DANIEL 3 - BUKUIT NE TILIL

Kanamwetab tahabu ne bo Nebukadnesar

¹ Kiitany Nebukadnesar laitoriat kanamwet ne bo tahabu, ne koindab tononennyi ko ki kakwautik tamanwogik lo che bo eut, ko bo tebeesindanyi kakwautik lo che bo eut: kilumda inendet eng’ warengetab Dura, eng’ emetab Babulon.

² Yeityo koyokto laitoriat Nebukadnesar kiyum bounik, kandoik, ak kiruogik che tilei ng’alek, ribikab tuguk, bikab kapkiruok, ng’omotikab ng’atutik, koboto tononjinik tugul che bo emotinwek, kobwa katabanetab kanamwet ne kiga lumda laitoriat Nebukadnesar.

Koesioi Sadrak, Masak ak Abed-nego kolos kanamwanato

³ Koyumgei anyun bounik, kandoik, ak kiruogik, tilikab ng’alek, ribikab tuguk, bikab kapkiruok, ng’omotikab ng’atutik, koboto tononjinik tugul che bo emotinwek, koyumjigei katabanetab kanamwet ne kiga lumda laitoriat Nebukadnesar; ak kitononso eng’ taitab kanamwet ne kiga lumda Nebukadnesar.

⁴ Kimwa anyun ng’alindet ne mwaitoi ng’alek, eng’ kutit ne o, kole, Kaging’atak, ee bichu, bororiosiechu, ak che o bo kutuswek che ter, kele,

⁵ eng’ sait age tugul ne kogas cheetab igondit, ndurerut, ketubet, chepkesemit, kibugandet, ndurerut ne o, koboto tienwogik alak tugul, obutyi ng’ony ak olosu kanamwetab tahabu ne kilumda laitoriat Nebukadnesar:

⁶ ak age tugul ne maibutyin ng’ony ak kolos, kewirjin mat ne o, ne lalei mising’, eng’ sainato.

⁷ Kingogas anyun bik tugul cheetab igondit, ndurerut, ketubet, chepkesemit, kibugandet, koboto tienwogik alak tugul, kobutyi ng’ony bik tugul, bororiosiek, ak che bo kutuswek che ter, ak kolos kanamwetab tahabu ne kiga kolumda laitoriat Nebukadnesar.

⁸ Kirik anyun eng’ sainato Kaldeik alage koib kataamset ne kitaame Yahudik.

⁹ Komwachi bichoto laitoriat Nebukadnesar kolenji, Ee laitoriandani, sob agoi.

¹⁰ Ee inye laitoriat, koing’at ng’atutiet ile chi age tugul ne kasei cheetab igondit, ndurerut, ketubet, chepkesemit, kibugandet, ak ndurerut ne o, koboto tienwogik alak tugul, kobutyi ng’ony ak kolos kanamwetab tahabu:

¹¹ ak age tugul ne maibutyin ng’ony ak kolos, kewirjin mat ne o ne lalei mising’.

¹² Mitei Yahudik alak che kiinde koboi ng’alekab emetab Babulon, Sadrak, Mesak, ak Abed-nego; ma iitin bichuto, ee laitoriat: maotei cheptalelisieguk, ama ilosu kanamwetab tahabu ne koilumde.

¹³ King’at anyun Nebukadnesar eng’ koromnatennyi ak neregek che ng’wonen kole kimut Sadrak, Mesak, ak Abed-nego. Kigimut anyun bichuto kobwa taitab laitoriat.

¹⁴ Koteebe Nebukadnesar ichek kolenji, Ee, Sadrak, Mesak, ak Abed-nego, tos kootil iman ole moote cheptalelinnyu, anan olosu kanamwetab tahabu ne koalumde?

¹⁵ Ngot ochoboge anyun eng’ sait ne kogas cheetab igondit, ndurerut, ketubet, chepkesemit, kibugandet ak ndurerut ne o, koboto tienwogik alak tugul, obutye ng’ony ak olosu kanamwet ne koayai, komieitu: ago ngot ko molosu, kewirjinok mat ne o ne lalei mising’, eng’ sainato; ak ng’o cheptalelit ne tos soruok eng’ eunnyu?

¹⁶ Kowolji anyun Sadrak, Mesak ak Abed-nego, laitoriat kolenji, Ee Nebukadnesar, magimage kiy kewolun eng’ ng’olyondoni.

¹⁷ Ngot ko u noto, komuchi Kamuktaindennyo ne keote kosoruech eng’ mat ne o ne lalei mising’; ak kosoruech inendet eng’ eung’ung’, ee laitoriat.

¹⁸ Ago ngot ko ma u noto, ko kanyol inai inye, ee laitoriandani ile, magiote cheptalelisieguk, anan kilosu kanamwetab tahabu ne koilumde.

Ketooejin Sadrak, Mesak ak Abed-nego

¹⁹ Konyi anyun neregek che ng’wonen Nebukadnesar, ak kowalak togennyi konerekyin Sadrak, Mesak, ak Abed-nego: kong’alal anyun ak kong’at kole kilaal mat ne o kotesak konyil tisab kosiir ye cham kilaali.

²⁰ Ak king’at bik alak che nyigonen che ki bo lugennyi korat Sadrak, Mesak, ak Abed-nego, si kowirji maato o lalei mising’.

²¹ Kigiratita anyun bichoto ngoroikwak ak che taae metowekwak, ak ngoroikwak che koen, koboto ngoroikwak alak, ak kigiwirji maata o kolalei mising’.

²² Kibar anyun liblibenetab maata bichoto kinamei Sadrak, Mesak, ak Abed-nego, amu ki korom ng’atutietab laitoriat, ak kilalei maata o mising’.

²³ Ak kiibutyi anyun bichuto somogu, Sadrak, Mesak, ak Abed-nego, maata o lalei mising’, ko ratotin.

Kesoru murenjoto

²⁴ Kikwong’ anyun laitoriat Nebukadnesar ak kong’eet kochokyi: ak kong’alal kolenji bikyik che bo kapkiruok, Tos, kama kiwirji ma bik somok ko ratotin? Kowolji anyun bichoto laitoriat kolenji, Iman, ee laitoriat.

²⁵ Kowolji inendet ichek kolenji, Ogeero, ageere bik ang’wan che itiagotin, kobendoti eng’ ma, ama am kiy; ak kergei itondab ne bo ang’wan ak weritab cheptalelisiek.

²⁶ Korikyi anyun Nebukadnesar ole kibunei kebendi maata o kilalei mising’; ak komwa kole, Sadrak, Mesak, ak Abed-nego, okwek otwogikab Kamuktaindet ne Toror Mising’, omong’u obwa oli. Komong’ anyun Sadrak, Mesak ak Abed-nego eng’ ma.

²⁷ Ak kogeer bounik, kandoik ak kiruogik, ak bikab kapkiruok che bo laitoriat, ko kagoyumgei, bichuto, kole ma beel mat borwekwak, ama imel mat sumekwak, amawalogis ngoroikwak, ama ng’uu mat eng’ ichek.

²⁸ Kong’alal anyun Nebukadnesar komwa kole, Iberurot Kamuktaindetab Sadrak, Mesak, ak Abed-nego, ne kagoyok malaikaiyandennyi kosor otwogikyik che koimang’u inendet, ak kagowal ng’olyotab laitoriat, ak kogoito borwekwak si maot anan kolos cheptalelit age tugul kobate Kamuktaindenywa inegei.

²⁹ Kang’at ng’atutiet anyun ale kitonatoni bik alak tugul, bororiet age tugul, ak bikab kutit age tugul, che mwaei kiy age tugul ne ya agobo Kamuktaindetab Sadrak, Mesak, ak Abed-nego; ak keyai gorikwak koek kapng’atat: amu mami cheptalelit ne kimuchi kosor chi ko u ni.

³⁰ Koeet anyun laitoriat Sadrak, Mesak, ak Abednego, eng’ emetab Babulon.