ak ki u sumeekyik kororik che tililen che bo kechirek; ko bo ng’echerennyi ne bo laitornatet liblibenosiekab mat, ak ki mat ne lalei cheptirokyik.

¹⁰ Kibiit ainet ne u mat ne kimong’une tainnyi: kiboisiechin inendet elfusiek konyil elfut, ak kitonondos eng’ tainnyi elfusiek tamanu konyil elfusiek taman: kigichob kiruoget, ak kiging’any bukuisiek.

¹¹ Kiatang’any eng’ betunoto amu ng’alek che eechen che kimwaei kuinonoto; kiageer agoi kebar tionyoto, ak keng’em bortanyi, ak kigoito kebeel eng’ mat.

¹² Ak kigiistoe tiong’ik che king’et, bounatenywa: ago kigitesyi betusiekab sobenywa ak kenyisiek.

Weritab chi

¹³ Kiageer eng’ ng’ang’utikab kemoi, ogeero, kinyo eng’ bolikab kipsengwet, age ne kergei ak weritab chi, ak kinyo ole mi inendet ne bo keny, ak kigimut inendet korik taitab inendet ne bo keny.

¹⁴ Ak kigigochi inendet bounatet, ak torornatet, ak laitornatet, si koot inendet bik tugul, bororiosiek tugul, ak che bo kutuswek tugul: bounatennyi ko bounatetab koigeny, ne ma igesugei, ak ma tun king’emei laitornatennyi.

Kaweeksetab karuotitoet

¹⁵ Ago kiarogen ane Daniel eng’ tamirmiriennyu, ak kiima ng’ang’utik che kibwa metinnyu.

¹⁶ Kiarikyi age eng’ choto kitonondos eng’ yoto, ak atebe inendet kaguiyetab tuguchuto tugul. Komwawa anyun, ak koborua kaweeksetab tuguchoto.

¹⁷ Tiong’ichuto ang’wan eechen, ko laitorinik ang’wan che tun mong’une ng’ony.

¹⁸ Ago tun taachei bounatet bik che tililen che bo Inendet ne Toror Mising’, ak konam bounatet kobunji ichek koigeny ak koigeny.

¹⁹ Yeityo amach anai kaguiyetab tiondo ne bo ang’wan, ne ki ter eng’ tiong’ichun tugul, ne kiimuisei mising’, ne ki bo kelekyik karik, ak ki bo siokyik sugunwet; ne kiam, ak kotonaton, ak kotiechatiech che king’et;

²⁰ ak kiamach anai agobo kuinoik taman che kimi metinnyi, koboto kuinet age ne kimong’, koboto kutit ne kimwaei tuguk che eechen, ne kieet itondanyi kosiir ne bo chun alak.

²¹ Kiageer koyai luget kuinonoto koboto bik che tililen, ak koterter kuinonoto ichek;

²² agoi konyo inendet ne bo keny, ak koruoch agobo bik che tililen che bo Inendet ne Toror Mising’, ak koit betut ne bunjin bounatet bik che tililen.

²³ Kimwa anyun ko u ni, kole, Egu tionyoto bo angwan bounatet ne bo ang’wan eng’ ng’ony, ne egu ne ter eng’ bounatosiek tugul, ak amei ng’ony komugul, ak kotiekyi ng’ony, ak kotonaton.

²⁴ Ak eng’ kuinoichuto taman, komong’une bounatonito laitorinik tamanu: ak ye ibata komong’ age ne isubu ichek; ak egu ne ter eng’ che bo tai, ak koterter laitorinik somok.

²⁵ Ak komwa ng’alek che kirindoi Inendet ne Toror Mising’, ak koiim mising’ bik che tililen che bo Inendet ne Toror Mising’: ak kilen inendet kowal betusiek ak ng’atutik; ak kigochi koboi agoi kobek kenyit, ak kenyisiek, ak kebebertab kenyit.

²⁶ Ago kichobei kiruoget, ak kerebe bounatennyi, si koges ak kong’em agoi kagesunet.

²⁷ Ak tun kigochin bikab bik che tililen che bo Inendet ne Toror Mising’, laitornatet ak bounatet, ak oindab laitornatosiek che mi kureretab kipsengwet komugul: laitornatennyi ko laitornatet ne bo koigeny, ak tun otei inendet bounatosiek tugul, ak kogase it.

²⁸ Igesunegei yuto ng’olyondonoto. Kiima mising’ kabwatutikyuk, ane Daniel, ak kiwalak togennyu: ago kiagonore muguleldanyu ng’olyondonoto.