AMOS 5 - BUKUIT NE TILIL

¹ Ogas ng’olyondoni amwae eng’ rirek agobo okwek, ee gotab Israel.

² Kagobut bergeiyatab Israel; ma kong’eetei kogeny: kagewirta eng’ emennyi: mami chi ne ing’eeti.

³ Amu mwaei Kiptaiyat Jehovah ko u ni kole: Nganaset ne kocham komandoe bik elfut agenge kong’etyin bogulu, ak ne kocham komandoe bik bogolu kong’etyin tamanu, ng’etyin choto tugul gotab Israel.

K anyol kocheng’ Israel Jehovah

⁴ Amu mwachin Jehovah gotab Israel ko u ni kole, Ocheng’a, si osopche:

⁵ amocheng’ Bet-el, anan obe Gilgal, amosiirte obe Beer-seba: amu kiluulei iman Gilgal, ak koek buch Bet-el.

⁶ Ocheng’ Jehovah si osopche: si ma lal ko u mat eng’ gotab Josep, ak kobeel koges, ama biitu chi ne imisi eng’ Bet-el:

⁷ okwek che oweechi kiruoget koek ng’wonet, ak owirjini ng’ony imanda;

⁸ ocheng’ inendet ne yaei Koremerik ak Kapsomoguk, ak kowalei uruetab meet koek karonet, ak koyaei betut koek kemoi; inendet ne kuurei nyanjet ak korong’ji ng’ony; Jehovah kainennyi;

⁹ ne ipchin che kimen ng’emisiet koche, si konyonji ng’emisiet irimet.

Wechei Jehovah tugukab talbisto ne o, ak imanda ne mami emet, ye mi chombilisiet kasubetab sautik

¹⁰ Wechei ichek inendet ne kerei kong’ eng’ ormarichet, ak kowechei ichek chito ne mwaei che litit.

¹¹ Amu kiotiechatiech kibananok, ak omage ichek bek eng’ kimnatet: kioteech anyun gorik eng’ koik che kigiwai, ago momenye gorjoto; kiomin mbarenik che kororon che bo sabibuk, ago moee divaikwak.

¹² Amu angen ole te chang’indab bistaosiekwok ak ole te oindab tengekwogikwok; okwek che onyalili bik che bo iman, che otaache tuguk che bo kagaigaet, ak omaasi che matinyei kiy eng’ ormarichet si manyor imandanywa.

¹³ Sisei anyun ne ng’om eng’ betusiek che u choto; amu yaachen betusiechoto.

¹⁴ Ocheng’ che miach, amocheng’ yaitiet, si osopche: si koteb kobotok Jehovah, Kamuktaindet ne bo lugosiek, ko u ye omwae.

¹⁵ Owech yaitiet, ocham che miach, ak ogimit kiruoget eng’ ormarichet: abere imuchi korire Jehovah, Kamuktaindet ne bo lugosiek, che king’et che bo Josep.

¹⁶ Mwaei anyun Jehovah, Kamuktaindet ne bo lugosiek, inendet Kiptaiyat, ko u ni kole: Biitu kateeiyet eng’ ortinwek tugul che baraen; ak komwa eng’ ortinwek tugul kole, Bwa! Bwa! Ak koguur kabatindet konyo korir, ak koguur che ingen koteiyo, koririo.

¹⁷ Ak kobiit rirek eng’ mbarenik tugul che bo sabibuk: amu abune kwenung’ung’, mwaei Jehovah.

¹⁸ Bwa eng’ okwek che omache betutab Jehovah! Amu nee si omache betutab Jehovah? Mesundeito betunoto, ma lapkeiyet;

¹⁹ ko u ye kamwee chito ng’etundo, ak kotuiye tiondo ne u keerit; anan kwo go ak kotiing’e eunnyi inat, ak kosus erenet inendet.

²⁰ Tos maimenitu betutab Jehovah ama lapkeitu? Ee, imenitu mising’ ama mi kaluunet?

²¹ Aweche, asase igorwekwok, amabaibaitune tuiyosiekwok che bo kaming’inetab ge.

²² Ee, agot ngogona kagochinoikwok che kibeelei ak kagochinoikwok che bo busiek, ko mataache: amaiiti kagochinoikwok che bo kalyet, che bo che kiyagi che akwaen.

²³ Oistoena cheetab tienwogikwok; amu mamache agas anyinyindab kibugandinikwok.

²⁴ Ago ingoroot kiruoget ko u beek, ak ingoroot imanda ko u ainet ne nyiitat beek.

²⁵ Ee gotab Israel, tos kima oibwa tiseiywek ak kagochinoik eng’ ong’atet kenyisiek artam?

²⁶ Ee, kooibote Sikut laitoriandeng’wong’, ak Kium kanamonikwok, kecheiyatab cheptaleling’wong’, che kioyachige.

²⁷ Agoitook anyun keluulok, kimutak osiir Damasko, mwaei Jehovah, ne kainennyi ko Kamuktaindet ne bo lugosiek.