AMOS 7 - BUKUIT NE TILIL

Ng’ang’utik agobo chereng’enyenyinik, ak mat, ak borowet ne kilititisie

¹ Kiiborua Kiptaiyat Jehovah ko u ni: ogeero, kiyai inendet chereng’enyinik ye kibitos tuguk che bo let; ogeero, ki tuguk che bo let che kibitos ye kingo kagobata ng’eetab suswek che bo laitoriat.

² Ak ye kingo kagoam suswek koges eng’ emet, ale anyun, Ee Kiptaiyat Jehovah, asain ale, nyochi kaat: tonondoi ano Jakobo? Amu ming’in.

³ Kiwal Jehovah kabwatutikyik agobo nito: mabiitu ko u noto, mwaei Jehovah.

⁴ Kiiborua Kiptaiyat Jehovah ko u ni: ogeero, kiguur Kiptaiyat Jehovah mat kobelisie; ak kibeel riret ne o, ak komach koam emet.

⁵ Yeityo amwa ale, Ee Kiptaiyat Jehovah, asain ale, Isis; tonondoi ano Jakobo? Amu ming’in.

⁶ Kiwal Jehovah kabwatutikyik agobo nito: Mabiitu nito agine, mwaei Kiptaiyat Jehovah.

⁷ Kiiborua inendet ko u ni: ogeero, kitonone Kiptaiyat ole negite inatut ne kigilitite borowet, kotinyei eng’ eunnyi borowet ne kilititisie.

⁸ Ak kilenja Jehovah, Amos, igeere nee? Ak kiale, Ageere borowet ne kilititisie. Kile anyun Kiptaiyat, Keero, andoi borowet ne kilititisie kwenutab bikyuk Israel; ma abune kogeny ole mi ichek:

⁹ ak koguber komoswek che tororen che bo Isak, ak kebut oldinwek che tililen che bo Israel; ak ang’eet abar gotab Jeroboam eng’ rotwetab chok.

Itaan Amasia tisiindet Amos kole chaamsei

¹⁰ Kiiyokto anyun tisiindet Amasia ne bo Bet-el keguur Jeroboam laitoriatab Israel, kelenji, Kogochaamin Amos eng’ kwenutab gotab Israel: maimuchi emet komuita eng’ ng’alekyik tugul.

¹¹ Amu mwaei Amos ko u ni kole, Kibarei Jeroboam eng’ rotwetab chok, ak keluul iman Israel kimut eng’ emennyi.

¹² Kilenji kogeny Amasia Amos, Ee inye, keerindoni, ui mwechi emetab Juda, ak iamisie eng’ oloto, ak imaoten eng’ oloto:

¹³ ago mat kota imaoten kogeny eng’ Bet-el: amu oloto ko oldo ne tilil ne bo laitoriat, ak ko gotab laitornatet.

Mwaei Amos kole bunu kuursennyi Jehovah

¹⁴ Kiwolji anyun Amos Amasia, kolenji, Kima ko a maotiot, ak ki ma ko a weritab maotiot; ago kia mestowot, ak kia saborindetab mogoonik:

¹⁵ ak kiimuta Jehovah ayagisiei, ak kilenja Jehovah, Ui maotenji bikyuk Israel.

¹⁶ Kas anyun nguno ng’olyotab Jehovah: Imwae inye ile, Amat imaotenji Israel agobo kiy ne ya, anan imwa ng’olyo agobo gotab Isak.

¹⁷ Mwaei anyun Jehovah ko u ni kole: Egu osotiondeng’ung’ chepkugoniot eng’ nganaset, ak kebare rotwetab chok weriguk ak tibiguk, ak kepchee borowet emeng’ung’; ak imee inyendet eng’ emet ne ng’wan, ak keluul iman Israel kimut eng’ emennyi.