DANIEL 11 - BUKUIT NE TILIL

Kosib kemwau baretab ge ne bo Persia ak emetab Yunanik

¹ Ago kiatonon ane, eng’ kenyit ne bo tai ne bo Darius Medindet, agiil, agimit inendet.

² Aborun anyun ne bo iman. Keero, ta kobiitu laitorinik somogu eng’ Persia; ak egu magoriot mising’ ne bo ang’wan kosiir chun tugul: ak ye kagogimit amu magornatosiekyik, kong’eet bik tugul kobargei ak bounatetab emetab Yunanik.

³ Ak kobiit laitoriat ne kim mising’, ne tun bounisiei eng’ bounatet ne o, ak koyai ko u ye machei.

⁴ Ak ye kagobiit, keng’emei laitornatennyi, ak kopcheigei kotokyigei usonaik ang’wan che bo kipsengwet; ago ma tun bunjin iyotennyi, ama isubi ko u bounatennyi ne kibou; amu kitutu laitornatennyi kobunji alak koboto chuto.

Nametab ge ne bo murot ne bo katam ak murot ne bo tai, ak borienywa

⁵ Ak tun kimitu laitoriat ne bo murot ne bo tai, koboto age eng’ bounikyik; ak tun kimitu kosiir inendet, ak konyor bounatet; egu bounatennyi bounatet ne o.

⁶ Ak ye igesgei kenyisiek, konamgei; ak konyo cheptab laitoriatab murot ne bo tai ole mi laitoriatab murot ne bo katam kochamnyogei: ago mang’etyin cheboto kimnatetab eunnyi; ama tononi laitoriandanato, anan eunnyi; ago kigoitoi cheboto, koboto bik che kiimutu inendet, koboto chito ne kisichei inendet, koboto chito ne kigimiti inendet eng’ betusiechoto.

⁷ Ago mong’u age ne bunu temetab tigitikyik ne igeeri inendet, ne nyonei ole mi luget, ak kochut irimetab laitoriat ne bo murot ne bo katam, ak kobargei ak bichoto, ak koterter:

⁸ ak koib kogeny kanamonikwak koboto che kigitanyi, ak terenikwak che miachen che bo feda ak che bo tahabu; koluul koba Misri; ak kotebi kenyisiek alak, ama ibokyi laitoriat ne bo murot ne bo katam.

⁹ Ak kwo oldab bounatetab laitoriat ne bo murot ne bo tai, ak koweekyigei emennyi.

¹⁰ Ak koyai luget werikyik, ak koyum tuiyet ne o ne bo lugosiek, che tun bwanei, ak kochwalda koyom emet, ak kobun oloto: ak koweek ak koyai luget, agoi irimennyi.

¹¹ Ak konerech laitoriatab murot ne bo tai, ak komong’ ak kobargei ak inendet: noto ko laitoriatab murot ne bo katam: ak kochob tuiyet ne o, ak kinde tuiyonoto eunekyik.

¹² Ak ye kagimut tuiyet, koeetgei eng’ muguleldanyi: ak kobar tamanusiekab elfusiek, ago maiterteri.

¹³ Ak koweeigei laitoriatab murot ne bo katam, kochob luget ne o kosiir ni ka bo tai; ak konyo ko kagobata betusiek, choto ko kenyisiek alak, koboto luget ne o ak tuguk che chang’.

¹⁴ Ak tun ng’eetos che chang’ eng’ betusiechoto kogirinda laitoriatab murot ne bo tai: ak koeetgei lagokab bik che koromen eng’ biguk si kogimit ng’ang’utiet; ago ibutos.

¹⁵ Konyo anyun laitoriatab murot ne bo katam, ak kowasyi ng’ung’unyek, ak konam nganaset ne ng’otat komie: ak magirindoi lugosiekab murot ne bo tai, anan ko bikyik che kigilewen, ama biitu kimnatet age tugul ne kirindoisie.

¹⁶ Ago inendet ne nyonei kobaregei ak chichoto koyaei ko u ne machei, ama biitu chi ne imuchi kotonon eng’ tainnyi: ak kotonon inendet eng’ emet ne kararan mising’, ak mi eunnyi ng’emisiet.

¹⁷ Ak igiilegei konyo koboto kimnatetab laitornatennyi komugul, ak koyai kasyinet ak inendet; ak koyai ko u ye machei: ak kogochi inendet cheptab kwonyik, si kong’em; ago matononi, ama bunjin.

¹⁸ Ak ye ibata nito, kotokyigei ngegusiek, ak konam che chang’: ago igesu bounindet chotisiet ne kiigoitoi inendet; ee, weekyin inendet chotisiennyi.

¹⁹ Yeityo koweek kotokyi togennyi irimoikab emennyi: ago kinachi ak kobut, ak ma kenyoru.

²⁰ Ye ibata nito, kobiit ne igeeri inendet ne igochin taagindetab aisurut kobun kwenutab ytorornatet ne bo bounatet: ago king’emei inendet eng’ betusiek che ng’ering’, ma eng’ neregek, anan eng’ luget.

²¹ Ak kogeer inendet chito age ne kasasei, ne kima igochi ichek teegistab bounatet: ago tun nyonei eng’ betusiekab kalyet, ak konam bounatet eng’ mwaikutnatet.

²² Ak keisto ichek eng’ tainnyi eng’ luget ne marani, ak keton; koboto bounindetab kayomisutiet agine.

²³ Ak kobois eng’ ng’alset ye kagobata kasyinet: amu tun togosu ak kogimit, koboto bik che ng’ering’.

²⁴ Ibokyin komoswek che akwaen che bo emet eng’ betusiekab kalyet; ak koyai kit ne kima yai kwanisiekyik, anan kwanisiekab kwanisiekyik; ak koseerji kwenunywa barunenik ak luulenik, ak tuguk: ee, chobei chobutikyik agobo irimoik, che bo betusiek che kiging’at.

²⁵ Ak kong’eet kimnatennyi ak nyiganatennyi kobargei ak laitoriatab murot ne bo tai koboto luget ne o; ak koyai luget laitoriatab murot ne bo tai koboto luget ne o mising’ ak ko kim: ago matononi, amu chobei ichek chobutik agobo inendet.

²⁶ Ee, ng’emei inendet che amei amitwogikyik, ak kochwalda koyom lugennyi emet: ak kobutyo che chang’ ko kagebar.

²⁷ Ak che u laitorinichuto tuwai, ko tun tokyingei mugulelwekwak koyai yaitiet, ak komwaei lembechek kotebyei eng’ meset agenge: ago maborei; amu ta koitu kagesunet eng’ betut ne kiging’at.

²⁸ Yeityo koweekyigei emennyi koboto tuguk che chang’; ak kowech muguleldanyi kayomiset ne tilil; ak koyai ko u ye machei, ak koweekyigei emennyi.

²⁹ Weeksei kogeny eng’ betut ne kiging’at, ak konyo komostab murot ne bo tai; ago ma tun biitu eng’ betusiek che bo let ko u eng’ betusiek che bo tai.

³⁰ Amu tun bwanjin melisiekab Kitim kobargei ak inendet; arogeni anyun, ak koweeigei, ak konerech kowech kayomiset ne tilil, ak koyai ko u ye machei: ak koweeigei kogeny, ak kocham ichek che baraktoi kayomiset ne tilil.

³¹ Ak kotononso lugosiek eng’ komostanyi ak komuruon ole tilil, agot irimet, ak koisto kagochinet ne kibeelei ne bo kotugul, ak konde kit ne kiwechei ne ng’emisiei.

³² Ak komaas inendet eng’ mwaikutnatet che yaei yaitio kowechei kayomiset: ago kimegitu bik che ingen Kamuktaindenywa, ak koyai boisionik che kimen che kikwong’e.

³³ Ak konet bik che chang’ bik che ng’omen che mi kwenutab bik: ago kibarei eng’ rotwetab chok, ak eng’ mat, eng’ luulet ak eng’ kamutet, eng’ betusiek che chang’.

³⁴ Ye kagobutyo anyun, ketoreti eng’ toretet ne matia: ago namegei che chang’ ak ichek eng’ mwaikutnatet.

³⁵ Ak kobutyo alak che ng’omen eng’ ichek, si kitilil, ak kianyiny, ak keyai koleelagitu, kot koit betut ne bo let: amu ta koitu betut ne kiging’at.

³⁶ Ak koyai laitoriat ko u ye machei; ak kotororgei ak koeetgei kosiir cheptalelit age tugul, ak komwa tuguk che kikwong’e agobo Kamuktaindet ne bou cheptalelisiek: ak konyor inendet borotet kot kosulda neregek; amu kiyaei noto kigeng’at.

³⁷ Ama iiti cheptalelisiekab kwanisiekyik, anan ne chamat eng’ kwonyik, ama iiti cheptalelit age tugul ago ieetegei kosiir tugul.

³⁸ Ago konyiti cheptalelitab irimoik eng’ komostanyi: ak kogonyit cheptalelit ne kima nai kwanisiekyik, kogochi tahabu, ak feda, koboto koik che bo kamanutiet ne o, ak tuguk che kichamei.

³⁹ Ak konam irimoik che kimen mising’ eng’ toretetab cheptalelit ne ter; tesyin torornatet age tugul ne chamei inendet: ak kogochin inendet ichek koboi che chang’, ak kopchei emet kobunji kagaigaet.

⁴⁰ Ak koborio ak inendet laitoriatab murot ne bo tai eng’ betusiek che bo let: ak kobokyi inendet laitoriat ne bo murot ne bo katam ko u kipchurjuriet, koboto karisiekab luget, ak bik che lanyei mbartanyisiek, ak melisiek che chang’; ak kwo kochwalda koyom emotinwek, ak kobun oloto.

⁴¹ Wendi inendet kogeny emet ne kararan, ak kigabui emotinwek che chang’: ago kisoru chu eng’ eunnyi, Edom, ak Moab, ak chu eechen che bo lagokab Amon.

⁴² Tokyin eunnyi kogeny emotinwechoto: ama chilili emetab Misri.

⁴³ Ago bou inendet konoraik che bo tahabu ak che bo feda ak tuguk tugul che bo kamanutiet ne o che bo Misri: ak kosub inendet Libyanik ak Etiopik.

⁴⁴ Ago iimi inendet ng’alek che bunu kong’asis ak che bunu murot ne bo katam: ak kwo eng’ neregek che ng’wonen che eechen kwo kong’emis ak kobar che chang’.

⁴⁵ Ak koteech emaisiekab gonnyi ne bo laitornatet eng’ kwenutab nyanjet ak tulwet ne tilil ne kararan; ago tun meei, ama toreti chi inendet.