DANIEL 1 - BUKUIT NE TILIL

Komi Daniel ak choronokyik somok Babulon koga keluul

¹ Kinyo Nebukadnesar laitoriatab Babulon Jerusalem, ak koyiem eng’ kenyitab somok ne bo laitornatetab Jeoiakim laitoriatab Juda.

² Ak kiinde Kiptaiyat eutab Nebukadnesar Jeoiakim laitoriatab Juda, koboto tuguk alak che bo gotab Kamuktaindet; ak kiib tuguchoto koba emetab Sinar agoi gotab cheptalelinnyi: ak konde tuguchoto gotab konoraik che bo cheptalelinnyi.

³ Ak king’alalji laitoriat Aspenas bounindetab kiptainikyik, si komut alak eng’ lagokab Israel, che bo iyotetab laitoriat ak bik che toogunotin;

⁴ neranik che kima kotinyei berut, ak ko kororon, ak ko utotin eng’ ng’omnatet, che ng’omen eng’ naet, ak koguitos ung’otikab ng’omnatet, ak che u choto che kitinyei kamuget kotononso eng’ gotab laitoriat, si kobiit konet laitoriat ichek ng’omnatet ak kutitab Kaldeik.

⁵ Ak king’at laitoriat kigochi ichek amitwogikab laitoriat che yamei betut age tugul, koboto che bo divaik che kieei inendet, ak king’at kole kebai kenyisiek somok, si ye ibata kenyisiechoto kotononso eng’ taitab laitoriat.

⁶ Kimi anyun eng’ choto eng’ lagokab Juda, Daniel, Hanania, Misael, ak Asaria.

⁷ Ak kitochi bounindetab kiptainik ichek kainaik: koguure Daniel Beltesasar, ak koguure Hanania Sadrak, ak koguure Misael Mesak, ak koguure Asaria Abed- nego.

Koesioi bichoto amitwogikab kaplaitoriat

⁸ Ago kitil Daniel eng’ muguleldanyi kole si maing’wanitegei amitwogikab laitoriat, anan divaik che kieei laitoriat: kisom anyun bounindetab kiptainik kole si maing’wanitgei.

⁹ Kiigochi anyun Kamuktaindet Daniel konyor chamet ak rirenet eng’ taitab bounindetab kiptainik.

¹⁰ Ak kilenji bounindetab kiptainik Daniel, Aiywei kiptiyandennyu laitoriat, ne king’at amitwogikwok ak che oee, si ma keer inendet kole yaach togochikwok kosiir che bo neranik che oaechine. Ogona anyun kobara laitoriat.

¹¹ Yeityo komwachi Daniel ribindet, ne king’at bounindetab kiptainik koboi Daniel, Hanania, Misael, ak Asaria:

¹² kolenji, Asomin ale tiem otwogiguk, eng’ betusiek taman; ak ingogonech ngwek keam, ak beek che kieei.

¹³ Si igeer anyun togochikyok, ak togochikab neranik che amei amitwogikab laitoriat; ak iyachi otwogiguk ko u ye kegeer.

¹⁴ Kigasyi anyun bounindet ng’olyondonoto, ak kotiem ichek eng’ betusiek taman.

¹⁵ Ak kingogesgei betusiechoto tamanu, kotook togochikwak ko kororon ak ko neriotin kosiir neranik tugul che kiamei amitwogikab laitoriat.

¹⁶ Kiisto anyun ribindet amitwogikwak, ak divaik che kita eei, ak kogochi ngwek.

Kimiagitu bborwekwak ak ng’omnatosiekwak kosiir bik alak

¹⁷ Ago eng’ atebetab neranichuto ang’wan, ko kiigochi Kamuktaindet naet ak utatiet eng’ kanetetab ge tugul ak ng’omnatet: ak kitinyei Daniel kaguiyet ne bo ng’ang’utik tugul ak karuotitaosiek.

¹⁸ Ak kingogesgei betusiek che king’at laitoriat kole kimut ichek kobwa go, komut bounindetab kiptainik ichek kobwa taitab Nebukadnesar.

¹⁹ Ak king’alal laitoriat ak ichek; ama biit agot agenge eng’ ichek tugul ne u Daniel, Hanania, Misael, ak Asaria: kitononso anyun ichek eng’ taitab laitoriat kotugul.

²⁰ Ak kigeer anyun laitoriat bichoto kole siirei bik tugul che ng’omen che ng’orsei, ak ng’omotikab kecheik che kimi bounatennyi tugul konyil taman eng’ kit age tugul ne bo ng’omnatet ak naet ne kiga teepse laitoriat bichoto.

²¹ Ak kitebi Daniel agoi kenyit ne bo tai ne bo laitoriat Kirus.