DANIEL 6 - BUKUIT NE TILIL

Koeeti Darius Daniel

¹ Kicham Darius konde bounik bogol agenge ak tiptem, koboi bounatet komugul;

² ak kiinde boisiek somok che kandoik koboi ichek, ne ki Daniel age eng’ ichek; si koibei bounik ng’alek koipchin ichek, si mabet kiy ne bo laitoriat.

³ Kigigonyit anyun Daniel kosiir boisiechoto ak bounik, amu kitinyei tamirmiriet ne mie mising’; ak kiibwat laitoriat kole konde inendet koboi bororiet komugul.

Chaamset ne kigichaam Daniel

⁴ Kicheng’ anyun boisiechoto koboto bounik kochaam Daniel agobo bounatet; ago ma imuch konyorji inendet ng’olyo anan ko lelut; amu ki bo iman inendet, ama kinyorji kiy ne ma litit anan ko lelut.

⁵ Kole anyun bichoto, Maginyorjini Danielini kiy ne kigikyine, kobate eng’ ng’atutietab Kamuktaindennyi.

⁶ Kiiyumgei anyun eng’ kayanjinet boisiechoto koboto bounik, koyumjigei laitoriat, ak komwachi inendet ko u ni kole, Laitoriandani Darius, sob agoi.

⁷ Kogong’alaljigei boisiek tugul che bo bounatet, kiptainik, ak bounik, bikab kapkiruok ak kiruogik, kole kogimit ng’atutiet ne bo kaplaitoriat, ak kong’at ng’atutiet ne kim, kole, age tugul ne somei kiy cheptalelit age tugul anan ko chi eng’ betusiek sosom, kobatenen, inye, ee laitoriat, kewirjin keringetab ng’etunyik.

⁸ Igimit anyun ng’atutiet, ee laitoriandani, ak isir kaineng’ung’ eng’ sirutichoto, si ma kiwal, ko u ng’atutietab Medik ak Persik, ne ma walaksei.

⁹ Kisir anyun laitoriat Darius kainennyi eng’ sirutichoto, koboto ng’atutiet.

¹⁰ Ak kingonai Daniel kole kagosir laitoriat kainet ko u noto, eng’ sirutichoto, kwo gonnyi; (ki yatotin tirisiok eng’ gonnyi, che tokyingei Jerusalem;) ak kogutuny konyil somok eng’ betut, ak kosa, komwachi kongoi Kamuktaindennyi, ko u ye kocham koyaei.

¹¹ Kiiyumgei anyun bichoto eng’ kayanjinet, ak konyor Daniel kosaei Kamuktaindennyi ak korirjin.

¹² Kirik anyun bichoto, ak kong’alal eng’ taitab laitoriat agobo ng’atutietab laitoriat, kolenji, Tos kima isir kaineng’ung’ eng’ ng’atutiet ile, chi age tugul ne somei kiy cheptalelit age tugul anan ko chi eng’ betusiek sosom, kobatenen inye, ee laitoriandani, kewirjin keringetab ng’etunyik? Kowol laitoriat kole, Bo iman kiito, ko u ng’atutietab Medik ak Persik, ne ma walaksei.

¹³ Kiwol anyun bichoto eng’ taitab laitoriat kole, Maiitin Daniel-inoto ne bo lagokab bik che kigiluul che bo Juda, ee laitoriandani, anan koiit ng’atutiet ne kiisir kaineng’ung’, ago saei konyil somok eng’ betut.

¹⁴ Kingogas anyun laitoriat ng’alechuto, koarogen, ak komach kotiach Daniel: ak kitiem kole kosor inendet agoi kororokto asis.

¹⁵ Kiiyumgei anyun bichoto eng’ kayanjinet koyumjigei laitoriat, ak kolenji laitoriat, Ee laitoriandani, nai ile ng’atutietab Medik ak Persik ko magiwalei ng’atutiet anan etanutik che igimiti laitoriat.

Ketoorjin Daniel keringetab ng’etunyik

¹⁶ Kong’at anyun laitoriat ng’atutiet, ak kigimut Daniel, ak kewirji keringetab ng’etunyik. King’alalji laitoriat Daniel kolenji, Sorun Kamuktaindeng’ung’ ne iote kotugul.

¹⁷ Ak kigiib koita, ak kegere kurgetab keringet; ak king’och laitoriat eng’ ng’oksennyi, koboto ng’oksetab kiptainikyik; si ma kiwal kiy agobo Daniel.

¹⁸ Kiwa anyun laitoriat gonnyi ne bo laitornatet, ak korugutgei kemounoto: ama kiib tugukab tienwogik koba tainnyi: ak am inuuch.

Kesoru Daniel

¹⁹ King’eet anyun laitoriat karon mising’, ak kwo kochakta ole mi keringetab ng’etunyik.

²⁰ Ak kingorikta anyun keringet ole mi Daniel, kowaach laitoriat eng’ arogenet: king’alal laitoriat kolenji Daniel, Ee Daniel, otwogindetab Kamuktaindet ne sobei, tos imuchi Kamuktaindeng’ung’ ne iote kotugul kosorun eng’ ng’etunyik?

²¹ Kolenji anyun Daniel laitoriat, Ee laitoriandani, sob agoi.

²² Koiyok Kamuktaindennyu malaikaiyandennyi koger kutuswekab ng’etunyik, ama ita kiy: amu ma kinyorja kiy ne ya eng’ tainnyi; ak kogeny, tom ayai kiy ne ya eng’ taing’ung’, ee laitoriandani.

²³ Kibaibait anyun laitoriat mising’, ak kong’at kole kegonob Daniel eng’ keringet. Kigigonob anyun Daniel eng’ keringet, ama kinyor ole koam kiy eng’ bortanyi, amu kiimang’u Kamuktaindennyi.

²⁴ Ak king’at laitoriat ng’atutiet, ak kigimut bichoto kiitaami Daniel, ak kewirji ichek keringetab ng’etunyik, icheget koboto lagokwak, ak osotikwak; ak kital ng’etunyik ichek, ak kotonaton kowekwak tugul kotom koit keringet orit.

²⁵ Kisirji anyun laitoriat Darius bik, ak bororiosiek tugul ak che bo kutuswek tugul, che menyei ng’ony komugul; kolenji, Ingotesak kalyet eng’ okwek.

²⁶ Ang’ate ng’atutiet ale, Ingobotanso bik che mi bounatetab laitornatennyu ak koiyweis eng’ taitab Kamuktaindetab Daniel: amu inendet ko Kamuktaindet ne sobei, ak kotebyei koigeny, ak laitornatennyi ko maging’emei, ak kotebyei bounatennyi agoi kagesunet:

²⁷ itiachi ak kosoru, ak koyaei kaborunoik ak kwong’utik eng’ kipsengwet ak ng’ony; inendet ne kogosor Daniel eng’ kimnatetab ng’etunyik.

²⁸ Kinyor anyun Daniel-inito borotet eng’ laitornatetab Darius, ak eng’ laitornatetab Kirus Persiaindet.