DANIEL 5 - BUKUIT NE TILIL

Igortab Belsasar

¹ Kiyachi laitoriat Belsasar igorta ne o kiptainikyik elfut, ak koeei divaik eng’ taitab bichoto elfut.

² Ye kita koeei Belsasar Divaik, kong’at keib terenik che bo tahabu ak che bo feda che kiibu Nebukadnesar kwandanyi eng’ hekalut ne kimi Jerusalem; si kobiit koeeise laitoriat ak kiptainikyik, osotikyik ak chebaigeinikyik.

³ Kigiib anyun terenik che bo tahabu che kigibune hekalut, gotab Kamuktaindet, ne kimi Jerusalem; ak kieeise laitoriat ak kiptainikyik, osotikyik, ak chebaigeinikyik.

⁴ Kiee divaik ak kolos kanamonikab tahabu, ak che bo feda, che bo sugunwet, che bo karik, che bo ketik, ak che bo koik.

Sirutik che mi inat

⁵ Kitook eng’ sainato morikab eutab chito, ak kisir inatutab gotab laitoriat kotokyigei tait: ak kigeer laitoriat eunoto kisirisiei.

⁶ Kowalak anyun togetab laitoriat, ak koiim inendet kabwatutikyik; ak kiirigisis ole tuiyechin kowekab suennyi, ak kibirgei kutung’oikyik.

⁷ Kiguurso anyun laitoriat eng’ kutit ne o kimut ng’omotikab kecheik, Kaldeik ak kipsogeinik. King’alalji laitoriat bik che ng’omen che bo Babulon, kolenji, Chi age tugul ne somani sirutichu, ak koborua kaweeksennyi, kilaakyin ngoriet ne arus ne birir, ak kilaakyi kaatinnyi sirimdab tahabu, ak koek bounindet ne bo somok eng’ bounatet.

⁸ Kibwa anyun bik tugul che ng’omen che bo laitoriat; ago ma imuch kosoman sirutichoto, anan koborji laitoriat kaweekset.

⁹ Kiimak mising’ anyun laitoriat Belsasar, ak kiwalak togennyi, ak kiimogis kiptainikyik.

Keguurei Daniel ak koweechi inendet sirutichoto

¹⁰ Kinyo anyun chebiosetab gab laitoriat gotab igorta amu ng’alekab laitoriat ak kiptainikyik: king’alal chebiosanato kole, Ee laitoriandani, sob agoi; amatingoiimin kabwatutiguk, anan kowalak togeng’ung’:

¹¹ mitei chito eng’ bounateng’ung’ ne menyei tamirmirietab cheptalelisiek che tililen; ak kiginyorji chichoto eng’ betusiekab kwandang’ung’ lapkeiyet ak naet ak ng’omnatet, ne u ng’omnatetab cheptalelisiek: ak kiinde laitoriat Nebukadnesar kwandang’ung’, ne inendet ko laitoriat kwandang’ung’, kiinde inendet koek kiptaiyatab bik che ng’omen che ng’orsei, ng’omotikab kecheik, Kaldeik ak kipsogeinik;

¹² Amu kiginyorji Daniel tamirmiriet ne mie kot, ak naet, ak kaguiyet, kaweeksetab karuotitaosiek, ak ng’ang’etab ng’alek che ung’otin, ak kaborunetab tuguk che iimi bich, ne kiguure laitoriat Beltesasar. Iyokte anyun keguur Daniel, si kobor inendet kaweekset.

¹³ Kigimut anyun Daniel konyo taitab laitoriat. King’alal laitoriat kolenji Daniel, Tos i Daniel, ne i bo lagokab bik che kigiluul che bo Juda, che kiimutu laitoriat kwandanyu eng’ Juda?

¹⁴ Koagas agobo inye kele menyin tamirmirietab cheptalelisiek, ak kele itinye lapkeiyet ak naet ak ng’omnatet ne siirtoot.

¹⁵ Ak kagimut bik che ng’omen, ng’omotikab kecheik, kobwa tainnyu, si kobiit kosoman sirutichuto, ak koborua kaweeksenywa: ago ma imuch kobor kaweeksetab kioto.

¹⁶ Ago koagas agobo inye kele imuchi iboru kaweeksosiek, ak iboru tuguk che iimi bich: ngot imuchi anyun isoman sirutichuto, ak iborua kaweeksennyi, kilaagun anyun ngoroik che arusen ne birir, ak kilaakyi kaating’ung’ sirimdab tahabu, ak iegu bounindet ne bo somok eng’ bounatet.

¹⁷ Kowolji anyun Daniel laitoriat kolenji, Ingobunjin kagochinoiguk, ak igochi melekweguk chito age; ago asomanjini laitoriat sirutichoto, ak aborjini inendet kaweekset.

¹⁸ Ee laitoriandani, kiigochi Kamuktaindet ne Toror Mising’ Nebukadnesar kwandang’ung’ bounatet, ak oindo, ak torornatet, ak etunatet:

¹⁹ kibotanso ak koiyweis eng’ tainnyi bik tugul, bororiosiek tugul, ak che bo kutuswek tugul, amu oindo ne kiigochi inendet: kibarei ne kimachei kobar, ak kibagaktoi kosob ne kimakyin kosob; kiieeti ne kimachei koeet, ak kiiming’ini ne kimachei koming’in.

²⁰ Ago ye kingoeetgei eng’ muguleldanyi, ak kouuiit tamirmiriennyi koboisie menotet, kechoor eng’ ng’echerennyi ne bo laitornatet, ak kerebe torornatennyi:

²¹ ak kigion kwo eng’ ole mi bik; ak kigiyai naennyi koigei ne bo tiong’ik, ak kimeny koboto sigirokab timin; ak kigibae suswek ko u tuga, ak kiibutyi rewot bortanyi: agoi konai kole bou Kamuktaindet ne Toror Mising’ bounatetab bik, ak kogochin age tugul ne makyin koboi.

²² Ak ma iming’inge inye werinnyi, ee Belsasar, eng’ muguleldang’ung’, nganda kiingen tuguchuto tugul;

²³ ago kiietge obelge ak Kiptaiyat ne bo kipsengwet; ak kogeib terenikab gonnyi kobwa taing’ung’, ak kooee divaik, inye ak kiptainiguk, osotiguk ak chebaigeiniguk; ak koilosu kanamonikab feda, ak che bo tahabu, che bo sugunwet, che bo karik, che bo ketik, ak che bo koik, che mageertoi, ama kastoi, amaingen kiy: ama itoror Kamuktaindet ne tinyei kabuseng’ung’ eng’ eunnyi, ak chechik ortinweguk tugul:

²⁴ kogiyok anyun eut ne bunu tainnyi, ak kogisir sirutichu.

²⁵ Chu sirutik che kogisir: MENE, MENE, TEKEL, UPHARSIN.

²⁶ Ni anyun ko kaweeksetab kiito: MENE; kagoiit Kamuktaindet bounateng’ung’, ak koges.

²⁷ TEKEL; kagirogendoenen eng’ kit ne kirogendoisie, ak kagegeer kele ma ko i tia.

²⁸ PERES; kagepchei bounateng’ung’, ak kagigochi Medik ak Persik.

²⁹ King’at anyun Belsasar ng’atutiet, ak kolaakyi bik Daniel ngoriet ne arus ne birir, ak kolaakyi kaatinnyi sirimdab tahabu, ak komwaita agobo inendet kole, egu bounindet ne bo somok eng’ bounatet.

Koterteri Darius Medindet Babulon

³⁰ Kigibar kemounoto Belsasar laitoriatab Kaldeik.

³¹ Ak kinam Darius Medindet laitornatet, ko bo olo bo kenyisiek tamanwogik lo ak aeng’.