AMOS 8 - BUKUIT NE TILIL

Ng’ang’utiet agobo kitongetab logoek che bo kemeut

¹ Kiiborua Kiptaiyat Jehovah ko u ni: ogeero, kitongetab logoek che bo kemeut.

² Ak kilenja, Amos, igeere nee? Ak kialenji, Ageere kitongetab logoek che bo kemeut. Kilenja anyun Jehovah, Kanyonji kagesunet bikyuk Israel; ma abune kogeny ole mi ichek.

³ Ak koek tienwogik che bo hekalut kateeiyosiek eng’ betunoto, mwaei Kiptaiyat Jehovah: chang’itu muswek; wirtoi muswechoto eng’ komosta age tugul eng’ sisek.

⁴ Ogas ng’olyondoni, ee okwek che olugui che matinyei kiy, ak che ogochini kibananok che bo emet kobek,

⁵ olen, Meei au arawet ne kaleel, si kobiit kealde bek? Ak igesugei au sabato, si kobiit kimarte bek? Si keyai epah koming’init, ak keyai sekel koeet, si keyai kaberberisiet eng’ tuguk che kirogendoisie che bo ng’alset;

⁶ kole si kobiit keale kibananok feda, ak keale che matinyei kiy kweonik, ak kealde metetekab bek.

⁷ Kogoyosio Jehovah eng’ telunatetab Jakobo, kole, Magoi autie iman boisionikwak, agot agenge.

⁸ Tos mabotani emet amu nito, ak korir age tugul ne menyei oloto? Ee, ng’eetei komugul ko u Ainet; ak koiimgei ak koteny kogeny, ko u Ainet ne bo Misri.

⁹ Ak agochini kororokto asista bet kwen eng’ betunoto, ak agochini emet koimenit eng’ betut ne churat, mwaei Kiptaiyat Jehovah.

¹⁰ Ak awal igorwekwok koek rirek, ak awal tienwogikwok tugul koek kateiyet; ak agochi bik tugul kogermenegei kuniok, ak koam bosta chi tugul; ak ayae noto koek che kirirjin werit ne kigii inegei, ak ayae kagesunennyi koek betut ne ng’wan.

Nyonei rubet ne bo ng’olyotab Jehovah

¹¹ Mwaei Kiptaiyat Jehovah kole, Ogeero, bwanei betusiek che ayokyini emet rubet, ma ne bo amitwogik, anan ne bo meleldab beek, ago rubet ne bo kasetab ng’alekab Jehovah.

¹² Ak koombeniot kong’eete nyanjet age agoi nyanget age, ak kong’eete murot ne bo katam agoi kong’asis; tun ruaati kobendi komosi ak komosi kocheng’oti ng’olyotab Jehovah, ama tun nyoru.

¹³ Tun tanuitos bergeinik che kororon ak murenik eng’ betunoto, amu melelda.

¹⁴ Icheget che iyostos eng’ tengektab Samaria, kole, Ee Dan, ko u ye sobei Kamuktaindeng’ung’; ak ko u ye sobei oretab Beer-seba; ibutos choto agichek, amagoi ng’eetyo kogeny.