DANIEL 12 - BUKUIT NE TILIL

Mikael sorunindet

¹ Ak kotonon eng’ betunoto Mikael, bounindet ne o ne toreti lagokab biguk: ak biitu betusiek che bo nyalilda, che kitomo kobiitu koboch ngab kobiit bororiet agoi betunoto: ak kisoru biguk eng’ betusiechoto, age tugul ne kigisirji kainennyi bukuit.

² Ak kong’eetyo che chang’ eng’ ichek che kigoruiyo eng’ ng’ung’unyek, bendi alak sobondab koigeny, ak kobendi alak tewernatet ak chotisiet ne bo agoi.

³ Ak koluu che ng’omen ko u kakweng’et ne bo barak; ak koluu koigeny ak koigeny ko u kecheik ichek che imutyin che chang’ imanda.

⁴ Ago tuch ng’alechu, ee Daniel, ak ing’och bukuit agoi betusiek che bo let: tun ruaati che chang’, ak kotesak naet.

Betusiek che bo kagesunet

⁵ Kiageer anyun ane Daniel, ak ogeero, kitononso alak aeng’u, kitonone age ngegutab ainet bitoni, kotonone age ngegutab ainet bitonin.

⁶ Ak kiteebe age ne kiilaachi ngoroikab katanit, ne kimi baragutab beekab ainonoto, kolenji, Tianitu si koek kagesunetab kwong’utichu?

⁷ Agas chito ne kiilaachi ngoroikab katanit, ne kimi baragutab beekab ainonoto, ye kinamjin barak eunnyi ne bo tai, ak eunnyi ne bo katam, ak koyosio eng’ inendet ne sobei koigeny, kole kobunjin kenyit, ak kenyisiek ak kebebertab kenyit; ak ye tun kagoges ichek tonet ne tonatoni kimnatetab bik che tililen, kogesgei anyun tuguchuto tugul.

⁸ Ak kiagas, ago ma aguiye: yeityo amwa ale, Ee kiptaiyandennyu, egu nee kagesunetab tuguchuto?

⁹ Ak kile, Ui inye Daniel: amu kagituch ng’alechuto ak keng’och kot koit betusiek che bo kagesunet.

¹⁰ Ianyinyegei che chang’, ak koyaegei koleelagitu, ak kotililegei: ago yaei kiptengeginik tengekto; amaiguitos kiptengeginik agot agenge: ago iguitos ichek che ng’omen.

¹¹ Egu betusiek elfut agenge ak bogol aeng’ ak tamanwogik sogol, koboch betusiek che kiistoi kagochinet ne kibeelei ne bo kotugul, ak kinde kit ne kiwechei ne ng’emisiei.

¹² Iberurot inendet ne igenisiei, ne itei betusiek elfut agenge ak bogol somok ak sosom ak mut.

¹³ Ago ui inye oldang’ung’ agoi koit kagesunet: amu imuunyi, ak tun itononi eng’ komostang’ung’, eng’ kagesunetab betusiechoto.