AMOS 9 - BUKUIT NE TILIL

Machilile chi kiruogutikab Jehovah

¹ Kiageer Kiptaiyat kotonone ole negite kaptisisiet: ak kile, Kwer walisiekab tolochik, kot kotumdumgei tugatugik: yeityo itonaton walisiechoto eng’ metowekab ichek tugul; ak abere rotwetab chok che ng’etu: mamweei agot agenge eng’ ichek, ama chilili agot agenge.

² Agot ngo bal agoi oldab che kigobek, konemu eunnyu eng’ oloto; agot ngo togosta kipsengwet, achooru eng’ oloto.

³ Agot ngo ung’egei tulwetab Karmel barak, acheng’e ak anemu eng’ oloto; agot ngo ung’enagei eng’ nyanjet orit, ang’ate eng’ oloto erenet, si kosus ichek.

⁴ Agot ngo luul bunikwak, ang’ate rotwetab chok eng’ oloto, si kobar ichek: ak atokyige ichek aipchi yaitiet, maipchini kit ne mie.

⁵ Amu Kiptaiyat Jehovah ne bo lugosiek, ko inendet ne twaei emet si kochoot, ak koririo tugul che menyei oloto; ak ng’eetei emet komugul ko u Ainet; ak koteny kogeny ko u Ainet ne bo Misri.

⁶ Inendet ne teechei gorikyik eng’ kipsengwat, ne teechei yiemutiennyi eng’ baragutab ng’ony; inendet ne kuurei nyanjet ak korong’ji ng’ony; Jehovah kainennyi.

⁷ Tos mou lagokab Etiopik eng’ ane, ee lagokab Israel? Mwaei Jehovah. Tos ma amutu Israel kotogos eng’ emetab Misri, ak amutu Pilistik eng’ Kaptor, ak amutu Suriek eng’ Kir?

⁸ Ogeero, keerei konyekab Kiptaiyat Jehovah bounatet ne tinyei tengekto, ak ang’em aiste eng’ ng’ony; kobate mang’eme agesu gotab Jakobo, mwaei Jehovah.

⁹ Amu, ogeero, ang’ate, ak ases gotab Israel eng’ bororiosiek tugul, ko u ye kisesei bek eng’ kit ne kisesisie, ago maibutyin ng’ony baiywat, agot ne ming’in.

¹⁰ Begu eng’ rotwetab chok kiptengeginik tugul che bo bikyuk, che len, Maityinech yaitiet anan konyoruech.

Kaweguegunetab Israel kobwa emenywa

¹¹ Ang’eeti eng’ betunoto emaitab Daudi ne kigobut, ak agerate ole kibutok; ak atuuru karatwekyik, ak ateech koigei ne ki bo betusiek che bo keny.

¹² Si kobiit konam ichek bik che king’et che bo Edom, koboto bororiosiek tugul, che kimwaitoe kainennyu, kobunji, mwaei Jehovah ne yaei ng’olyondonito.

¹³ Ogeero, bwanei betusiek, mwaei Jehovah, che nyo kosiirtoe chito ne ibatisiei kesindet, ak kosiirtoe chito ne tiechei sabibuk kolindet; ak kosaune tulonok divaik che anyiny, ak kochootyo tulonok tugul che mengechen.

¹⁴ Ak amutu kogeny bikyuk Israel che kiga keluul, ak koteech nganasok che kiga koek karatwek, ak komeny oloto; ak komin mbarenikab sabibuk, ak koeei divaikab mbarenichato; ak kobatis, ak koam logoekab mbarenichato.

¹⁵ Ak amin ichek eng’ emenywa, ama kitutu kogeny eng’ emenywa ne kiagochi, mwaei Jehovah Kamuktaindeng’ung’.