DANIEL 4 - BUKUIT NE TILIL

Karuotitoetab Nebukadnesar agobo ketit

¹ Kamwachi ane laitoriat Nebukadnesar bik tugul, bororiosiek tugul, ak che bo kutuswek tugul, che menyei ng’ony tugul; alenji, Ingotesak kalyet eng’ okwek.

² Kiageer ale mie abor kaborunoik ak kwong’utik che kiyaiywa Kamuktaindet ne Toror Mising’.

³ Eechen ne tia kaborunoikyik! Ak kimen ne tia kwong’utikyik! Laitornatennyi ko laitornatet ne bo koigeny, ak ko bo bounatennyi ibinwek tugul.

⁴ Kiamuunyi ane Nebukadnesar eng’ gonnyu, ak atalbisi eng’ gonnyu ne bo laitornatet.

⁵ Kiaruotyi karuotitoet ne kiimua; ak kiima kabwatutik ak ng’ang’utik che kibwanja ami itogunnyu.

⁶ Kiang’at anyun ng’atutiet ale kimut bik tugul che ng’omen che bo Babulon kobwa tainnyu, si kobiit koborua kaweeksetab karuotitoet.

⁷ Kibwa anyun bik che ng’omen che ng’orsei, ng’omotikab kecheik, Kaldeik ak kipsogeinik: ak kiamwachi ichek karuotitaonoto; ago ma iborua kaweeksennyi.

⁸ Ago eng’ let, konyo Daniel tainnyu, ne kigiguure Beltesasar, ko u kainetab cheptalelinnyu, ne menyei tamirmirietab cheptalelisiek che tililen: ak kiamwachi inendet karuotitaonoto, alenji,

⁹ Ee Beltesasar, bounindetab bik che ng’omen che ng’orsei, amu angen ale menyin tamirmirietab cheptalalisiek che tililen, ama mi ung’otiet ne iimin, mwawa anyun ng’ang’utikab karuotitoennyu che kiageer, ak kaweeksennyi.

¹⁰ Ki u chu ng’ang’utik che kibwanja ami itogunnyu; kiageer, ogeero, ketit ne komi kwenutab ng’ony, ak ki o koindab tononennyi.

¹¹ Kieet ketoto, ak kogimit, ak kiit kipsengwet walinnyi, ak kitook ketoto eng’ tabanwek tugul che bo ng’ony.

¹² Ki kororon sogekyik, ak ki chang’ logoekyik, ak kitinyei amitwogik che yamei bik tugul: kiuure tiong’ikab timin, ak kimeny taritikab barak temenikyik, ak kigibae ketoto bik tugul.

¹³ Ak kiageer eng’ ng’ang’utik che kibwanja ami itogunnyu, ak ogeero, kichorgei ribindet ne tilil kobunu kipsengwet.

¹⁴ Kimwa eng’ kutit ne o ko u ni kole, Oeb ketoto, ak oeb temenikyik, otumdum korara sogekyik, ak oseer logoekyik: ingoba tiong’ik eng’ kelunnyi, ak koba taritik eng’ temenikyik.

¹⁵ Ago obagakte musukyennyi eng’ ng’ony, ko miroot eng’ karnet ak sugunwet, eng’ ole mi suswek che ng’orng’or; si kobutyi rewot ak kotebi koboto tiong’ik che agetos:

¹⁶ ingowalak naennyi si maigei ne bo chi, ak ingigochi inendet naet ne bo tiondo; ak ingoteb ko u noto kot kogesgei betusiek che kiginag’at, konyil tisab.

¹⁷ Bunu kiruogoni ng’atutietab ribik, ak bunu magonato ng’olyotab icheget che tililen: si kobiit konai che soptos kole bou Inendet ne Toror Mising’ bounatetab bik, ak kogochin age tugul ne makyin, ak koeeti bik che nyerotin mising’ koboi.

¹⁸ Kiageer ane laitoriat Nebukadnesar tuguchuto eng’ karuotitoet: ee inye Beltesasar, mwa kaweekset, amu maimuchi bik tugul che ng’omen che bo bounatennyu koborua kaweekset; ago imuchi inye, amu menyin tamirmirietab cheptalelisiek che tililen.

Koboru Daniel kaweeksetab karuotitoet

¹⁹ Kitoptoben anyun ne matia Daniel, ne kigiguure Beltesasar, ak kiim inendet kabwatutikyik. Kiwolji laitoriat inendet kolenji, Beltesasar, amatingoiimin karuotitoet, anan ko kaweeksennyi. Kowolji Beltesasar kolenji, Ingobunji karuotitoet ichek che wechin, ak ingobunji kaweeksennyi buniguk.

²⁰ Ketit ne koigeer ne kobitei ak ko kim, ne itei walinnyi kipsengwet, ak kotoogu eng’ ng’ony tugul;

²¹ ne kororon sogekyik, ak ko chang’ logoekyik, ak kotinyei amitwogik che yamei bik tugul; ne komenyei keluunyi tiong’ikab timin, ak komenyei taritikab barak temenikyik;

²² inye noto, ee laitoriandani, ne koieetu ak igimitu: amu kogotesak etunateng’ung’ ak koitei kipsengwet, ak koitei tabanwekab ng’ony bounateng’ung’.

²³ Ak ko u ye kigeer laitoriat ribindet ne tilil kochorugei eng’ kipsengwet ak kole, Oeb ketit ak ong’em; ago obagakte musukyennyi eng’ ng’ony, ko miroot eng’ karnet ak sugunwet, eng’ ole mi suswek che ng’orng’or; si kobutyi rewot, ak kotebi koboto tiong’ikab timin, kot kogesgei betusiek che kiging’at, konyil tisab.

²⁴ Ni anyun kaweeksennyi, ee laitoriandani, noto ng’atutietab Inendet ne Toror Mising’, ne kanyonji kiptaiyandennyu laitoriat:

²⁵ kele kionin iwe eng’ ole mi bik, ak imeny koboto tiong’ikab timin, ak kegonin iaget ko u tuga, ak kobutyin rewot, kot kogesgei betusiek che kiging’at, konyil tisab; agoi inai ile bou Inendet ne Toror Mising’ bounatetab bik, ak kogochin age tugul ne makyin.

²⁶ Ak ko u ye king’at ichek kebagakta musukyet eng’ ng’ony; inyoru kogeny bounateng’ung’, ye kainai ile bounisiei kipsengwetisiek.

²⁷ Noto anyun, ee laitoriandani, ingochamak kiruogennyu eng’ inye, ak itabanege tengekwogiguk, ye iyae imanda, ak itabanege yaitwogiguk ye irire kibananok; si kotesak kalyeng’ung’.

Kasuldaetab karuotitoet

²⁸ Kibwanji laitoriat Nebukadnesar tuguchuto tugul.

²⁹ Ye kigesgei arawek tamanu ak aeng’ kowendote inendet gotab laitoriat ne bo Babulon.

³⁰ Kong’alal laitoriat kole, Tos ma Babulon ne o ni, ne kiateech koek ole menyei laitoriat, eng’ kamugetab kimnatennyu ak agobo torornatetab eutunatennyu?

³¹ Kingota kong’alali laitoriat, kotwek kutit ne bunu kipsengwet, kole, Ee laitoriat Nebukadnesar, kagimwaun ng’olyondoni: kele, kaistoenengei bounatet.

³² Ak kionin eng’ ole mi bik, ak imeny koboto tiong’ikab timin; kigonin iagete ko u tuga, agoi kogesgei betusiek che kiging’at, konyil tisab; agoi inai ile bou Inendet ne Toror Mising’ bounatetab bik, ak kogochin age tugul ne makyin.

³³ Kiisulda kioto sainato eng’ Nebukadnesar: ak kigion eng’ ole mi bik, ak koaget ko u tuga, ak kiibutyi rewot bortanyi, kot koeegitu sumeekyik ko u kororikab kipsichit, ak koigei siokyik che bo taritik.

³⁴ Ak kingogesgei betusiechoto anyal ane Nebukadnesar kipsengwet, ak koweekyagei naennyu, ak kiaweekyi kongoi Inendet ne Toror Mising, ak alosu ak agonyit inendet ne sobei koigeny; amu bounatennyi ko bounatet ne bo koigeny, ak ko bo laitornatennyi ibinwek tugul:

³⁵ ak kiiti bik tugul che menyei ng’ony kele buch: ak koyachin lugetab kipsengwet ko u ye machei, koboto bik che menyei ng’ony: ama mi chi ne imuchi kogirinda eunnyi, anan kolenji, Iyae nee?

³⁶ Kiweekyagei eng’ yoto naennyu; amu kiweekyagei etunatennyu ak kororonindanyu amu torornatetab bounatennyu; ak kibwa ole ami kiruogikyuk ak kiptainikyuk; ak kigigimita eng’ bounatennyu, ak kigiteswa etunatet ne kararan mising’.

³⁷ Alosu anyun ane Nebukadnesar, ak atorori ak agonyiti Laitoriatab kipsengwet; amu bo iman boisionikyik tugul, ak ko bo kiruoget ortinwekyik: ak imuchi koming’in ichek che bendoti eng’ menotet.