AMOS 6 - BUKUIT NE TILIL

¹ Bwa eng’ ichek che mi kalyet eng’ Sion, ak eng’ ichek che ribotin che mi tulwetab Samaria, bik che toogunotin che bo che eechen eng’ bororiosiek, che bwanjin gotab Israel!

² Osiirte oba Kalne, ak ogeer; ak obe eng’ oloto agoi Hamat ne o: yeityo ochorjige Gat ne bo Pilistik; tos miachen ichek kosiir bounatosiechu? Anan tos o kiwotenywa kosiir neng’wong’?

³ Okwek che oistoi kolooit betut ne ya, ak oibu ng’echeretab koromnatet korik;

⁴ ichek che ruitos eng’ itogusiek che bo kelekab belek, ak koiitogei eng’ tugukwak che kilyeldoe, che amei arekab kechir che bo akwet, ak moek che mi biusiek;

⁵ ichek che tieni tienwogik che bo buch eng’ cheetab kibugandet; che chopchingei tuguk che bo tienwogik, ko u Daudi;

⁶ che eei divaik eng’ bagulisiek, ak koiilegei mwanik che kororon; ago maarogendos agobo nyalildab Josep.

Nyonei biret ne ng’wan

⁷ Kiluulei anyun koboto ichek che kisib keluul, ak kogesgei anyun bolatet ne bo boiboiyetab ichek che iitogei.

⁸ Kigoyosiechigei Kiptaiyat Jehovah, mwaei Jehovah, inendet Kamuktaindet ne bo lugosiek, kole: Aweche menotetab Jakobo, ak aweche gorikyik che bo laitoriat: asoru anyun nganaset koboto tugul che mi orit.

⁹ Ak ngot kong’et bik tamanu eng’ got agenge, kobegu.

¹⁰ Ak ye sut chi imamet, ne inendet ne beelei, si koib kowek komong’ eng’ go, ak kolenji inendet ne mi komoswek che bo orit che bo got, Tos ta omi ak age? Ak kole inendet, Achicha; kole anyun, Sis; amu magichamwech kemwa kainetab Jehovah.

¹¹ Amu, ogeero, ng’atei Jehovah, kebut got ne o kong’emak, ak kebut got ne ming’in kong’asiagan.

¹² Tos ruaei mbartanyisiek eng’ ruandet? Tos ibate chi eik oloto? Ko owal kiruoget koek kit ne ng’wan, ak owal logoek che bo imanda koek ng’wanet:

¹³ okwek che oboiboitune kit ne bo buch, che omwae ole, Tos ma kiib eng’ kimnatennyo kuinoik kobunjech?

¹⁴ Amu, ogeero, ang’eeti bororiet obarge, ee, gotab Israel, mwaei Jehovah, Kamuktaindet ne bo lugosiek; ak konyalilak koboch ole kibunei kebendi Hamat agoi kererut ne bo Araba.