DANIEL 10 - BUKUIT NE TILIL

Kogeerei Daniel ng’ang’utiet agobo Chito

¹ Kiging’ang’ji Daniel ne kigiguure Beltesasar kiy eng’ kenyit ne bo somok ne bo Kirus laitoriatab Persia; ak ki bo iman kioto, noto ko ki boriet ne o: ak kiiguiyo, ak konyor kaguiyetab ng’ang’utiet.

² Kiarir ane Daniel eng’ betusiechoto, wigisiek somok che nyiitotin.

³ Kima am amitwogik che miach, ama am banyek, amaee divaik, ama aiilge, agoi kogesgei wigisiechoto somogu.

⁴ Ak eng’ betutab tiptem ak ang’wan ne bo arawet ne bo tai, ye kiami ngegutab ainet ne o, ne noto ko Hidekel,

⁵ ayot met ak atobende, ageer chito ne ilaachi ngoroikab katanit, ne kiga rategei tahabu ne kararan ne bo Upas;

⁶ ki u kogeny bortanyi berulo, ak ki u togennyi kalyelet, ak kiu konyekyik taisiek che bo mat, ak ki u eunekyik ak kelyekyik itondab sugunwet ne sitat, ak ki u twegunetab ng’alekyik twegunetab bik che chang’.

⁷ Ak kiageer ng’ang’utiet anege, ane Daniel: amu ma keer ng’ang’utionoto bik che kigimi tugul; ago kibotanso mising’, ak komwei kounygei.

⁸ Kiang’etu anyun anege, ak kiageer ng’ang’utionoto o, ak kima kota atinye kimnatet: amu kiwalak kororonindanyu kong’emak, ak ma ng’etwa kimnatet.

⁹ Ago kiagas twegunetab ng’alekyik: ak kingagas twegunetab ng’alekyik, anuuch, asieb mo.

Kogimiti Chitikai Daniel

¹⁰ Ak ogeero, kitwaa eunnyi ne kinama agutuny ak atebendoe eunekyuk.

¹¹ Ak kilenja, Ee Daniel, inye chito ne i chamat mising’, iguiye ng’alek che amwaun, ak itonon komie; amu kagiyokwa anyo oli imi: ak kingo kagomwawa ng’olyondonito, atonon abotani.

¹² Kolenja anyun, Ameiyweisie, Daniel; amu kigigasun ng’aleguk koboch betut ne bo tai ye kiimach iguiye eng’ muguleldang’ung’, ak iming’inge eng’ taitab Kamuktaindeng’ung’: ak kanyo amu ng’aleguk.

¹³ Ago kiranya bounindetab bounatetab Persia eng’ betusiek tiptem ak agenge: ago keero, kinyo Mikael, age eng’ bounik che eechen kotoreta: ak kiatebe oloto koboto laitorinikab Persia.

¹⁴ Kanyo anyun si kobiit aborun iguiye tuguk che tun bwanjin biguk eng’ betusiek che bo let: amu bo ng’ang’utiet betusiek che chang’.

¹⁵ Ak kingo kagong’alalwa ng’alechuto, ang’uruge ak konamaga kut.

¹⁶ Ak ogeero, kitwa kutinnyu age ne kergei ak werikab bik: ayat kutinnyu anyun, ang’alal, alenji inendet ne kitonon eng’ tainnyu, Ee kiptaiyandennyu, kagobwanja arogenosiekyuk amu ng’ang’utiet, ama ng’etwa kimnatet.

¹⁷ Amu imuktoi ano otwogindetab kiptaiyandaninyu kong’alal ak kiptiyandennyu? Amu ne u ane, ko ko mata kong’etwa kimnatet, ak kagogera tigiis.

¹⁸ Yeityo kotwaa kogeny age ne u chito, ak kiigimita.

¹⁹ Ak kile, Ee inye, chito ne i chamat mising’ ameiywei: ingotebenen kalyet, kimitu, ee kimitu. Ak kingong’alalwa, agimitu anyun, ak kiale, Ingong’alal kiptaiyandennyu; amu kaigimita.

²⁰ Yeityo kole, Tos ingen ile amu nee si anyonjin? Kaweege anyun si kebarge ak bounindetab Persia: ak ye awe, keero, konyo bounindetab emetab Yunanik.

²¹ Ago amwaun kit ne sirat eng’ sirutik che bo iman: ama mi age ne toreta agirinda tuguchuto, kobate Mikael bounindeng’wong’.